ᠶᠡᠬᠡ ᠬᠠᠭᠠᠨ ᠬᠢᠭᠡᠳ ᠬᠦᠭᠰᠢᠨ ᠪᠣᠮᠪᠣ
--- ᠲᠡᠤᠬᠡ ᠶᠢ ᠡᠷᠡᠭᠦᠯ ᠤᠬᠠᠭᠠᠨ ᠢᠶᠠᠷ ᠣᠢᠯᠠᠭᠠᠬᠤ ᠨᠢ ︵ ᠭᠤᠷᠪᠠ︶
ᠪ᠂ ᠲᠦᠮᠡᠨ᠋ᠥ᠌ᠯᠵᠡᠢ
ᠮᠣᠩᠭᠣᠯ ᠤᠨ ᠲᠡᠤᠬᠡᠨ ᠳ᠋ᠥ ︽ᠡᠵᠡᠨᠲᠦ ᠭᠦᠷᠦᠨ ᠤ ᠦᠶᠡ︾ ᠬᠡᠮᠡᠨ ᠨᠡᠷᠡᠯᠡᠭᠳᠡᠳᠡᠭ 13-14 ᠳ᠋ᠤᠭᠡᠷ ᠵᠠᠭᠤᠨ ᠤ ᠲᠡᠤᠬᠡ ᠶᠢ ᠣᠢᠯᠠᠭᠠᠶᠠ ᠭᠡᠪᠡᠯ ᠬᠢᠲᠠᠳ ᠰᠣᠷᠪᠤᠯᠵᠢ ᠶᠢ ᠲᠣᠭᠣᠷᠢᠵᠤ ᠭᠠᠷᠬᠤᠶᠠ ᠪᠡᠷᠬᠡ᠃ ᠡᠨᠡ ᠨᠢ ᠬᠢᠲᠠᠳ ᠤᠳ ᠮᠤᠨᠳᠠᠭ ᠲᠠᠭᠠᠨ ᠪᠢᠰᠢ ᠬᠠᠷᠢᠨ ᠮᠣᠩᠭᠣᠯᠴᠤᠳ ᠮᠤᠨᠳᠠᠭ ᠪᠠᠢᠭᠰᠠᠨ ᠤ ᠭᠢ᠃ ᠮᠣᠩᠭᠣᠯᠴᠤᠳ᠂ ᠠᠯᠲᠠᠨ ᠤᠯᠤᠰ ᠨᠡᠷᠡ ᠲᠢ ᠪᠣᠯᠣᠭᠰᠠᠨ ᠤᠮᠠᠷᠠᠲᠤ ᠬᠢᠲᠠᠳ ᠤᠨ ᠨᠤᠲᠤᠭ ︵ ᠪᠡᠭᠡᠵᠢᠩ ᠪᠠᠭᠲᠠᠨᠠ︶ ᠢ ᠡᠵᠡᠯᠡᠭᠰᠡᠨ ᠡᠴᠡ ᠡᠬᠢᠯᠡᠵᠤ ᠪᠣᠳᠣᠪᠠᠯ 134 ᠵᠢᠯ ᠬᠢᠲᠠᠳ ᠤᠨ ᠲᠦᠷᠤ ᠶᠢ ᠪᠠᠷᠢᠭᠰᠠᠨ ᠠᠵᠢ᠃ ᠲᠦᠷᠤ ᠤᠯᠤᠰ ᠨᠢ ᠮᠦᠬᠦᠭᠰᠡᠨ ᠴᠤ ᠦᠨᠳᠤᠰᠤᠳᠡᠨ ᠨᠢ ᠪᠠᠢᠭᠰᠠᠨ ᠤᠴᠢᠷ ᠲᠡᠤᠬᠡ ᠪᠠᠨ ᠪᠢᠴᠢᠬᠦ ᠨᠢ ᠪᠤᠷᠤᠭᠤ ᠶᠠᠭᠤ ᠪᠠᠢᠬᠤᠪ᠃
ᠬᠢᠲᠠᠳ ᠲᠡᠤᠬᠡᠨ ᠰᠤᠷᠪᠤᠯᠵᠢ᠂ ᠤᠷᠠᠨ ᠵᠤᠬᠢᠶᠠᠯ᠂ ᠡᠩ ᠦᠨ ᠮᠡᠳᠡᠭᠳᠡᠬᠦᠨ ᠦ ᠨᠣᠮ ᠪᠦᠲᠦᠭᠡᠯ ᠳ᠋ᠥ ︽ ᠴᠠᠩᠴᠦ᠋ᠨ ᠪᠣᠮᠪᠣ ᠴᠢᠩᠭᠢᠰ ᠬᠠᠭᠠᠨ ᠲᠠᠢ ᠠᠭᠤᠯᠵᠠᠬᠰᠠᠨ ᠨᠢ︾ ᠭᠡᠳᠡᠭ ᠠᠭᠤᠯᠭᠠ ᠶᠢ ᠵᠠᠪᠠᠯ ᠳᠤᠷᠠᠳᠤᠨᠠ᠃ ᠴᠢᠩᠭᠢᠰ ᠬᠠᠭᠠᠨ ᠲᠦᠷᠤ ᠶᠢ ᠵᠠᠰᠠᠬᠤ ᠤᠬᠠᠭᠠᠨ᠂ ᠤᠷᠲᠤ ᠨᠠᠰᠤᠯᠠᠬᠤ ᠤᠪᠠᠳᠢᠰ ᠢ ᠵᠢᠭᠠᠯᠭᠠᠬᠤ ᠭᠡᠵᠤ ᠬᠦᠭᠰᠢᠨ ᠪᠣᠮᠪᠤ ᠶᠢ ᠤᠷᠢᠭᠰᠠᠨ ᠭᠡᠨᠡ᠃ ᠪᠤᠮᠪᠤ ᠪᠠᠷ ᠴᠢᠩᠭᠢᠰ ᠬᠠᠭᠠᠨ ᠳ᠋ᠥ ︽ ᠠᠯᠠᠵᠤ ᠬᠢᠳᠤᠬᠤ ᠪᠠᠨ ᠪᠠᠭᠠᠰᠬᠠᠵᠤ᠂ ᠢᠷᠭᠡᠳ ᠢ ᠬᠠᠢᠷᠠᠯᠠᠬᠤ︾ ᠰᠠᠨᠠᠭᠤᠯᠭᠠ ᠶᠢ ᠥᠭᠭᠦᠭᠰᠡᠨ ︵ ᠵᠡᠭᠦᠯᠲᠡ1︶ ᠡᠴᠡ ᠮᠣᠩᠭᠣᠯ ᠴᠡᠷᠢᠭ ᠦᠨ ᠠᠯᠠᠵᠤ ᠬᠢᠳᠤᠬᠤ ᠪᠠᠭᠠᠰᠴᠤ ᠡᠵᠡᠯᠡᠭᠳᠡᠭᠰᠡᠨ ᠣᠷᠣᠨ ᠤ ᠠᠷᠠᠳ ᠢᠷᠭᠡᠳ ᠦᠨ ᠦᠬᠦᠯ ᠦᠷᠡᠭᠳᠡᠯ ᠢ ᠪᠠᠭᠠᠰᠬᠠᠭᠰᠠᠨ ︵ᠵᠡᠭᠦᠯᠲᠡ2︶ ᠭᠡᠨᠡ᠃ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠴᠠᠩᠴᠦ᠋ᠨ ᠪᠣᠮᠪᠣ ᠨᠢ ᠴᠢᠩᠭᠢᠰ ᠬᠠᠭᠠᠨ ᠳ᠋ᠥ ᠲᠦᠷᠤ ᠶᠢ ᠵᠠᠰᠠᠬᠤ ᠤᠬᠠᠭᠠᠨ ᠢ ᠵᠢᠭᠠᠬᠰᠠᠨ ᠵᠥᠪᠯᠡᠭᠴᠢ᠂ ᠤᠯᠤᠰ ᠲᠦᠷᠤ ᠶᠢᠨ ᠵᠢᠳᠬᠦᠯᠲᠡᠨ᠂ ᠮᠣᠩᠭᠣᠯ ᠴᠡᠷᠢᠭ ᠦᠨ ᠲᠡᠮᠤᠷ ᠲᠤᠭᠤᠷᠠᠢ ᠠᠴᠠ ᠬᠢᠲᠠᠳ ᠢ ᠠᠪᠤᠷᠠᠭᠰᠠᠨ ᠪᠠᠭᠠᠳᠤᠷ ᠪᠣᠯᠣᠭᠠᠳ᠂ ᠡᠢᠮᠤ ᠰᠠᠨᠠᠭᠠ ᠡᠨᠡ ᠰᠡᠳᠤᠪ ᠢᠶᠠᠷ ᠮᠠᠰᠲ᠋ᠧᠷ ᠳ᠋ᠣᠺᠲ᠋ᠣᠷ ᠤᠨ ᠴᠤᠯᠠ ᠬᠠᠮᠠᠭᠠᠯᠠᠬᠰᠠᠳ ᠬᠡᠴᠢᠨᠡᠨ ᠭᠠᠷᠤᠭᠰᠠᠨ ᠢ ᠪᠦᠦ ᠮᠡᠳᠡ᠂ ᠣᠢᠷᠠ ᠶᠢᠨ ᠵᠢᠯ ᠤᠳ ᠲᠦ ᠪᠦᠷ ᠪᠡᠶᠡ ᠳᠠᠭᠠᠭᠠᠭᠰᠠᠨ ᠰᠤᠳᠤᠯᠤᠯ ᠪᠣᠯᠣᠨ ᠬᠦᠭᠵᠢᠵᠡᠢ᠃ 2013 ᠣᠨ ᠳ᠋ᠥ ᠬᠢᠲᠠᠳ ᠤᠳ ︽ ᡁᠢ ᠱᠠ ᠯᠢᠩ︾ ︵ ᠵᠡᠭᠦᠯᠲᠡ 3︶ ᠬᠡᠮᠡᠬᠦ ᠺᠢᠨᠤ ᠦᠢᠯᠡᠳᠴᠦ ᠲᠡᠭᠡᠷᠡᠬᠢ ᠰᠠᠨᠠᠭᠠ ᠶᠢ ᠳᠡᠯᠭᠡᠴᠡᠨ ᠦ ᠤᠷᠠᠯᠢᠭ ᠢᠶᠠᠷ ᠰᠤᠷᠲᠠᠯᠴᠢᠯᠠᠭᠰᠠᠨ ᠪᠠᠢᠨᠠ᠃ ᠢᠩᠬᠢᠭᠡᠳ ᠠᠢᠮᠠᠭ ᠤᠨ ᠲᠦᠷᠦᠭᠦᠤ ᠠᠴᠠ ᠶᠡᠬᠡ ᠬᠠᠭᠠᠨ ᠪᠣᠯᠲᠠᠯᠠ ᠪᠠᠭᠰᠢ ᠪᠠᠢᠭᠰᠠᠨ ᠦᠭᠡᠢ᠂ ᠴᠡᠷᠢᠭ ᠤᠯᠤᠰ ᠲᠦᠷᠤ ᠶᠢᠨ ᠲᠡᠭᠷᠢᠯᠢᠭ ᠠᠪᠢᠶᠠᠰᠲᠠᠨ ᠲᠡᠮᠤᠵᠢᠨ ᠴᠢᠩᠭᠢᠰ ᠬᠠᠭᠠᠨ ᠮᠢᠨᠢ ᠲᠡᠭᠷᠢ ᠳ᠋ᠥ ᠬᠠᠯᠢᠭᠠᠳ ᠬᠡᠳᠤᠨ ᠵᠠᠭᠤᠨ ᠵᠢᠯ ᠪᠣᠯᠣᠭᠰᠠᠨ ᠤ ᠲᠠᠷᠠᠭᠠ ᠴᠠᠩᠴᠦ᠋ᠨ ᠬᠡᠮᠡᠬᠦ ᠬᠢᠲᠠᠳ ᠪᠠᠭᠰᠢ ᠲᠠᠢ ᠪᠣᠯᠬᠣ ᠨᠢ ᠲᠡᠷᠡ᠃
ᠵᠦᠪᠬᠡᠨ ᠬᠢᠲᠠᠳ ᠤᠳ ᠢᠩᠬᠢᠵᠤ ᠪᠢᠴᠢᠭᠰᠡᠨ ᠪᠣᠯ ᠶᠠᠭᠠᠬᠢᠬᠤ ᠪᠤᠢ ᠳ᠋ᠠ᠂ ᠤᠭ ᠠᠴᠠ ᠪᠠᠨ ᠬᠢᠲᠠᠳ ᠲᠦ ᠲᠡᠤᠬᠡ ᠶᠢᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠭᠡᠵᠤ ᠪᠠᠢᠳᠠᠭ ᠦᠭᠡᠢ᠂ ᠵᠦᠪᠬᠡᠨ ᠲᠡᠤᠬᠡ ᠶᠢᠨ ᠤᠷᠠᠨ ᠵᠤᠬᠢᠶᠠᠯ ᠪᠠᠢᠳᠠᠭ ᠠᠴᠠ ᠬᠤᠢᠰᠢ᠃ ᠬᠠᠷᠠᠮᠰᠠᠯᠳᠠᠢ ᠨᠢ ᠮᠠᠨ ᠤ ᠮᠣᠩᠭᠣᠯ ᠲᠡᠤᠬᠡᠴᠢᠳ ᠴᠤ ᠶᠡᠬᠡ ᠬᠠᠭᠠᠨ ᠬᠦᠭᠰᠢᠨ ᠪᠣᠮᠪᠣ ᠬᠤᠶᠠᠷ ᠤᠨ ᠠᠭᠤᠯᠵᠠᠯᠳᠠ ᠶᠢ ᠬᠢᠲᠠᠳ ᠤᠨ ᠵᠣᠭᠢᠶᠠᠮᠠᠯ ᠰᠠᠨᠠᠭᠠ ᠲᠠᠢ ᠭᠠᠢᠬᠠᠮᠠᠷ ᠠᠳᠠᠯᠢᠬᠠᠨ ︵ᠪᠤᠶᠤ ᠨᠡᠢᠴᠡᠭᠦᠯᠦᠨ︶ ᠲᠠᠢᠯᠪᠤᠷᠢᠯᠠᠳᠠᠭ ᠪᠣᠯᠵᠠᠢ᠃ ᠰᠠᠢᠰᠢᠶᠠᠯ ᠭᠤᠸᠠᠢ ᠶᠢᠨ ᠠᠪᠤᠷᠭᠤ ᠪᠦᠲᠦᠭᠡᠯ ︽ ᠴᠢᠩᠭᠢᠰ ᠬᠠᠭᠠᠨ ᠤ ᠲᠤᠪᠴᠢᠶᠡᠨ︾ ᠳᠦ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢ ︽ ᠠᠯᠤᠰ ᠬᠤᠯᠠ ᠶᠢᠨ ᠪᠣᠳᠣᠯᠭᠠ ᠲᠠᠢ ᠲᠦᠷᠤ ᠶᠢᠨ ᠵᠢᠳᠬᠦᠯᠲᠡᠨ︾ ᠭᠡᠵᠤ ᠦᠨᠡᠯᠡᠭᠡᠳ ︽ ᠴᠢᠩᠭᠢᠰ ᠬᠠᠭᠠᠨ ᠤ ᠲᠠᠯᠠ ᠠᠴᠠ ᠦᠵᠡᠪᠡᠯ ᠡᠩᠬᠡ ᠲᠦᠷᠤ ᠶᠢ ᠡᠮᠬᠢᠯᠡᠨ ᠵᠠᠰᠠᠬᠤ ᠳ᠋ᠥ ᠡᠷᠳᠡᠮᠳᠡᠨ ᠮᠡᠷᠭᠡᠳ ᠬᠡᠷᠡᠭ ᠲᠠᠢ ᠪᠠᠢᠵᠠᠢ︾ ᠬᠡᠮᠡᠨ ᠲᠡᠮᠳᠡᠭᠯᠡᠭᠰᠡᠨ ᠨᠢ ︽ᠲᠦᠷᠤ ᠶᠢ ᠵᠠᠰᠠᠬᠤ ᠤᠬᠠᠭᠠᠨ ᠢ ᠠᠰᠠᠭᠤᠬᠤ ᠭᠡᠵᠤ ᠤᠷᠢᠭᠰᠠᠨ︾ ᠬᠡᠮᠡᠬᠦ ᠬᠢᠲᠠᠳ ᠲᠠᠢᠯᠪᠤᠷᠢ ᠳ᠋ᠥ ᠶᠠᠪ ᠴᠠᠪ ᠨᠡᠢᠴᠡᠭᠦᠯᠦᠭᠰᠡᠨ ᠪᠠᠢᠨᠠ᠃ ᠵᠠᠯᠭᠠᠭᠠᠳ ᠴᠢᠩᠭᠢᠰ ᠬᠠᠭᠠᠨ ᠤ ︽ ᠴᠠᠩᠴᠦ᠋ᠨ ᠠᠷᠰᠢ ᠶᠢ ᠤᠷᠢᠭᠰᠠᠨ ᠵᠣᠷᠢᠯᠭᠠ ᠳᠦ ᠨᠢ ᠪᠠᠰᠠ ᠤᠷᠲᠤ ᠨᠠᠰᠤᠯᠠᠬᠤ ᠶᠤᠰᠤᠨ ᠢ ᠡᠷᠢᠭᠰᠡᠨ ᠨᠢᠭᠡᠨ ᠠᠭᠤᠯᠭᠠ ᠪᠤᠢ᠂ ᠭᠡᠪᠡᠴᠤ ᠲᠡᠷᠡ ᠨᠢ ᠴᠢᠬᠤᠯᠠ ᠪᠤᠰᠤ︾ ︵ ᠵᠡᠭᠦᠯᠲᠡ 4︶ ᠭᠡᠵᠤ ᠴᠣᠬᠣᠭᠰᠠᠨ ᠨᠢ ᠶᠡᠬᠡ ᠬᠠᠭᠠᠨ ᠤ ᠬᠦᠭᠰᠢᠨ ᠪᠣᠮᠪᠣ ᠶᠢ ᠤᠷᠢᠭᠰᠠᠨ ᠴᠤᠷ ᠤᠨ ᠭᠠᠭᠴᠠ ᠵᠣᠷᠢᠯᠭᠠ ᠶᠢ ᠦᠭᠡᠢᠰᠭᠡᠭᠡᠳ᠂ ᠠᠭᠤᠯᠵᠠᠯᠳᠠ ᠶᠢ ᠴᠡᠪᠡᠷ ᠤᠯᠤᠰ ᠲᠦᠷᠤ᠂ ᠡᠩ ᠲᠠᠢᠪᠤᠩ ᠤᠨ ᠰᠡᠳᠤᠪ ᠲᠡᠰᠢ ᠬᠦᠰᠢᠵᠠᠢ᠃ ᠠᠺᠠᠳᠧᠮᠢᠴᠢ ᠴ᠂ ᠲᠠᠯᠠᠢ ᠭᠤᠸᠠᠢ ᠶᠢᠨ ᠰᠣᠳᠣᠨ ᠰᠢᠭᠦᠮᠵᠢᠯᠡᠯ ᠤᠳ ᠢᠶᠡᠷ ᠢᠶᠡᠨ ᠣᠨᠴᠠᠯᠢᠭᠳᠠᠭᠰᠠᠨ ᠭᠤᠷᠪᠠᠨ ᠪᠤᠳ᠋ ᠲᠠᠢ ︽ᠮᠣᠩᠭᠣᠯ ᠤᠨ ᠲᠡᠤᠬᠡ︾ ᠳᠤ ᠴᠢᠩᠭᠢᠰ ᠬᠠᠭᠠᠨ ︽ ᠶᠡᠬᠡ ᠭᠦᠷᠦᠨ ᠢ ᠤᠳᠤᠷᠢᠳᠬᠤ ᠠᠷᠭᠠ ᠤᠬᠠᠭᠠᠨ︾ ︵ᠵᠡᠭᠦᠯᠲᠡ 5︶ ᠵᠡᠷᠭᠡ ᠶᠢ ᠠᠰᠠᠭᠤᠬᠰᠠᠨ ᠭᠡᠵᠡᠢ᠃ ᠮᠣᠩᠭᠣᠯ ᠤᠨ ᠲᠡᠤᠬᠡ ᠶᠢᠨ ᠰᠤᠳᠤᠯᠤᠯ ᠳᠤ ᠠᠰᠢᠳᠠ ᠶᠢᠨ ᠣᠳᠣ ᠪᠣᠯᠣᠨ ᠭᠢᠯᠠᠯᠵᠠᠭᠰᠠᠨ ᠦᠷᠯᠦᠭ ᠦᠳ ᠮᠢᠨᠢ ᠢᠩᠬᠢᠵᠤ ᠪᠢᠴᠢᠭᠰᠡᠨ ᠪᠠᠢᠬᠤ ᠶᠤᠮ ᠴᠢᠨᠢ ᠡᠭᠡᠯ ᠵᠢᠷ ᠦᠨ ᠬᠦᠮᠦᠰ ᠤᠨ ᠣᠯᠠᠩᠬᠢ ᠨᠢ ᠡᠨᠡ ᠶᠠᠩᠵᠤ ᠪᠠᠷ ᠣᠢᠯᠠᠭᠠᠵᠤ᠂ ᠢᠲᠡᠭᠡᠵᠤ᠂ ᠪᠢᠴᠢᠵᠤ ᠰᠣᠷᠲᠠᠯᠴᠢᠯᠠᠵᠤ ᠪᠠᠢᠭᠠ ᠪᠠᠢᠯ ᠦᠭᠡᠢ ᠳ᠋ᠠ᠃ ᠢᠩᠬᠢᠭᠡᠳ ᠡᠨᠡ ᠦᠭᠦᠯᠡᠯ ᠢ ᠪᠢᠴᠢᠬᠦ ᠱᠠᠭᠠᠷᠳᠠᠯᠭᠠ ᠲᠥᠷᠥᠯᠡ᠃
ᠴᠢᠩᠭᠢᠰ ᠬᠠᠭᠠᠨ ᠤ ᠳᠠᠭᠤᠳᠠᠯᠭᠠ ᠪᠡᠷ ᠴᠠᠩᠴᠦ᠋ᠨ ᠪᠣᠮᠪᠣ ᠭᠡᠭᠴᠢ ᠲᠤᠮᠳᠠᠳᠤ ᠠᠽᠢᠶᠠ ᠳ᠋ᠥ ᠬᠦᠷᠴᠤ ᠶᠡᠬᠡ ᠬᠠᠭᠠᠨ ᠲᠠᠢ ᠠᠭᠤᠯᠵᠠᠭᠰᠠᠨ ᠬᠡᠷᠡᠭ ᠪᠣᠯ ᠦᠨᠡᠨ᠃ ᠴᠠᠩᠴᠦ᠋ᠨ ᠪᠣᠮᠪᠣ ᠴᠢᠤ ᠴᠦ᠋ ᠵᠢᠢ ᠭᠡᠭᠴᠢ ᠬᠢᠲᠠᠳ ᠤᠨ ᠲᠣᠭᠠ ᠲᠣᠮᠣᠰᠢ ᠦᠭᠡᠢ ᠣᠯᠠᠨ ᠪᠣᠮᠪᠣ ᠠᠷᠰᠢ ᠶᠢᠨ ᠨᠢᠭᠡᠨ᠂ ᠠᠯᠳᠠᠨ ᠤᠯᠤᠰ ᠲᠤ ᠡᠭᠦᠰᠦᠭᠰᠡᠨ ᠴᠢᠤᠸᠠᠨ ᠵᠸᠠ ᠳ᠋ᠣᠤ ᠬᠡᠮᠡᠬᠦ ᠪᠤᠮᠪᠤ ᠶᠢᠨ ᠰᠤᠷᠳᠠᠬᠤᠨ ᠤ ᠨᠢᠭᠡᠨ ᠰᠠᠯᠪᠤᠷᠢ ᠶᠢ ᠳᠡᠯᠭᠡᠷᠡᠭᠦᠯᠦᠭᠰᠡᠨ ᠭᠠᠪᠢᠶᠠᠲᠠᠨ ᠭᠡᠳᠡᠭ ᠢᠶᠡᠷ ᠢᠶᠡᠨ ᠪᠣᠮᠪᠣ ᠶᠢᠨ ᠲᠡᠤᠬᠡᠨ ᠳ᠋ᠥ ᠴᠢᠬᠤᠯᠠ ᠪᠠᠢᠷᠢ ᠡᠵᠡᠯᠡᠳᠡᠭ ᠶᠤᠮ ᠪᠠᠢᠨᠠ᠃ ᠲᠡᠭᠦᠨ ᠦ ᠲᠠᠭᠠᠭᠤᠯᠵᠤ ᠶᠠᠪᠤᠭᠰᠠᠨ 19 ᠱᠠᠪᠢ ᠶᠢᠨ ᠨᠢᠭᠡᠨ ᠪᠣᠯᠬᠣ ᠯᠢ ᡁᠢ ᠴᠠᠩ ᠭᠡᠭᠴᠢ ᠵᠠᠮᠵᠢᠨ ᠲᠡᠮᠳᠡᠭᠯᠡᠯ ᠬᠥᠲᠥᠯᠵᠦ ︽ ᠴᠠᠩᠴᠦ᠋ᠨ ᠪᠣᠮᠪᠣ ᠪᠠᠷᠠᠭᠤᠨ ᠳᠤ ᠵᠤᠷᠴᠢᠭᠰᠠᠨ ᠲᠡᠮᠳᠡᠭᠯᠡᠯ︾ ᠬᠡᠮᠡᠬᠦ ᠲᠤᠪᠬᠢᠮᠠᠯ ᠪᠢᠴᠢᠵᠤ ᠦᠯᠡᠳᠡᠭᠡᠵᠡᠢ᠃
72 ᠨᠠᠰᠤᠳᠠᠢ ᠬᠦᠭᠰᠢᠨ ᠪᠣᠮᠪᠣ ᠮᠣᠷᠢ ᠯᠠᠭᠤᠰᠠ ᠬᠠᠰᠠᠭ ᠲᠡᠷᠭᠡ ᠪᠡᠷ ᠵᠡᠭᠦᠨ ᠠᠽᠢᠶᠠ ᠶᠢᠨ ᠱᠠᠨᠳᠦ᠋ᠩ ᠤᠨ ᠮᠤᠬᠤᠷ ᠠᠴᠠ ᠭᠠᠷᠴᠤ ᠲᠤᠮᠳᠠᠳᠤ ᠠᠽᠢᠶᠠ ᠶᠢᠨ ᠪᠠᠷᠠᠭᠤᠨ ᠤᠷᠲᠤ ᠦᠵᠦᠭᠦᠷ ᠬᠦᠷᠲᠡᠯᠡ ᠠᠶᠠᠯᠠᠨᠠ ᠭᠡᠳᠡᠭ ᠬᠡᠨ ᠰᠣᠨᠣᠰᠤᠭᠰᠠᠨ ᠴᠤ ᠭᠠᠢᠬᠠᠮᠠᠷ᠃ ᠵᠦᠪᠬᠡᠨ ᠨᠢᠭᠡ ᠲᠠᠯᠠ ᠳᠠᠭᠠᠨ ᠮᠠᠤ ᠶᠢᠨ ᠤᠯᠠᠭᠠᠨ ᠠᠷᠮᠢ ᠶᠢᠨ ᠤᠷᠲᠤ ᠠᠶᠠᠯᠠᠯ ᠭᠡᠳᠡᠭ ᠡᠴᠡ ᠲᠠᠲᠠᠵᠤ ᠬᠡᠯᠡᠬᠦ ᠳᠦ ᠭᠤᠷᠪᠠᠨ ᠳᠠᠬᠢᠨ ᠤᠷᠲᠤ ︵ ᠵᠡᠭᠦᠯᠲᠡ 6︶ ᠠᠵᠢ᠃
ᠶᠠᠪᠤᠭᠰᠠᠨ ᠵᠠᠮ ᠱᠣᠭᠤᠮ ᠢ ᠨᠢ ᠶᠡᠬᠡᠪᠴᠢᠯᠡᠨ ᠵᠢᠷᠤᠭᠯᠠᠪᠠᠰᠤ ᠂ ︵ᠣᠳᠣ ᠶᠢᠨ ᠨᠡᠷᠡᠯᠡᠯ ᠢᠶᠡᠷ︶ ᠱᠠᠨᠳᠦ᠋ᠩ ᠠᠴᠠ ᠭᠠᠷᠴᠤ ᠮᠣᠩᠭᠣᠯ ᠳᠦ ᠡᠵᠡᠯᠡᠭᠳᠡᠭᠡᠳ ᠪᠠᠢᠭᠰᠠᠨ ᠪᠡᠭᠡᠵᠢᠩ ᠢᠶᠠᠷ ᠳᠠᠭᠠᠷᠢᠨ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠬᠠᠪᠢ ᠠᠴᠠ ᠵᠡᠭᠦᠨ ᠬᠣᠢᠰᠢ ᠰᠢᠯᠢ ᠶᠢᠨ ᠭᠣᠣᠯ᠂ ᠵᠤᠤ ᠤᠳᠠ ᠶᠢᠨ ᠨᠤᠲᠤᠭ ᠢ ᠥᠩᠭᠡᠷᠡᠨ ᠬᠦᠯᠦᠨ ᠲᠠᠯᠠᠢ ᠳᠤ ᠬᠦᠷᠴᠠᠢ᠃ ᠬᠡᠷᠯᠣᠨ ᠭᠣᠣᠯ ᠢ ᠳᠠᠭᠠᠵᠤ ᠭᠤᠷᠪᠠᠨ ᠭᠤᠣᠯ ᠤᠨ ᠡᠬᠢᠨ ᠬᠦᠷᠦᠭᠡᠳ ᠲᠡᠨᠳᠡ ᠡᠴᠡ ᠣᠳᠣ ᠶᠢᠨ ᠮᠣᠩᠭᠣᠯ ᠤᠯᠤᠰ ᠤᠨ ᠨᠤᠲᠤᠭ ᠳᠡᠪᠢᠰᠭᠡᠷ ᠢ ᠪᠠᠷᠠᠭᠤᠨᠰᠢ ᠰᠢᠪᠳᠤᠯᠵᠤ ᠠᠯᠳᠠᠢ ᠠᠭᠤᠯᠠᠨ ᠳᠤ ᠲᠤᠯᠵᠤ ᠣᠴᠢᠭᠰᠠᠨ ᠪᠠᠢᠨᠠ᠃ ᠡᠨᠳᠡ ᠪᠣᠮᠪᠣ ᠶᠢᠨ ᠰᠦᠮᠡ ᠪᠣᠰᠬᠠᠵᠤ ᠶᠢᠰᠤᠨ ᠱᠠᠪᠢ ᠪᠠᠨ ᠣᠷᠬᠢᠭᠠᠳ ᠠᠶᠠᠯᠠᠯ ᠤᠨ ᠬᠢᠨᠢ ᠬᠠᠮᠤᠭ ᠤᠨ ᠪᠡᠷᠬᠡ ᠪᠠᠷᠲᠠᠭᠠᠲᠤ ᠬᠡᠰᠡᠭ ᠪᠠᠢᠬᠤ ᠭᠡᠵᠤ ᠰᠠᠨᠠᠭᠳᠠᠬᠤ ᠠᠯᠲᠠᠢ ᠶᠢᠨ ᠨᠢᠷᠤᠭᠤ ᠶᠢ ᠬᠣᠪᠳᠣ ᠶᠢᠨ ᠬᠢᠵᠠᠭᠠᠷ ᠲᠦ ᠳᠠᠪᠠᠵᠤ ᠬᠥᠨᠳᠡᠯᠡᠳᠤᠨ ᠲᠣᠰᠣᠭᠰᠠᠨ ᠵᠦᠩᠭᠠᠷ ᠤᠨ ᠡᠯᠡᠰᠤ ᠶᠢ ᠬᠥᠪᠡᠭᠡᠯᠡᠨ ᠵᠦᠰᠡᠭᠡᠳ᠂ ᠲᠡᠭᠷᠢ ᠠᠭᠤᠯᠠ ᠶᠢᠨ ᠠᠷᠤ ᠪᠡᠯ ᠢᠶᠡᠷ ᠠᠰᠠ ᠪᠠᠷᠠᠭᠤᠨᠰᠢ ᠵᠠᠮᠨᠠᠵᠠᠢ᠃ ᠲᠡᠭᠷᠢ ᠠᠭᠤᠯᠠ ᠶᠢ ᠣᠷᠢᠶᠠᠵᠤ ᠭᠠᠷᠤᠭᠰᠠᠨ ᠢᠶᠠᠨ ᠪᠠᠷᠠᠭᠤᠨ ᠤᠷᠤᠭᠰᠢ ᠴᠢᠭᠯᠡᠨ ᠺᠢᠷᠭᠢᠰᠲ᠋ᠠᠨ᠂ ᠲᠠᠵᠢᠺᠰᠲ᠋ᠠᠨ ᠤ ᠠᠭᠤᠯᠠᠷᠬᠠᠭ ᠣᠷᠣᠨ ᠢ ᠮᠣᠩᠭᠣᠯ ᠴᠡᠷᠢᠭ ᠦᠨ ᠬᠠᠮᠠᠭᠠᠯᠠᠯᠲᠠ ᠲᠠᠢ ᠪᠠᠷ ᠲᠤᠭᠤᠯᠵᠤ ᠰᠠᠮᠠᠷᠺᠠᠨᠲ ᠳ᠋ᠥ ᠬᠦᠷᠴᠤ ᠤᠴᠢᠵᠠᠢ᠃ ᠴᠢᠩᠭᠢᠰ ᠬᠠᠭᠠᠨ ᠵᠠᠪ ᠮᠠᠭᠤᠲᠠᠢ ᠪᠠᠢᠭᠰᠠᠨ ᠲᠤᠯᠠ ᠪᠣᠮᠪᠣ ᠡᠨᠳᠡ ᠨᠢᠭᠡ ᠡᠪᠤᠯ ᠠᠮᠠᠷᠠᠭᠠᠳ ᠬᠣᠢᠲᠤ ᠬᠠᠪᠤᠷ ᠨᠢ ᠠᠬᠢᠨ ᠬᠣᠷᠢᠭᠠᠳ ᠬᠣᠨᠣᠭ ᠵᠠᠮᠨᠠᠵᠤ ᠪᠠᠢᠵᠤ ᠠᠹᠭᠠᠨᠢᠰᠲ᠋ᠠᠨ ᠤ ᠬᠣᠢᠲᠤ ᠬᠡᠰᠡᠭ ᠲᠦ ᠬᠦᠷᠴᠦ ᠶᠡᠬᠡ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠳᠤ ᠪᠠᠷᠠᠯᠬᠠᠪᠠ᠃ ᠠᠶᠠᠯᠠᠯ ᠨᠢ ᠨᠢᠭᠡ ᠲᠠᠯᠠ ᠳᠠᠭᠠᠨ ᠨᠢᠭᠡ ᠵᠢᠯ᠂ ᠲᠤᠮᠳᠠᠳᠤ ᠠᠽᠢᠶᠠ ᠳ᠋ᠥ ᠵᠢᠯ ᠪᠠᠢᠭᠰᠠᠨ ᠲᠠᠢ ᠪᠠᠨ ᠬᠦᠭᠰᠢᠨ ᠪᠣᠮᠪᠣ ᠪᠡᠷ ᠴᠢᠩᠭᠢᠰ ᠬᠠᠭᠠᠨ ᠲᠠᠢ ᠵᠣᠯᠭᠠᠬᠤ ᠳ᠋ᠥ ᠪᠦᠬᠦᠯᠢ ᠪᠦᠲᠦᠨ ᠭᠤᠷᠪᠠᠨ ᠣᠨ ᠵᠠᠷᠤᠴᠠᠭᠤᠯᠤᠭᠰᠠᠨ ᠠᠵᠢ᠃
ᠴᠢᠩᠭᠢᠰ ᠬᠠᠭᠠᠨ ᠬᠢᠭᠡᠳ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠠᠭᠤᠯᠵᠠᠯᠲᠠ ᠶᠢ ᠨᠢᠭᠲᠠᠯᠠᠬᠤ ᠳ᠋ᠥ ᠠᠰᠢᠭᠯᠠᠵᠤ ᠪᠣᠯᠬᠤ ᠬᠡᠷᠡᠭᠯᠡᠭᠳᠡᠬᠦᠨ ᠬᠣᠶᠠᠷ ᠪᠠᠢᠨᠠ᠂ ᠨᠢᠭᠡ ᠨᠢ ᠯᠢ ᡁᠢ ᠴᠠᠩ ᠤᠨ ︽ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠪᠠᠷᠠᠭᠤᠨ ᠳᠤ ᠵᠣᠷᠴᠢᠭᠰᠠᠨ ᠲᠡᠮᠳᠡᠭᠯᠡᠯ︾ ︵ᠵᠡᠭᠦᠯᠲᠡ 7︶᠂ ᠨᠦᠭᠦᠭᠡ ᠨᠢ ᠶᠧᠯᠸᠢ ᠴᠦᠰᠠᠢ ᠶᠢᠨ ᠴᠢᠩᠭᠢᠰ ᠬᠠᠭᠠᠨ ᠤ ᠵᠠᠷᠯᠢᠭ ᠢᠶᠠᠷ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠬᠡᠯᠡᠭᠰᠡᠨ ᠭᠣᠣᠯ ᠵᠤᠢᠯ ᠢ ᠬᠢᠲᠠᠳ ᠬᠡᠯᠡ ᠪᠡᠷ ᠲᠡᠮᠳᠡᠭᠯᠡᠭᠰᠡᠨ ︽ᠰᠤᠷᠭᠠᠯ ᠢ ᠲᠠᠢᠯᠪᠤᠷᠢᠯᠠᠭᠰᠠᠨ ᠬᠤᠷᠠᠯ ᠤᠨ ᠲᠡᠮᠳᠡᠭᠯᠡᠯ︾ ︵ ᠵᠡᠭᠦᠯᠲᠡ 8︶ ᠪᠣᠯᠣᠨᠠ᠃ ᠣᠳᠣ ᠦᠪᠡᠷ ᠦᠨ ᠲᠡᠪᠰᠢᠭᠦᠯᠬᠦ ᠭᠡᠰᠡᠨ ᠭᠣᠣᠯ ᠵᠤᠢᠯ ᠳᠡᠬᠡᠨ ᠣᠷᠣᠶᠠ᠃
ᠨᠢᠭᠡ᠂ ᠴᠢᠩᠭᠢᠰ ᠬᠠᠭᠠᠨ ᠪᠠᠷ ᠴᠠᠩᠴᠦ᠋ᠨ ᠪᠣᠮᠪᠤ ᠠᠴᠠ ︽ᠲᠦᠷᠤ ᠶᠢ ᠵᠠᠰᠠᠬᠤ ᠤᠬᠠᠭᠠᠨ ᠢ ᠠᠰᠠᠭᠤᠬᠰᠠᠨ︾᠂ ᠴᠠᠩᠴᠦ᠋ᠨ ᠪᠣᠮᠪᠣ ᠨᠢ ᠴᠢᠩᠭᠢᠰ ᠬᠠᠭᠠᠨ ᠳᠤ ︽ ᠠᠯᠠᠵᠤ ᠬᠢᠳᠤᠬᠤ ᠪᠠᠨ ᠪᠠᠭᠠᠰᠬᠠᠬᠤ ᠶᠢ ᠢᠳᠬᠠᠭᠰᠠᠨ︾ ᠶᠠᠪᠤᠳᠠᠯ ᠪᠠᠢᠨᠠ ᠦᠦ︖
ᠯᠢ ᡁᠢ ᠴᠠᠩ ᠤᠨ ᠲᠣᠪᠬᠢᠮᠠᠯ ᠳᠦ ᠠᠩᠬᠠᠨ ᠤ ᠠᠭᠤᠯᠵᠠᠯᠲᠠ ᠶᠢ ᠡᠢᠨ ᠬᠦ ᠲᠡᠮᠳᠡᠭᠯᠡᠵᠡᠢ᠄
ᠴᠠᠭ ᠠᠨᠤ ᠲᠦᠷᠪᠡᠨ ᠰᠠᠷᠠ ᠶᠢᠨ ᠲᠠᠪᠤᠨ ᠤ ᠡᠳᠤᠷ ᠪᠤᠯᠠᠢ᠃ ᠪᠠᠭᠤᠳᠠᠯ ᠤᠨ ᠭᠠᠵᠠᠷ ᠢ ᠲᠣᠭᠲᠠᠮᠠᠭᠴᠠ ᠲᠡᠷᠤᠢ ᠡᠵᠡᠨ ᠳ᠋ᠣᠷ ᠵᠣᠯᠭᠠᠪᠠᠢ᠃ ᠡᠵᠡᠨ ᠲᠣᠬᠤᠨᠢᠭᠤᠯᠤᠨ ᠦᠭᠦᠯᠡᠭᠰᠡᠨ ᠢᠨᠤ᠂ ᠪᠣᠰᠣᠳ ᠤᠯᠤᠰ ᠣᠯᠠᠨᠳᠠ ᠵᠠᠯᠠᠭᠰᠠᠨᠠ ᠴᠦᠮ ᠡᠰᠡ ᠡᠴᠢᠵᠤ ᠡᠳᠤᠭᠡ ᠲᠦᠮᠡᠨ ᠭᠠᠵᠠᠷ ᠤᠨ ᠠᠯᠤᠰ ᠠᠴᠠ ᠡᠨᠳᠡ ᠢᠷᠡᠭᠰᠡᠨ ᠳ᠋ᠤᠷ ᠮᠢᠨᠤ ᠪᠡᠶᠡ ᠮᠠᠰᠢ ᠪᠠᠶᠠᠷᠯᠠᠪᠠᠢ᠃ ᠪᠠᠭᠰᠢ ᠬᠠᠷᠢᠭᠤ ᠦᠴᠢᠭᠰᠡᠨ ᠢᠨᠤ᠂ ᠬᠦᠳᠡᠬᠢ ᠪᠣᠮᠪᠣ ᠵᠠᠷᠯᠢᠭ ᠢᠶᠠᠷ ᠢᠷᠡᠭᠰᠡᠨ ᠢᠨᠤ ᠲᠡᠭᠷᠢ ᠶᠢᠨ ᠰᠠᠨᠠᠭᠠ ᠪᠤᠯᠠᠢ᠃ ᠡᠵᠡᠨ ᠪᠠᠶᠠᠰᠴᠤ ᠰᠠᠭᠤᠳᠠᠯ ᠬᠠᠢᠷᠠᠯᠠᠨ ᠢᠳᠡᠭᠡᠨ ᠬᠡᠰᠢᠭᠯᠡᠪᠡᠢ᠃ ᠲᠠᠷᠠᠭᠠ ᠨᠢ ᠡᠵᠡᠨ ︽ ᠠᠷᠰᠢ ᠶᠢᠨ ᠪᠡᠶᠡ ᠠᠯᠤᠰ ᠠᠴᠠ ᠢᠷᠡᠭᠡᠳ ᠶᠠᠮᠠᠷ ᠤᠷᠲᠤ ᠨᠠᠰᠤᠯᠠᠬᠤ ᠡᠮ ᠢᠶᠡᠷ ᠮᠡᠬᠦᠰ ᠬᠦᠮᠤᠨ ᠢ ᠲᠤᠰᠠᠯᠠᠮᠤᠢ︖︾ ᠬᠡᠮᠡᠨ ᠠᠰᠠᠭᠤᠬᠤᠢ ᠳ᠋ᠤᠷ ᠪᠠᠭᠰᠢ ᠦᠭᠦᠯᠡᠷᠦᠨ ︽ ᠠᠮᠢ ᠨᠠᠰᠤᠨ ᠢ ᠬᠠᠮᠠᠭᠠᠯᠠᠬᠤ ᠶᠣᠰᠤᠨ ᠪᠤᠢ᠂ ᠤᠷᠲᠤ ᠨᠠᠰᠤᠯᠠᠭᠤᠯᠬᠤ ᠡᠮ ᠦᠭᠡᠢ ᠪᠤᠯᠠᠢ︾ ᠬᠡᠮᠡᠪᠡ᠃ ᠡᠵᠡᠨ ᠲᠡᠭᠦᠨ ᠦ ᠦᠨᠡᠨᠴᠢ ᠶᠢ ᠰᠠᠢᠰᠢᠶᠠᠨ ᠡᠵᠡᠨ ᠦ ᠴᠡᠴᠡᠷ ᠦᠨ ᠵᠡᠭᠦᠨ ᠳ᠋ᠤᠷ ᠬᠣᠶᠠᠷ ᠮᠠᠢᠬᠠᠨ ᠪᠤᠰᠬᠠᠨ ᠰᠠᠭᠤᠯᠭᠠᠪᠠᠢ ︵ ᠵᠡᠭᠦᠯᠲᠡ 9︶᠃
ᠪᠣᠯᠣᠭᠰᠠᠨ ᠶᠠᠪᠤᠳᠠᠯ ᠢ ᠬᠠᠷᠠ ᠦᠭᠡ ᠪᠡᠷ ᠬᠡᠯᠡᠪᠡᠯ᠂ ᠴᠢᠩᠭᠢᠰ ᠬᠠᠭᠠᠨ ᠵᠢᠯ ᠶᠠᠪᠤᠵᠤ ᠢᠷᠡᠭᠰᠡᠨ ᠬᠤᠯᠠ ᠶᠢᠨ ᠵᠣᠴᠢᠨ ᠳᠠᠭᠠᠨ ᠰᠠᠭᠤᠳᠠᠯ ᠬᠠᠢᠷᠠᠯᠠᠨ ᠴᠠᠢ ᠣᠰᠤ ᠥᠭᠴᠦ ᠭᠡᠷ ᠦᠨ ᠡᠵᠡᠨ ᠦ ᠶᠣᠰᠤ ᠪᠠᠨ ᠭᠦᠢᠴᠡᠭᠡᠮᠡᠭᠴᠡ ︽ ᠤᠷᠳᠤ ᠨᠠᠰᠤᠯᠠᠭᠤᠯᠬᠤ ᠡᠮ ᠭᠡᠵᠤ ᠪᠠᠢᠳᠠᠭ ᠶᠤᠮ ᠦᠦ︖ ︾ ᠭᠡᠵᠤ ᠰᠢᠭᠤᠳ ︽ ᠭᠣᠣᠯ ᠰᠡᠳᠤᠪ︾ ᠲᠡᠬᠡᠨ ᠣᠷᠣᠵᠠᠢ᠃ ᠡᠨᠡ ᠨᠢ ᠬᠦᠭᠰᠢᠨ ᠪᠣᠮᠪᠣ ᠶᠢ ᠭᠠᠵᠠᠷ ᠤᠨ ᠬᠣᠯᠠ ᠠᠴᠠ ᠳᠠᠭᠤᠳᠠᠨ ᠠᠪᠴᠢᠷᠠᠭᠰᠠᠨ ᠤ ᠭᠠᠭᠴᠠ ᠵᠣᠷᠢᠯᠲᠠ ᠨᠢ ᠪᠠᠢᠭᠰᠠᠨ ᠪᠣᠯᠬᠣᠷ ᠲᠡᠷᠡ᠃ ᠵᠠᠯᠭᠠᠭᠠᠳ ᠴᠢᠩᠭᠢᠰ ᠬᠠᠭᠠᠨ ᠤ ᠣᠷᠴᠢᠭᠤᠯᠤᠭᠴᠢ ︽ ᠪᠠᠭᠰᠢ ᠶᠢ ᠲᠡᠭᠷᠢ ᠯᠣᠭᠠ ᠠᠳᠠᠯᠢ ᠮᠦᠩᠭᠡ ᠬᠦᠮᠤᠨ ᠬᠡᠮᠡᠨ ᠳᠠᠭᠤᠳᠠᠬᠤ ᠢᠨᠤ ᠦᠪᠡᠷ ᠢᠶᠡᠨ ᠨᠡᠷᠡᠯᠡᠭᠰᠡᠨ ᠦᠦ ᠪᠣᠰᠣᠳ ᠠᠴᠠ ᠡᠢᠨ ᠬᠦ ᠲᠠᠭᠤᠳᠠᠭᠰᠠᠨ ᠦᠦ︖︾ ᠭᠡᠵᠤ ᠠᠰᠠᠭᠤᠭᠰᠠᠨ ᠨᠢ ᠪᠠᠰᠠ ᠯᠡ ᠤᠷᠲᠤ ᠨᠠᠰᠤᠯᠠᠬᠤ ᠰᠡᠳᠤᠪ ᠡᠴᠡ ᠰᠠᠯᠤᠭᠠ ᠦᠭᠡᠢ ᠶᠤᠮ᠃ ᠪᠢᠳᠡ ᠳᠥᠷᠪᠡᠭᠦᠯᠡ ᠨᠢᠭᠡ ᠪᠠᠭᠰᠢ ᠳᠦ ᠱᠠᠪᠢ ᠣᠷᠣᠭᠠᠳ ᠭᠤᠷᠪᠠ ᠨᠢ ᠬᠠᠯᠢᠵᠤ ᠪᠢ ᠭᠠᠬᠴᠠᠭᠠᠷ ᠦᠯᠡᠳᠡᠭᠰᠡᠨ ᠲᠤᠯᠠ ᠬᠦᠮᠤᠰ ᠢᠩᠭᠢᠵᠤ ᠳᠠᠭᠤᠳᠠᠬᠤ ᠪᠣᠯᠣᠭᠰᠠᠨ ᠭᠡᠵᠤ ᠪᠣᠮᠪᠣ ᠲᠠᠢᠯᠪᠤᠷᠢᠯᠠᠵᠠᠢ᠃ ᠵᠠᠯᠭᠠᠭᠠᠳ ᠴᠢᠩᠭᠢᠰ ᠬᠠᠭᠠᠨ ᠠᠯᠳᠠᠢ ᠶᠢᠨ ᠨᠢᠷᠤᠭᠤᠨ ᠠᠴᠠ ᠡᠬᠢᠯᠡᠨ ᠪᠣᠮᠪᠣ ᠶᠢ ᠬᠠᠮᠠᠭᠠᠯᠠᠨ ᠶᠠᠪᠤᠭᠰᠠᠨ ᠲᠦᠰᠢᠮᠡᠯ ᠴᠢᠩᠬᠠᠢ ᠡᠴᠡ ︽ ᠪᠣᠮᠪᠣ ᠳᠤ ᠶᠠᠮᠠᠷ ᠴᠣᠯᠠ ᠡᠷᠭᠦᠮᠵᠢᠯᠡᠪᠡᠯ ᠵᠣᠬᠢᠬᠤ ᠪᠣᠢ︖︾ ᠭᠡᠵᠤ ᠠᠰᠠᠭᠤᠭᠠᠳ ᠲᠦᠰᠢᠮᠡᠯ ᠦᠨ ᠢᠶᠡᠨ ᠰᠠᠨᠠᠯ ᠪᠣᠯᠭᠠᠬᠰᠠᠨ ᠶᠣᠰᠤᠭᠠᠷ ︽ᠳᠡᠭᠡᠳᠤ ᠠᠷᠰᠢ ᠬᠡᠮᠡᠨ ᠲᠠᠭᠤᠳᠠᠰᠤᠭᠠᠢ︾ ︵ ᠵᠡᠭᠦᠯᠲᠡ 10︶ ᠭᠡᠵᠤ ᠵᠠᠷᠯᠢᠭ ᠪᠣᠯᠣᠭᠠᠳ ᠠᠭᠤᠯᠵᠠᠯᠲᠠ ᠦᠨᠳᠦᠷᠯᠡᠵᠡᠢ᠃
ᠴᠢᠩᠭᠢᠰ ᠬᠠᠭᠠᠨ ᠲᠦᠷᠤ ᠤᠯᠤᠰ᠂ ᠴᠡᠷᠢᠭ ᠲᠠᠢᠨ ᠤ ᠲᠠᠯᠠ ᠪᠡᠷ ᠨᠢᠭᠡ ᠦᠭᠡ ᠴᠦ ᠳᠤᠷᠠᠳᠤᠭᠰᠠᠨ ᠦᠭᠡᠢ ᠶᠤᠮ᠃
ᠬᠣᠶᠠᠳᠠᠭᠢ ᠠᠭᠤᠯᠵᠠᠯᠲᠠ ᠪᠠᠨ 4 ᠳ᠋ᠤᠭᠡᠷ ᠰᠠᠷᠠ ᠶᠢᠨ 14 ᠳᠦ ᠭᠡᠵᠤ ᠲᠣᠪᠯᠠᠭᠰᠠᠨ ᠪᠣᠯᠪᠠᠴᠤ ᠴᠢᠩᠭᠢᠰ ᠬᠠᠭᠠᠨ ᠪᠡᠶᠡ ᠪᠡᠷ ᠲᠠᠢᠨ ᠳᠤ ᠮᠣᠷᠳᠠᠬᠤ ᠪᠣᠯᠣᠭᠰᠠᠨ ᠲᠤᠯᠠ ᠪᠦᠲᠦᠨ 6 ᠰᠠᠷᠠ ᠬᠣᠢᠰᠢᠯᠠᠭᠤᠯᠵᠤ ᠠᠷᠪᠠᠳᠤᠭᠠᠷ ᠰᠠᠷᠠ ᠳᠤ ᠪᠣᠯᠭᠠᠨ ᠥᠭᠡᠷᠡᠴᠢᠯᠡᠭᠰᠡᠨ ᠡᠴᠡ ᠡᠪᠤᠭᠡᠨ ᠪᠤᠮᠪᠤ ︽ ᠡᠯᠵᠢᠭᠡ ᠶᠢ ᠲᠠᠰᠢᠭᠤᠷᠳᠠᠨ︾ ︵ ᠵᠡᠭᠦᠯᠲᠡ 12︶ ᠰᠠᠮᠠᠷᠺᠠᠨᠲ ᠳᠤ ᠪᠤᠴᠠᠵᠠᠢ᠃ ᠤᠳᠠᠭᠠᠨ ᠬᠦᠯᠢᠶᠡᠯᠭᠡᠵᠤ ᠠᠭᠤᠯᠵᠠᠭᠰᠠᠨ ᠬᠣᠶᠠᠳᠠᠭᠢ ᠠᠭᠤᠯᠵᠠᠯᠲᠠ ᠨᠢ ᠢᠳᠡᠭᠡ ᠶᠠᠳᠠᠮᠠ ᠳᠥᠭᠦᠮ᠂ ᠯᠢ ᡁᠢ ᠴᠠᠩ ᠤᠨ ᠲᠡᠮᠳᠡᠭᠯᠡᠯ ᠵᠤᠷᠢᠭᠤᠳᠠ ᠣᠷᠬᠢᠭᠰᠠᠨ ᠪᠢᠰᠢ ᠪᠣᠯ ︽ ᠲᠡᠷᠡ ᠰᠦᠨᠢ ᠠᠭᠤᠯᠵᠠᠨ ᠪᠢᠰᠢᠯᠠᠭ ᠬᠦᠷᠲᠡᠵᠦ ᠪᠠᠷᠠᠭᠠᠳ ᠭᠠᠷᠴᠤ ᠢᠷᠡᠪᠡᠢ︾ ︵ ᠵᠡᠭᠦᠯᠲᠡ 13︶ ᠭᠡᠰᠡᠨ ᠨᠢᠭᠡ ᠯᠡ ᠦᠭᠦᠯᠡᠪᠤᠷᠢ ᠪᠡᠷ ᠪᠢᠴᠢᠵᠠᠢ᠃
ᠤᠳᠠᠯ ᠦᠭᠡᠢ ᠪᠣᠯᠣᠭᠰᠠᠨ ᠭᠤᠷᠪᠠ ᠳ᠋ᠡᠬᠢ ᠠᠭᠤᠯᠵᠠᠯᠲᠠ ᠨᠢ ᠠᠷᠠᠢ ᠠᠯᠪᠠᠨ ᠶᠣᠰᠤᠨ ᠤ ᠰᠢᠨᠵᠢ ᠲᠠᠢ᠂ ︽ ᠡᠵᠡᠨ ᠲᠠᠬᠢᠯ ᠤᠨ ᠣᠷᠳᠤᠨ ᠪᠡᠯᠡᠳᠭᠡᠵᠤ ᠵᠠᠷᠤᠴᠠ ᠦᠬᠢᠳ ᠢ ᠴᠦᠮ ᠵᠠᠢᠯᠠᠭᠤᠯᠵᠤ ᠵᠡᠭᠦᠨ ᠪᠠᠷᠠᠭᠤᠨ ᠳ᠋ᠣᠷ ᠳ᠋ᠧᠩ ᠵᠤᠯᠠ ᠠᠰᠠᠭᠠᠵᠤ ᠭᠠᠭᠴᠠ ᠴᠠᠷᠪᠢ ᠴᠢᠩᠬᠠᠢ ᠶᠢ ᠦᠯᠡᠳᠡᠭᠡᠪᠡᠢ᠌ ᠁ ᠪᠠᠭᠰᠢ ᠰᠤᠷᠭᠠᠯ ᠲᠠᠢᠯᠠᠬᠤᠢ ᠳ᠋ᠤᠷ ᠲᠠᠢᠱᠢ ᠠᠬᠠᠢ ᠶᠢ ᠵᠠᠷᠯᠠᠵᠤ ᠮᠣᠩᠭᠣᠯ ᠬᠡᠯᠡᠨ ᠳ᠋ᠤᠷ ᠣᠷᠴᠢᠭᠤᠯᠤᠨ ᠠᠢᠯᠠᠳᠬᠠᠪᠠᠰᠤ ᠡᠵᠡᠨ ᠦ ᠰᠠᠨᠠᠭᠠᠨ ᠳ᠋ᠤᠷ ᠮᠠᠰᠢ ᠨᠡᠢᠴᠡᠪᠡ︾ ︵ ᠵᠡᠭᠦᠯᠲᠡ 14︶ ᠭᠡᠵᠡᠢ᠃
ᠳᠥᠷᠪᠡ ᠳᠡᠬᠢ ᠨᠢ ︽ ᠠᠷᠪᠠᠨ ᠶᠢᠰᠤᠨ ᠤ ᠰᠦᠨᠢ ᠲᠤᠩᠭᠠᠯᠠᠭ᠃ ᠪᠠᠭᠰᠢ ᠶᠢ ᠲᠠᠬᠢᠨ ᠤᠷᠢᠵᠤ ᠰᠤᠷᠭᠠᠯ ᠲᠠᠢᠯᠪᠤᠷᠢᠯᠠᠭᠤᠯᠤᠭᠰᠠᠨᠠ ᠡᠵᠡᠨ ᠶᠡᠬᠡᠳᠡ ᠪᠠᠶᠠᠰᠪᠠᠢ︾ ︵ ᠵᠡᠭᠦᠯᠲᠡ 15︶᠃
ᠲᠠᠪᠤ ᠳ᠋ᠡᠬᠢ ᠨᠢ᠂ ︽ ᠬᠤᠷᠢᠨ ᠭᠤᠷᠪᠠᠨ ᠤ ᠡᠳᠤᠷ ᠪᠠᠭᠰᠢ ᠶᠢ ᠲᠠᠬᠢᠨ ᠲᠠᠭᠤᠳᠠᠵᠤ ᠣᠷᠣᠭᠤᠯᠪᠠᠢ᠃ ᠬᠥᠨᠳᠦᠳᠭᠡᠯ ᠶᠤᠰᠤᠯᠠᠯ ᠮᠦᠨ ᠬᠡᠪ ᠢᠶᠡᠷ ᠪᠦᠭᠡᠳ ᠡᠵᠡᠨ ᠦ ᠪᠡᠶᠡ ᠡᠶᠡᠯᠰᠡᠭ ᠬᠢᠴᠢᠶᠡᠩᠭᠦᠢ ᠪᠡᠷ ᠰᠤᠷᠭᠠᠯ ᠢ ᠰᠣᠨᠣᠰᠴᠤ ᠪᠠᠰᠠ ᠲᠡᠮᠳᠡᠭᠯᠡᠭᠦᠯᠪᠡᠢ᠃ ᠡᠵᠡᠨ ᠵᠡᠭᠦᠨ ᠪᠠᠷᠠᠭᠤᠨ ᠳ᠋ᠤᠷ ᠪᠡᠷᠡ ᠪᠣᠯᠣᠭᠰᠠᠳ ᠲᠣᠷ ᠵᠠᠬᠢᠭᠰᠠᠨ ᠠᠨᠤ᠂ ᠳᠡᠭᠡᠳᠤ ᠠᠷᠰᠢ ᠶᠢᠨ ᠠᠮᠢ ᠨᠠᠰᠣᠨ ᠢ ᠤᠷᠲᠤᠳᠬᠠᠬᠤ ᠶᠣᠰᠣᠨ ᠢ ᠭᠤᠷᠪᠠᠨᠳᠠ ᠦᠭᠦᠯᠡᠭᠰᠡᠨ ᠢᠨᠤ ᠮᠢᠨᠤ ᠰᠡᠳᠬᠢᠯ ᠳ᠋ᠤᠷ ᠭᠦᠨᠡ ᠲᠣᠬᠳᠠᠪᠠᠢ᠃ ᠭᠠᠳᠠᠭᠰᠢ ᠵᠠᠳᠠᠷᠠᠭᠤᠯᠵᠤ ᠪᠣᠰᠣᠳ ᠲᠣᠷ ᠮᠡᠳᠡᠭᠦᠯᠵᠤ ᠦᠯᠤ ᠪᠣᠯᠣᠮᠤᠢ ᠬᠡᠮᠡᠪᠡᠢ︾ ︵ ᠵᠡᠭᠦᠯᠲᠡ 16︶᠃
ᠴᠢᠩᠭᠢᠰ ᠬᠠᠭᠠᠨ ᠬᠢᠭᠡᠳ ᠴᠠᠩᠴᠦ᠋ᠨ ᠪᠣᠮᠪᠣ ᠬᠣᠶᠠᠷ ᠤᠨ ᠠᠯᠪᠠᠨ ᠶᠣᠰᠣᠨ ᠤ ᠠᠭᠤᠯᠵᠠᠯᠲᠠ ᠭᠡᠪᠡᠯ ᠤᠭ ᠠᠴᠠ ᠪᠠᠨ ᠡᠢᠮᠤ ᠯᠠ ᠲᠠᠪᠤ ᠤᠳᠠᠭᠠ᠃ ᠡᠨᠳᠡ ᠲᠠᠪᠲᠠᠨ ᠭᠠᠷᠴᠤ ᠪᠠᠢᠭᠠ ︽ ᠰᠤᠷᠭᠠᠯ︾ ᠭᠡᠳᠡᠭ ᠨᠢ ᠪᠣᠮᠪᠣ ᠶᠢᠨ ᠰᠤᠷᠳᠠᠬᠤᠨ ᠤ ᠰᠤᠷᠭᠠᠯ ᠨᠣᠮ ᠢ ᠵᠢᠭᠠᠵᠤ ᠪᠠᠢᠨᠠ ᠭᠡᠳᠡᠭ ᠳᠡᠩᠳᠡᠭᠦᠤ ᠣᠢᠯᠠᠭᠠᠮᠵᠢᠲᠠᠢ᠃
ᠲᠠᠪᠤ ᠤᠳᠠᠭᠠᠨ ᠤ ᠠᠭᠤᠯᠵᠠᠯᠲᠠ ᠳᠤ ᠴᠡᠷᠢᠭ ᠳᠠᠢᠨ᠂ ᠤᠯᠤᠰ ᠲᠦᠷᠤ ᠶᠢᠨ ᠠᠭᠤᠯᠭᠠ ᠶᠢ ᠬᠡᠨ ᠨᠢ ᠴᠦ ᠬᠦᠨᠳᠡᠭᠰᠡᠨ ᠦᠭᠡᠢ ᠶᠤᠮ᠃
ᠴᠠᠩᠴᠦ᠋ᠨ ᠪᠣᠮᠪᠣ ᠶᠢ ᠬᠦᠷᠴᠤ ᠣᠴᠢᠬᠤ ᠳᠤ ᠴᠢᠩᠭᠢᠰ ᠬᠠᠭᠠᠨ ᠤ ᠰᠠᠷᠲᠠᠭᠤᠯ ᠳᠤ ᠬᠢᠭᠰᠡᠨ ᠠᠶᠠᠨ ᠲᠠᠢᠨ ᠤ ᠭᠣᠣᠯ ᠭᠣᠣᠯ ᠲᠤᠯᠤᠯᠳᠤᠭᠠᠨ ᠢᠯᠠᠯᠲᠠ ᠲᠠᠢ ᠲᠠᠭᠣᠰᠴᠤ ︵ ᠵᠠᠪᠠ᠂ ᠰᠦᠪᠡᠭᠡᠳᠡᠢ ᠬᠣᠶᠠᠷ ᠤᠨ ᠭᠢᠪᠴᠠᠭ᠂ ᠣᠷᠣᠰ᠂ ᠪᠣᠯᠭᠠᠷᠢᠶᠠ ᠳ᠋ᠥ ᠬᠢᠭᠰᠡᠨ ᠲᠠᠢᠨ ᠢᠳᠡ ᠶᠠᠪᠤᠭᠳᠠᠵᠤ ᠪᠠᠢᠯᠠ︶ ᠨᠤᠲᠤᠭ ᠤᠨ ᠵᠦᠭ ᠵᠢᠯᠤᠭᠣ ᠵᠠᠯᠠᠬᠤ ᠱᠠᠳᠤᠨ ᠳᠤ ᠣᠷᠣᠭᠠᠳ ᠪᠠᠢᠵᠠᠢ᠃ ᠲᠠᠷᠠᠭᠠ ᠵᠢᠯ ᠨᠢ ᠪᠤᠶᠤ 1223 ᠣᠨ ᠤ ᠬᠠᠪᠤᠷ ᠶᠡᠬᠡ ᠡᠵᠡᠨ ᠦ ᠠᠯᠳᠠᠨ ᠵᠢᠯᠤᠭᠣ ᠠᠹᠭᠠᠨᠢᠰᠲ᠋ᠠᠨ ᠠᠴᠠ ᠰᠠᠮᠠᠷᠺᠠᠨᠲ ᠢ ᠲᠠᠭᠠᠷᠢᠨ ᠲᠤᠷᠤᠨᠠ ᠲᠡᠰᠢ ᠠᠶᠠᠷᠬᠠᠨ ᠬᠦᠳᠡᠯᠵᠤ ᠪᠠᠢᠪᠠ᠃ ᠡᠨᠡ ᠬᠣᠭᠣᠷᠣᠨᠳᠤ ᠴᠠᠩᠴᠦ᠋ᠨ ᠪᠣᠮᠪᠣ ᠬᠠᠶᠠ ᠨᠢᠭᠡ ᠴᠢᠩᠭᠢᠰ ᠬᠠᠭᠠᠨ ᠲᠠᠢ ᠠᠭᠤᠯᠵᠠᠵᠤ ᠤᠴᠠᠷᠠᠵᠤ ᠪᠠᠢᠭᠰᠠᠨ ᠢ ᠯᠢ ᡁᠢ ᠴᠠᠩ ︽ ᠡᠵᠡᠨ ᠢ ᠲᠠᠭᠠᠯᠳᠤᠨ ᠵᠡᠭᠦᠨᠰᠢ ᠣᠴᠢᠵᠤ ᠪᠠᠢᠨ ᠪᠠᠢᠨ ᠪᠣᠮᠪᠣ ᠶᠢᠨ ᠶᠤᠰᠤᠨ ᠢ ᠦᠭᠦᠯᠡᠮᠤᠢ︾ ︵ ᠵᠡᠭᠦᠯᠲᠡ 18︶ ᠭᠡᠵᠤ ᠲᠡᠮᠳᠡᠭᠯᠡᠵᠡᠢ᠃ ᠪᠠᠢᠨ ᠪᠠᠢᠨ ᠭᠡᠳᠡᠭ ᠨᠢ ᠴᠣᠬᠣᠮ ᠬᠡᠳᠤ ᠤᠳᠠᠭᠠ ᠪᠣᠯᠬᠣ ᠨᠢ ᠲᠤᠳᠤ ᠦᠭᠡᠢ ᠪᠣᠯᠪᠠᠴᠤ ᠲᠡᠳᠡᠨ ᠦ ᠬᠤᠭᠤᠷᠤᠨᠳᠤ ᠪᠣᠮᠪᠣ ᠶᠢᠨ ᠰᠤᠷᠳᠠᠬᠤᠨ ᠯᠡ ᠶᠠᠷᠢᠯᠴᠠᠭᠠᠨ ᠤ ᠰᠡᠳᠤᠪ ᠪᠠᠢᠭᠰᠠᠨ ᠢ ᠲᠠᠬᠢᠨᠲᠠ ᠲᠣᠳᠤ ᠭᠡᠷᠡᠴᠢᠯᠡᠵᠤ ᠪᠠᠢᠨᠠ᠃
ᠬᠣᠶᠠᠳᠤᠭᠠᠷ ᠰᠠᠷᠠ ᠳᠤ ᠴᠠᠩᠴᠦ᠋ᠨ ᠪᠣᠮᠪᠣ ︽ ᠠᠭᠤᠢ ᠳᠠᠭᠠᠨ ᠡᠭᠡᠬᠦ ︾ ᠶᠢ ᠴᠢᠩᠭᠢᠰ ᠬᠠᠭᠠᠨ ᠳᠤ ᠭᠤᠶᠤᠴᠢᠯᠠᠵᠠᠢ᠃ ︽ ᠡᠵᠡᠨ ᠦᠭᠦᠯᠡᠷᠤᠨ᠂ ᠮᠢᠨᠤ ᠪᠡᠶᠡ ᠪᠠᠰᠠ ᠲᠤᠷᠣᠨᠡᠰᠢ ᠡᠴᠢᠮᠤᠢ᠂ ᠬᠠᠮᠲᠤ ᠶᠠᠪᠤᠪᠠᠰᠤ ᠶᠠᠮᠠᠷ ᠬᠡᠮᠡᠭᠰᠡᠨᠡ ᠪᠠᠭᠰᠢ ᠦᠴᠢᠭᠰᠡᠨ ᠢᠨᠤ᠂ ᠤᠷᠢᠳ ᠢᠶᠠᠷ ᠪᠤᠴᠠᠪᠠᠰᠤ ᠰᠠᠢᠨ ᠪᠤᠯᠠᠢ ᠁ ᠡᠳᠤᠭᠡ ᠡᠵᠡᠨ ᠦ ᠠᠰᠠᠭᠤᠵᠤ ᠡᠷᠢᠭᠰᠡᠨ ᠢ ᠠᠢᠯᠠᠳᠬᠠᠨ ᠲᠡᠭᠦᠰᠪᠡᠢ᠃ ᠡᠢᠨ ᠬᠦ ᠭᠤᠶᠣᠴᠢᠯᠠᠮᠤᠢ ᠬᠡᠮᠡᠪᠡᠢ︾ ︵ ᠵᠡᠭᠦᠯᠲᠡ 17︶᠃ ᠴᠢᠩᠭᠢᠰ ᠬᠠᠭᠠᠨ ᠭᠤᠶᠤᠭᠰᠠᠨ ᠢᠶᠠᠷ ᠪᠣᠯᠭᠠᠭᠰᠠᠨᠠ ᠬᠦᠭᠰᠢᠨ ᠪᠣᠮᠪᠣ ᠠᠬᠢᠨ ᠨᠢᠭᠡ ᠵᠢᠯ ᠤᠨ ᠴᠠᠭ ᠵᠠᠷᠤᠴᠠᠭᠤᠯᠤᠨ ᠪᠠᠢᠵᠤ ᠣᠳᠣ ᠶᠢᠨ ᠬᠦᠬᠡᠬᠣᠲᠠ ᠪᠡᠷ ᠲᠠᠭᠠᠷᠢᠨ ᠠᠯᠲᠠᠨ ᠤᠯᠤᠰ ᠲᠠᠭᠠᠨ ᠪᠤᠴᠠᠵᠤ ᠬᠠᠷᠢᠵᠠᠢ᠃ ᠬᠠᠷᠢᠨ ᠲᠠᠢᠰᠤᠨ ᠢᠶᠠᠨ ᠲᠠᠷᠤᠵᠤ ᠳᠠᠷᠬᠠᠨ ᠴᠣᠯᠠ ᠪᠠᠨ ᠮᠠᠨᠳᠤᠭᠤᠯᠤᠭᠰᠠᠨ ᠴᠢᠩᠭᠢᠰ ᠬᠠᠭᠠᠨ ᠶᠡᠬᠡ ᠨᠠᠢᠷ ᠪᠠᠵᠠᠭᠠᠵᠤ ᠢᠯᠠᠯᠳᠠ ᠪᠠᠨ ᠪᠡᠯᠭᠡᠯᠡᠨ ᠲᠠᠭᠠᠯᠠᠭᠳᠠᠭᠰᠠᠨ ᠭᠠᠵᠠᠷ ᠢᠶᠠᠨ ᠵᠤᠰᠠᠵᠤ᠂ ᠠᠪᠠ ᠲᠠᠯᠪᠢᠨ᠂ ᠰᠠᠯᠤᠭᠠᠳ ᠲᠦᠷᠪᠡᠨ ᠵᠢᠯ ᠪᠣᠯᠣᠭᠰᠠᠨ ᠮᠣᠩᠭᠤᠯ ᠨᠤᠲᠤᠭ ᠤᠨ ᠢᠶᠠᠨ ᠵᠦᠭ ᠶᠠᠭᠠᠷᠠᠮᠠ ᠦᠭᠡᠢ ᠣᠢᠷᠠᠳᠤᠭᠰᠠᠭᠠᠷ ᠬᠣᠶᠠᠷ ᠵᠢᠯ ᠦᠨ ᠨᠢᠭᠤᠷ ᠦᠵᠡᠵᠤ ᠲᠤᠤᠯᠠ ᠶᠢᠨ ᠬᠠᠷᠠ ᠲᠦᠨ ᠳᠡᠬᠢ ᠶᠡᠬᠡ ᠣᠷᠳᠣᠨ ᠳᠠᠭᠠᠨ ᠪᠤᠴᠠᠵᠤ ᠢᠷᠡᠭᠰᠡᠨ ᠪᠠᠢᠳᠠᠭ᠃ ᠡᠭᠦᠨ ᠢ ᠬᠢᠲᠠᠳ ᠤᠳ ︽ ᠲᠡᠮᠤᠵᠢᠨ ᠭᠤᠸᠠᠢ ᠴᠠᠩ ᠪᠠᠭᠰᠢ ᠶᠢᠨ ᠢᠶᠠᠨ ᠰᠤᠷᠭᠠᠯ ᠢ ᠰᠣᠨᠣᠰᠴᠤ ᠲᠣᠮᠣᠭᠠ ᠣᠷᠣᠭᠠᠳ ᠠᠯᠠᠵᠤ ᠬᠢᠳᠤᠬᠤ ᠪᠠᠨ ᠪᠣᠯᠢᠵᠤ ᠭᠡᠷ ᠲᠡᠭᠡᠨ ᠬᠠᠷᠢᠭᠰᠠᠨ︾ ᠪᠣᠯᠭᠠᠨ ᠪᠢᠴᠢᠵᠤ ᠪᠠᠢᠨᠠ᠃ ᠦᠨᠡᠨ ᠳᠡᠬᠡᠨ ᠴᠢᠩᠭᠢᠰ ᠬᠠᠭᠠᠨ ᠲᠤᠮᠳᠠᠳᠤ ᠠᠽᠢᠶᠠ ᠡᠴᠡ ᠪᠤᠴᠠᠵᠤ ᠢᠷᠡᠭᠰᠡᠨ ᠨᠢ ᠭᠣᠣᠯ ᠦᠰᠢᠶᠡᠲᠡᠨ ᠠᠯᠲᠠᠨ ᠤᠯᠤᠰ ᠪᠣᠯᠤᠨ ᠤᠷᠪᠠᠭᠠᠨ ᠬᠦᠷᠪᠡᠭᠡᠨ ᠲᠠᠢ ᠲᠠᠩᠭᠤᠳ ᠢ ᠡᠴᠤᠰᠯᠠᠨ ᠰᠦᠨᠦᠭᠡᠬᠦ ᠰᠲᠷᠠᠲᠸᠭᠢ ᠤᠨ ᠠᠯᠬᠤᠮ ᠪᠠᠢᠭᠰᠠᠨ ᠢ ᠮᠣᠩᠭᠤᠯ ᠣᠷᠣᠨ ᠳᠠᠭᠠᠨ ᠵᠤᠨ ᠢ ᠦᠩᠭᠡᠷᠡᠭᠦᠯᠦᠮᠡᠭᠴᠡ ᠨᠠᠮᠤᠷ ᠨᠢ ᠠᠬᠢᠨ ᠶᠡᠬᠡ ᠴᠡᠷᠢᠭ ᠠᠪᠴᠤ ᠲᠠᠩᠭᠤᠳ ᠢ ᠳᠠᠢᠯᠠᠷᠠ ᠮᠣᠷᠳᠠᠭᠰᠠᠨ ᠶᠠᠪᠤᠳᠠᠯ ᠭᠡᠷᠡᠴᠢᠯᠡᠵᠤ ᠪᠠᠢᠨᠠ᠃ ᠲᠡᠭᠡᠭᠡᠳ ᠲᠠᠩᠭᠤᠳ ᠢ ᠮᠦᠬᠦᠭᠡᠵᠤ ᠲᠠᠭᠠᠤ ᠳᠤ ᠨᠢ ᠠᠯᠲᠠᠨ ᠤᠯᠤᠰ ᠤᠨ ᠬᠠᠲᠤᠨ ᠭᠤᠤᠯ ᠬᠠᠪᠢ ᠶᠢᠨ ᠨᠤᠲᠤᠭ ᠢ ᠡᠵᠡᠯᠡᠭᠡᠳ ᠠᠯᠲᠠᠨ ᠤᠯᠤᠰ ᠢ ᠰᠦᠨᠦᠭᠡᠬᠦ ᠪᠣᠳᠣᠯᠭᠠ᠂ ᠲᠣᠳᠣᠷᠬᠠᠢ ᠲᠦᠰᠦᠯ ᠢ ᠭᠡᠷᠢᠶᠡᠰᠤᠯᠠᠵᠤ᠂ ᠲᠡᠭᠷᠢ ᠳ᠋ᠥ ᠡᠭᠡᠭᠰᠡᠨ ᠪᠢᠯᠡ᠃
ᠯᠢ ᡁᠢ ᠴᠠᠩ ᠤᠨ ᠲᠡᠮᠳᠡᠭᠯᠡᠯ ᠨᠢ ᠠᠶᠠᠨ ᠵᠠᠮ ᠤᠨ ᠰᠤᠨᠢᠨ ᠰᠠᠢᠬᠠᠨ ᠬᠢᠭᠡᠳ ᠰᠢᠯᠦᠭᠯᠡᠬᠦ ᠳᠤᠷᠠᠲᠠᠢ ᠪᠠᠭᠰᠢ ᠶᠢᠨ ᠢᠶᠡᠨ ᠢᠷᠠᠭᠤ ᠨᠠᠢᠷᠠᠭ ᠲᠦ ᠶᠡᠬᠡᠬᠡᠨ ᠬᠠᠭᠤᠳᠠᠰᠤ ᠪᠠᠨ ᠡᠵᠡᠯᠡᠭᠦᠯᠵᠠᠢ᠃ ᠶᠠᠭ ᠡᠢᠮᠤ ᠪᠣᠯᠬᠣᠷ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠲᠦᠷᠤ ᠶᠢ ᠵᠠᠰᠠᠬᠤ ᠤᠬᠠᠭᠠᠨ ᠢ ᠠᠢᠯᠠᠳᠤᠭᠰᠠᠨ᠂ ᠴᠢᠩᠭᠢᠰ ᠬᠠᠭᠠᠨ ᠳᠦ ᠠᠯᠠᠵᠤ ᠬᠢᠲᠤᠬᠤ ᠪᠠᠨ ᠪᠠᠭᠠᠰᠬᠠᠬᠤ ᠶᠢ ᠢᠳᠬᠠᠬᠰᠠᠨ ᠠᠭᠤᠯᠭᠠ ᠶᠢ ᠰᠠᠨᠠᠭᠠ ᠲᠠᠢ ᠰᠠᠨᠠᠭᠠ ᠦᠭᠡᠢ ᠣᠷᠬᠢᠭᠳᠠᠭᠤᠯᠤᠭᠰᠠᠨ ᠪᠠᠢᠬᠠ ᠭᠡᠰᠡᠨ ᠲᠠᠭᠠᠮᠠᠭ ᠤᠩᠰᠢᠭᠴᠢᠳ ᠲᠤ ᠲᠦᠷᠦᠵᠤ ᠮᠠᠭᠠᠳ ᠦᠭᠡᠢ᠃ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢ ᠰᠣᠳᠣᠯᠣᠭᠰᠠᠨ ᠬᠢᠲᠠᠳ ᠲᠡᠤᠬᠡᠴᠢᠤᠨ ︽ᠴᠢᠩᠭᠢᠰ ᠬᠠᠭᠠᠨ ᠭᠠᠳᠠᠭᠰᠢ ᠵᠠᠳᠠᠷᠠᠭᠤᠯᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠤ ᠵᠠᠷᠯᠢᠭᠳᠠᠭᠰᠠᠨ ᠲᠤᠯᠠ ᠲᠡᠮᠳᠡᠭᠯᠡᠬᠦ ᠪᠣᠯᠣᠮᠵᠢ ᠪᠠᠢᠭᠰᠠᠨ ᠦᠭᠡᠢ︾ ᠭᠡᠵᠤ ᠤᠯᠠᠢᠨ ᠴᠠᠢᠨ ᠵᠢᠳᠬᠦᠵᠤ ᠪᠠᠢᠨᠠ᠃ ᠴᠢᠩᠭᠢᠰ ᠬᠠᠭᠠᠨ ᠤ ︽ᠭᠠᠳᠠᠭᠰᠢ ᠵᠠᠳᠠᠷᠠᠭᠤᠯᠵᠤ ᠪᠣᠰᠣᠳ ᠲᠣᠷ ᠮᠡᠳᠡᠭᠦᠯᠵᠤ ᠦᠯᠤ ᠪᠣᠯᠣᠮᠤᠢ︾ ᠭᠡᠰᠡᠨ ᠨᠢ ᠥᠭᠡᠷᠡ ᠶᠢ ᠪᠢᠰᠢ᠂ ︽ᠳᠡᠭᠡᠳᠤ ᠠᠷᠰᠢ ᠶᠢᠨ ᠠᠮᠢ ᠨᠠᠰᠣᠨ ᠢ ᠤᠷᠲᠤᠳᠬᠠᠬᠤ ᠶᠣᠰᠣᠨ ᠢ ᠭᠤᠷᠪᠠᠨᠳᠠ ᠦᠭᠦᠯᠡᠭᠰᠡᠨ︾ ᠢ ᠵᠢᠭᠠᠭᠰᠠᠨ ᠨᠢ ᠮᠠᠰᠢ ᠲᠣᠳᠣᠷᠬᠠᠢ ︵ ᠲᠠᠪᠤ ᠳᠠᠬᠢ ᠠᠭᠤᠯᠵᠠᠯᠲᠠ ᠳ᠋ᠦ ᠯᠠᠪᠯᠠᠨᠠ ᠦᠦ︶ ᠶᠤᠮ᠃
ᠠᠰᠠᠭᠤᠭᠰᠠᠨ᠂ ᠢᠳᠬᠠᠭᠰᠠᠨ ᠶᠠᠪᠤᠳᠠᠯ ᠴᠣᠬᠣᠮ ᠪᠠᠢᠬᠤ ᠡᠰᠡᠬᠦ ᠮᠠᠳᠠᠭ ᠢ ᠴᠠᠩᠴᠦ᠋ᠨ ᠪᠤᠮᠪᠤ ᠶᠢᠨ ᠲᠤᠮᠳᠠᠳᠤ ᠠᠽᠢᠶᠠ ᠳᠤ ︽ ᠬᠢᠴᠢᠶᠡᠯᠯᠡᠭᠰᠡᠨ︾ ᠶᠠᠷᠢᠶᠠᠨ ᠤ ᠲᠤᠰᠬᠠᠢ ᠡᠮᠬᠢᠳᠬᠡᠯ ᠪᠣᠯᠬᠤ ︽ᠰᠤᠷᠭᠠᠯ ᠢ ᠲᠠᠢᠯᠪᠤᠷᠢᠯᠠᠭᠰᠠᠨ ᠬᠤᠷᠠᠯ ᠤᠨ ᠲᠡᠮᠳᠡᠭᠯᠡᠯ︾ ᠡᠴᠤᠰᠯᠠᠨ ᠲᠠᠢᠯᠤᠨᠠ᠃ ᠡᠨᠡ ᠲᠡᠮᠳᠡᠭᠯᠡᠯ ᠢ ᠡᠩ ᠦᠨ ᠨᠢᠭᠡᠨ ᠪᠢᠰᠢ ᠡᠵᠡᠨ ᠴᠢᠩᠭᠢᠰ ᠦᠨ ᠢᠲᠡᠭᠡᠯᠲᠤ ᠲᠦᠰᠢᠮᠡᠯ ᠶᠧᠯᠸᠢ ᠴᠦᠰᠠᠢ ᠭᠠᠷᠳᠠᠨ ᠭᠦᠢᠴᠡᠳᠬᠡᠵᠡᠢ᠃
︽ᠰᠤᠷᠭᠠᠯ ᠢ ᠲᠠᠢᠯᠪᠤᠷᠢᠯᠠᠭᠰᠠᠨ ᠬᠤᠷᠠᠯ ᠤᠨ ᠲᠡᠮᠳᠡᠭᠯᠡᠯ︾ ᠪᠣᠯ ᠲᠠᠪᠤ ᠤᠳᠠᠭᠠ ᠶᠢᠨ ᠠᠭᠤᠯᠵᠠᠯᠲᠠ ᠶᠢᠨ ᠭᠣᠣᠯ ᠭᠤᠷᠪᠠᠨ ᠠᠭᠤᠯᠵᠠᠯᠲᠠ ᠳᠤ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠢᠯᠡᠳᠭᠡᠭᠰᠡᠨ ᠪᠦᠬᠦ ᠠᠭᠤᠯᠭᠠ ᠶᠤᠮ᠃ ︵ ᠡᠬᠢᠨ ᠦ ᠬᠣᠶᠠᠷ ᠠᠭᠤᠯᠵᠠᠯᠲᠠ ᠨᠢ ᠶᠣᠰᠣᠯᠠᠯ ᠤᠨ ᠴᠢᠨᠠᠷ ᠲᠠᠢ ᠪᠠᠢᠭᠰᠠᠨ ᠢ ᠪᠢᠳᠡ ᠲᠦᠷᠦᠭᠦᠨ ᠤᠩᠰᠢᠭᠰᠠᠨ︶ ᠡᠨᠡ ᠲᠡᠮᠳᠡᠭᠯᠡᠯ ᠢ ᠴᠢᠩᠭᠢᠰ ᠬᠠᠭᠠᠨ ᠦᠪᠡᠷ ᠢᠶᠡᠨ ᠵᠠᠷᠯᠢᠭᠳᠠᠨ ᠪᠢᠴᠢᠭᠦᠯᠵᠤ ᠬᠠᠳᠠᠭᠠᠯᠠᠭᠤᠯᠤᠭᠰᠠᠨ ᠲᠤᠯᠠ ᠪᠣᠮᠪᠣ ᠶᠢᠨ ᠠᠮᠡᠠ ᠠᠴᠠ ᠭᠠᠷᠤᠭᠰᠠᠨ ᠢ ᠵᠣᠷᠢᠭᠤᠳᠠ ᠣᠷᠬᠢᠬᠤ ᠶᠢ ᠪᠤᠤ ᠬᠡᠯᠡ᠂ ᠰᠠᠨᠠᠮᠰᠠᠷ ᠦᠭᠡᠢ ᠣᠷᠬᠢᠬᠤ ᠪᠣᠯᠣᠮᠵᠢ ᠴᠦ ᠦᠭᠡᠢ ᠶᠤᠮ᠃
︽ᠰᠤᠷᠭᠠᠯ ᠢ ᠲᠠᠢᠯᠪᠤᠷᠢᠯᠠᠭᠰᠠᠨ ᠬᠤᠷᠠᠯ ᠤᠨ ᠲᠡᠮᠳᠡᠭᠯᠡᠯ︾ ᠢ ᠡᠬᠢᠨ ᠡᠴᠡ ᠲᠠᠭᠤᠰᠲᠠᠯᠠ ᠰᠢᠭᠦᠵᠦ ᠦᠵᠡᠬᠦ ᠳᠦ ᠬᠢᠲᠠᠳ ᠤᠳ ᠤᠨ ᠨᠢᠳᠦ ᠲᠠᠢ ᠠᠮᠠ ᠲᠠᠢ ᠪᠢᠴᠢᠬᠡᠳ ᠪᠠᠢᠭᠠ ᠲᠦᠷᠤ ᠶᠢ ᠵᠠᠰᠠᠬᠤ ᠤᠬᠠᠭᠠᠨ᠂ ᠠᠯᠠᠵᠤ ᠬᠢᠳᠤᠬᠤ ᠪᠠᠨ ᠪᠠᠭᠠᠰᠬᠠᠬᠤ ᠶᠢ ᠢᠳᠬᠠᠭᠰᠠᠨ ᠠᠭᠤᠯᠭᠠ ᠣᠭᠲᠣ ᠪᠠᠢᠬᠤ ᠦᠭᠡᠢ᠃ ︽ᠰᠤᠷᠭᠠᠯ ᠢ ᠲᠠᠢᠯᠪᠤᠷᠢᠯᠠᠭᠰᠠᠨ ᠬᠤᠷᠠᠯ ᠤᠨ ᠲᠡᠮᠳᠡᠭᠯᠡᠯ︾ ᠪᠣᠯ ᠴᠡᠪᠡᠷ ᠪᠣᠮᠪᠣ ᠶᠢᠨ ᠰᠤᠷᠳᠠᠬᠤᠨ ᠤ ᠲᠠᠢᠯᠤᠮᠵᠢ ᠂ ᠡᠭᠦᠨ ᠢ ᠭᠠᠷᠴᠠᠭ ᠡᠴᠡ ᠨᠢ ᠴᠦ ᠮᠡᠳᠡᠵᠤ ᠪᠣᠯᠣᠨᠠ᠃
︽ᠰᠤᠷᠭᠠᠯ ᠢ ᠲᠠᠢᠯᠪᠤᠷᠢᠯᠠᠭᠰᠠᠨ ᠬᠤᠷᠠᠯ ᠤᠨ ᠲᠡᠮᠳᠡᠭᠯᠡᠯ︾ ᠳ᠋ᠥ ᠪᠣᠮᠪᠣ ᠶᠢᠨ ᠰᠤᠷᠳᠠᠬᠤᠨ ᠤ ᠭᠣᠣᠯ ᠨᠣᠮᠯᠠᠯ ᠪᠣᠯᠬᠤ ᠡᠷᠡᠭᠦᠯ ᠡᠩᠬᠡ ᠤᠷᠲᠤ ᠨᠠᠰᠤᠯᠠᠬᠤ ᠠᠭᠤᠯᠭᠠ ᠠᠴᠠ ᠰᠠᠯᠵᠤ ᠨᠡᠢᠭᠡᠮ ᠣᠯᠣᠰ ᠲᠦᠷᠤ ᠴᠡᠷᠢᠭ ᠲᠠᠢᠨ ᠲᠠᠢ ᠬᠣᠯᠪᠣᠭᠳᠠᠭᠰᠠᠨ ᠠᠭᠤᠯᠭᠠ ᠶᠢ ᠶᠠᠷᠢᠭᠰᠠᠨ ᠵᠣᠢᠯ ᠬᠤᠶᠠᠷ ᠤᠯᠠᠭᠠᠨ ᠮᠦᠷ ᠪᠠᠢᠳᠠᠭ ᠪᠣᠯᠪᠠᠴᠤ ︽ᠠᠰᠠᠭᠤᠭᠰᠠᠨ︾ ᠬᠢᠭᠡᠳ ︽ ᠢᠳᠬᠠᠭᠰᠠᠨ︾ ᠤ ᠠᠯᠢ ᠠᠯᠢᠨ ᠴᠤ ᠪᠢᠰᠢ᠂ ᠡᠨᠳᠡ ᠪᠦᠲᠦᠨ ᠢᠶᠡᠷ ᠨᠢ ᠰᠡᠢᠷᠡᠭᠦᠯᠤᠶᠡ᠃
32 ᠳ᠋ᠤᠭᠠᠷ ᠤᠯᠠᠭᠠᠨ ᠮᠦᠷ᠄ ᠲᠠᠢᠬᠠᠩᠱᠠᠨ ᠠᠴᠠ ᠵᠡᠭᠦᠨᠰᠢ᠂ ᠬᠠᠳᠤᠨ ᠭᠣᠣᠯ ᠠᠴᠠ ᠬᠤᠢᠰᠢ ᠬᠢ ︵ ᠵᠡᠭᠦᠯᠲᠡ19︶ ᠣᠷᠣᠨ ᠪᠣᠯ ᠬᠠᠮᠤᠭ ᠤᠨ ᠦᠷᠡ ᠰᠢᠮᠡ ᠲᠠᠢ ᠨᠤᠲᠤᠭ᠂ ᠰᠠᠢᠨ ᠴᠢᠨᠠᠷ ᠤᠨ ᠲᠠᠷᠢᠶᠡ ᠨᠣᠭᠣᠭᠠ ᠵᠢᠮᠢᠰ ᠤᠷᠭᠤᠨᠠ᠂ ᠵᠢᠭᠠᠰᠣ᠂ ᠲᠠᠪᠤᠰᠤ᠂ ᠲᠣᠷᠭᠠ ᠶᠢᠨ ᠭᠠᠷᠤᠯᠲᠠ ᠪᠡᠷ ᠤᠯᠤᠰ ᠣᠷᠣᠨ ᠢ ᠬᠠᠩᠭᠠᠭᠠᠳᠠᠭ᠃ ᠡᠷᠲᠡᠨ ᠡᠴᠡ ᠡᠨᠡ ᠭᠠᠵᠠᠷ ᠢ ᠡᠵᠡᠯᠡᠭᠰᠡᠨ ᠬᠦᠮᠤᠨ ᠬᠦᠴᠤᠷᠬᠡᠭ ᠲᠦᠷᠤ ᠶᠢ ᠪᠠᠢᠭᠤᠯᠵᠤ ᠴᠢᠳᠠᠳᠠᠭ᠃ ᠡᠢᠮᠤ ᠠᠴᠠ ᠦᠶᠡ ᠦᠶᠡ ᠶᠢᠨ ᠬᠠᠭᠠᠳ ᠡᠵᠡᠳ ᠴᠦᠮ ᠡᠨᠡ ᠭᠠᠵᠠᠷ ᠢ ᠲᠡᠮᠡᠴᠡᠯᠳᠦᠳᠡᠭ ᠶᠤᠮ᠃ ᠡᠳᠤᠭᠡ ᠲᠠᠢᠨ ᠤ ᠬᠥᠯ ᠳᠦ ᠪᠤᠲᠠᠷᠠᠨ ᠵᠢᠭᠤᠲᠡᠭᠰᠠᠨ ᠢᠷᠭᠡᠳ ᠢ ᠬᠠᠷᠠᠬᠠᠨ ᠲᠥᠪᠬᠢᠨᠡᠭᠦᠯᠦᠭᠡ ᠦᠭᠡᠢ᠃ ᠢᠷᠭᠡᠨ ᠦ ᠵᠣᠪᠠᠯᠠᠩ ᠢ ᠮᠡᠳᠡᠳᠡᠭ᠂ ᠨᠢᠮᠪᠠᠢ᠂ ᠤᠬᠠᠭᠠᠯᠢᠭ ᠨᠤᠶᠠᠨ ᠢ ᠲᠣᠮᠢᠯᠠᠨ ᠤᠴᠢᠭᠤᠯᠵᠤ ᠲᠠᠲᠠᠪᠤᠷᠢ᠂ ᠴᠡᠷᠢᠭ ᠦᠨ ᠠᠯᠪᠠᠨ ᠠᠴᠠ ᠭᠤᠷᠪᠠᠨ ᠵᠢᠯ ᠴᠢᠯᠦᠭᠡᠯᠡᠪᠡᠯ ᠴᠡᠷᠢᠭ ᠠᠷᠮᠢ ᠲᠦᠷᠤ ᠵᠠᠰᠠᠭ ᠲᠤ ᠬᠡᠷᠡᠭᠯᠡᠬᠦ ᠪᠤᠳᠠᠰ ᠤᠨ ᠬᠠᠩᠭᠠᠯᠭᠠ ᠪᠠᠲᠤᠯᠠᠭᠠᠲᠠᠢ ᠪᠣᠯᠬᠤ ᠪᠦᠭᠡᠳ ᠢᠷᠭᠡᠳ ᠦᠨ ᠠᠮᠢᠳᠤᠷᠠᠯ ᠢ ᠰᠡᠷᠭᠦᠭᠡᠨ ᠪᠣᠰᠬᠠᠵᠤ ᠴᠢᠳᠠᠨᠠ᠃ ᠡᠨᠡ ᠮᠡᠲᠤ ᠢᠷᠭᠡᠳ ᠢ ᠠᠮᠤᠭᠤᠯᠵᠤ ᠦᠷᠡ ᠬᠣᠢᠴᠢᠰ ᠢ ᠨᠢ ᠠᠮᠤᠷ ᠲᠦᠪᠰᠢᠨ ᠠᠵᠤ ᠲᠦᠷᠦᠭᠦᠯᠡᠬᠦ ᠳᠦ ᠬᠦᠷᠪᠡᠯ ᠲᠡᠭᠷᠢ ᠲᠠᠨ ᠢ ᠢᠪᠡᠭᠡᠬᠦ ᠪᠣᠯᠣᠨᠠ᠃
33 ᠳ᠋ᠤᠭᠠᠷ ᠤᠯᠠᠭᠠᠨ ᠮᠦᠷ᠄ ᠪᠢ ᠬᠠᠭᠠᠨ ᠤ ᠳᠠᠭᠤᠳᠠᠯᠭᠠ ᠪᠡᠷ ᠲᠦᠮᠡᠨ ᠭᠠᠵᠠᠷ ᠤᠨ ᠬᠣᠯᠠ ᠠᠴᠠ ᠢᠷᠡᠵᠤ ᠲᠠᠮᠢᠷ ᠢ ᠲᠡᠵᠢᠭᠡᠨ ᠪᠡᠶᠡ ᠶᠢ ᠴᠢᠬᠢᠷᠠᠭᠵᠢᠭᠤᠯᠬᠤ ᠤᠬᠠᠭᠠᠨ ᠢ ᠨᠢᠭᠡᠨᠳᠡ ᠲᠠᠢᠯᠪᠤᠷᠢᠯᠠᠭᠰᠠᠨ᠃ ᠲᠦᠷᠤ ᠶᠢ ᠵᠠᠰᠠᠵᠤ ᠢᠷᠭᠡᠳ ᠢ ᠲᠡᠵᠢᠭᠡᠬᠦ ᠶᠤᠰᠤᠨ ᠢ ᠶᠠᠷᠢᠬᠤ ᠠᠴᠠ ᠶᠠᠭᠤᠨ ᠬᠠᠷᠠᠮᠨᠠᠬᠤ ᠪᠤᠢ᠃ ᠮᠢᠨᠤ ᠡᠮᠤᠨᠡᠬᠡᠨ ᠦᠭᠦᠯᠡᠭᠰᠡᠨ ᠲᠠᠢᠬᠠᠩᠱᠠᠨ ᠠᠴᠠ ᠵᠡᠭᠦᠨᠰᠢ᠂ ᠬᠠᠳᠤᠨ ᠭᠣᠣᠯ ᠠᠴᠠ ᠬᠤᠢᠰᠢ ᠬᠢ ᠢᠷᠭᠡᠳ ᠢ ᠠᠮᠤᠭᠤᠯᠤᠨ ᠲᠣᠬᠢᠵᠠᠭᠤᠯᠬᠤ ᠳᠤ ᠠᠷᠢᠭᠤᠨ ᠴᠢᠭᠴᠢ᠂ ᠴᠢᠳᠠᠪᠤᠷᠢᠯᠢᠭ ᠨᠣᠶᠠᠨ ᠢ ᠲᠣᠮᠢᠯᠠᠵᠤ ᠬᠠᠭᠠᠨ ᠲᠠᠨ ᠤ ᠵᠠᠷᠯᠢᠭ ᠤᠨ ᠶᠣᠰᠤᠭᠠᠷ ᠶᠠᠪᠤᠭᠤᠯᠪᠠᠰᠤ ᠯᠠᠪᠳᠠᠶᠠ ᠲᠡᠭᠷᠢ ᠶᠢᠨ ᠰᠠᠨᠠᠭᠠᠨ ᠳᠤ ᠨᠡᠢᠴᠡᠨᠡ᠃ ᠬᠡᠷᠪᠡ ᠣᠯᠳᠣᠢ ᠲᠦᠰᠢᠮᠡᠯ ᠢ ᠲᠣᠮᠢᠯᠠᠬᠤ ᠳᠤ ᠬᠦᠷᠪᠡᠯ ᠬᠡᠷᠡᠭ ᠪᠦᠲᠦᠬᠦ ᠦᠭᠡᠢ ᠪᠦᠭᠡᠳ ᠭᠡᠳᠡᠷᠭᠦ ᠤᠷᠰᠢᠭ ᠲᠠᠲᠠᠨᠠ᠃ ᠠᠯᠳᠠᠨ ᠤᠯᠤᠰ ᠤᠨ ᠲᠦᠷᠤ ᠵᠡᠭᠦᠨ ᠬᠤᠢᠳᠤ ᠭᠠᠵᠠᠷ ᠮᠠᠨᠳᠤᠭᠰᠠᠨ ᠲᠤᠯᠠ ᠡᠬᠢᠨ ᠳᠡᠬᠡᠨ ᠵᠦᠩᠶᠤᠸᠠᠨ ᠣᠷᠣᠨ ᠤ ᠠᠷᠠᠳ ᠢᠷᠭᠡᠳ᠂ ᠶᠤᠰᠤ ᠵᠠᠩᠰᠢᠯ ᠢ ᠰᠠᠢᠨ ᠮᠡᠳᠡᠬᠦ ᠦᠭᠡᠢ ᠶᠢᠨ ᠲᠤᠯᠠ ᠳ᠋ᠦᠩᠫᠢᠩ ᠭᠠᠵᠠᠷ ᠰᠦᠩ ᠤᠯᠤᠰ ᠤᠨ ᠬᠦᠮᠤᠨ ᠯᠢᠤ ᠢᠤᠢ ᠶᠢ ᠡᠷᠭᠦᠮᠵᠢᠯᠡᠵᠤ ᠦᠪᠡᠷ ᠢ ᠪᠡᠨ ᠲᠦᠯᠦᠭᠡᠯᠡᠭᠦᠯᠦᠨ ᠵᠦᠩᠶᠤᠸᠠᠨ ᠣᠷᠣᠨ ᠳ᠋ᠥ ᠨᠠᠢ᠌ᠮᠠᠨ ᠵᠢᠯ ᠵᠠᠰᠠᠭᠯᠠᠭᠤᠯᠤᠭᠠᠳ ᠲᠦᠷᠤ ᠪᠠᠨ ᠰᠢᠯᠵᠢᠭᠦᠯᠦᠨ ᠠᠪᠤᠭᠰᠠᠨ ᠶᠤᠮ᠃ ᠡᠨᠡ ᠪᠣᠯ ᠲᠦᠷᠤ ᠲᠣᠭᠳᠠᠨᠢᠵᠤ ᠪᠠᠢᠬᠤ ᠦᠶᠡ ᠳᠦ ᠬᠡᠷᠡᠭᠯᠡᠵᠦ ᠪᠣᠯᠬᠤᠢᠴᠠ ᠮᠡᠷᠭᠡᠨ ᠠᠷᠭᠠ ᠮᠦᠨ ᠲᠤᠯᠠ ᠠᠩᠬᠠᠷᠤᠯ ᠳᠠᠭᠠᠨ ᠠᠪᠬᠤ ᠶᠢ ᠬᠦᠰᠡᠨᠡ᠃
ᠬᠣᠶᠠᠷ ᠤᠯᠠᠭᠠᠨ ᠮᠦᠷ ᠲᠤ ᠨᠢᠭᠡ ᠯᠠ ᠰᠠᠨᠠᠭᠠ ᠶᠢ ᠳᠠᠪᠲᠠᠭᠰᠠᠨ ᠪᠠᠢᠨᠠ ᠄ ᠲᠠᠢᠬᠠᠩᠱᠠᠨ ᠠᠴᠠ ᠵᠡᠭᠦᠨᠰᠢ᠂ ᠬᠠᠳᠤᠨ ᠭᠣᠣᠯ ᠠᠴᠠ ᠬᠤᠢᠰᠢ ᠬᠢ ᠭᠠᠵᠠᠷ ᠨᠤᠲᠤᠭ ᠲᠤ ᠭᠡᠭᠡᠨ ᠨᠣᠶᠠᠨ ᠲᠣᠮᠢᠯᠠᠵᠤ ᠲᠠᠲᠠᠪᠤᠷᠢ ᠠᠴᠠ ᠴᠢᠯᠦᠭᠡᠯᠡᠬᠦ ᠶᠢ ᠭᠤᠶᠤᠵᠠᠢ᠃ ᠬᠠᠷᠠᠮᠨᠠᠯ ᠦᠭᠡᠢ ︽ ᠰᠤᠷᠭᠠᠬᠰᠠᠨ︾ ︽ ᠲᠦᠷᠤ ᠶᠢ ᠵᠠᠰᠠᠵᠤ ᠢᠷᠭᠡᠳ ᠢ ᠲᠡᠵᠢᠭᠡᠬᠦ ᠶᠤᠰᠤᠨ ︾ ᠭᠡᠳᠡᠭ ᠨᠢ ᠡᠢᠮᠤ ᠯᠡ ᠵᠣᠢᠯ᠃ ᠡᠨᠳᠡ ᠠᠯᠠᠵᠤ ᠬᠢᠳᠤᠬᠤ ᠪᠡᠨ ᠪᠠᠭᠠᠰᠬᠠᠬᠤ ᠶᠢ ᠢᠳᠬᠠᠭᠰᠠᠨ ᠦᠭᠡ ᠶᠢᠨ ᠵᠦᠢᠳᠡᠰᠤ ᠴᠦ ᠦᠭᠡᠢ ᠶᠤᠮ᠃
ᠴᠠᠩᠴᠦ᠋ᠨ ᠪᠣᠮᠪᠣ ᠶᠠᠭᠤᠨ ᠳᠤ ᠡᠨᠡ ᠬᠡᠰᠡᠭ ᠭᠠᠵᠠᠷ ᠣᠷᠣᠨ ᠢ ᠣᠨᠴᠠᠯᠠᠨ ᠳᠤᠷᠠᠳᠴᠤ ᠪᠠᠢᠬᠤ ᠪᠣᠢ ᠭᠡᠪᠡᠯ ᠡᠨᠡ ᠨᠢ ᠲᠡᠭᠦᠨ ᠦ ᠲᠦᠷᠦᠭᠰᠡᠨ ᠨᠤᠲᠤᠭ᠂ ᠪᠠᠰᠠ ᠠᠵᠢᠯ ᠤᠨ ᠭᠠᠵᠠᠷ ᠪᠣᠶᠦ ᠪᠢᠰᠢᠯᠭᠠᠯ ᠬᠢᠳᠡᠭ ᠰᠦᠮᠡ ᠨᠢ ᠴᠦ ᠲᠡᠨᠳᠡ ᠪᠠᠢᠭᠠ ᠪᠣᠯᠬᠣᠷ ᠶᠤᠮ᠃ ᠣᠳᠤ ᠶᠢᠨ ᠦᠭᠡ ᠪᠡᠷ ᠬᠡᠯᠡᠪᠡᠯ ᠬᠥᠭᠰᠢᠨ ᠪᠣᠮᠪᠤ ᠬᠤᠪᠢ ᠶᠢᠨ ᠪᠢᠽᠢᠨᠢᠰ ᠢᠶᠡᠨ ᠠᠮᠵᠢᠭᠤᠯᠬᠤ ᠭᠡᠳ ᠪᠠᠢᠭᠠ ᠬᠡᠷᠡᠭ᠃ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠲᠠᠢᠨ ᠤ ᠬᠥᠯ ᠡᠴᠡ ᠠᠪᠤᠷᠠᠬᠤ ᠶᠢ ᠭᠤᠶᠤᠭᠰᠠᠨ ᠨᠢ ᠵᠦᠪᠬᠡᠨ ᠠᠯᠳᠠᠨ ᠤᠯᠤᠰ ᠲᠦ ᠪᠠᠭᠳᠠᠬᠰᠠᠨ ᠬᠢᠲᠠᠳ ᠭᠠᠵᠠᠷ ᠪᠣᠯᠬᠤ ᠠᠴᠠ ᠪᠢᠰᠢ ᠦᠨᠤ ᠶᠢᠨ ᠬᠢᠲᠠᠳ ᠲᠡᠤᠬᠡᠴᠢᠳ ᠤᠨ ᠰᠦᠷ ᠲᠠᠲᠠᠭᠠᠳ ᠪᠠᠢᠭᠠ ᠮᠡᠲᠤ ︽ ᠵᠦᠩᠭᠦᠢᠸ᠋ᠸ ᠂ ᠬᠠᠨ ᠦᠨᠳᠦᠰᠤᠲᠡᠨ ᠤ ᠡᠮᠤᠨᠡ ᠠᠴᠠ ᠠᠪᠤᠷᠠᠯ ᠡᠷᠢᠬᠦ ᠪᠠᠷ ᠣᠴᠢᠭᠰᠠᠨ︾ ᠬᠡᠷᠡᠭ ᠣᠭᠲᠣ ᠪᠢᠰᠢ ᠭᠡᠳᠡᠭ ᠢ ᠲᠡᠭᠡᠷᠡᠬᠢ ᠶᠠᠷᠢᠶᠠ ᠭᠡᠷᠡᠴᠢᠯᠠᠵᠤ ᠪᠠᠢᠨᠠ᠃ ᠴᠠᠩᠴᠦ᠋ᠨ ᠪᠣᠮᠪᠣ ᠵᠦᠩᠭᠦᠢᠸ᠋ᠸ᠂ ᠬᠠᠨ ᠦᠨᠳᠤᠰᠤᠲᠡᠨ ᠢ ᠪᠠᠭᠳᠠᠭᠠᠬᠤ ᠠᠭᠤᠳᠠᠮ ᠴᠡᠭᠡᠵᠢ ᠪᠠᠢᠭᠰᠠᠨ ᠦᠭᠡᠢ ᠨᠢ ᠬᠢᠲᠠᠳ ᠬᠦᠮᠤᠨ ᠤ ᠲᠡᠤᠬᠡᠨ ᠣᠢᠯᠠᠭᠠᠯᠲᠠ ᠲᠠᠢ ᠬᠣᠯᠪᠣᠭᠠ ᠲᠠᠢ᠃ ᠬᠢᠲᠠᠳ ᠤᠳ ᠡᠷᠲᠡᠨ ᠡᠴᠡ ᠦᠪᠡᠷ ᠢ ᠪᠡᠨ ᠵᠦᠩᠭᠦᠢᠸ᠋ᠸ᠂ ᠬᠠᠨ ᠦᠨᠳᠦᠰᠤᠲᠡᠨ ᠭᠡᠵᠤ ᠨᠡᠷᠡᠯᠡᠭᠡᠳ ᠢᠷᠡᠭᠰᠡᠨ ᠪᠢᠰᠢ᠂ ᠬᠠᠨ ᠲᠦᠷᠤ ᠶᠢᠨ ᠦᠶᠡ ᠳᠦ ᠪᠣᠯ ᠬᠠᠨ ᠬᠦᠮᠤᠨ᠂ ᠶᠤᠸᠠᠨ ᠤ ᠦᠶᠡ ᠳᠦ ᠪᠣᠯ ᠶᠤᠸᠠᠨ ᠬᠦᠮᠤᠨ᠂ ᠲᠠᠢᠴᠢᠩ ᠭᠦᠷᠤᠨ ᠤ ᠦᠶᠡ ᠳᠦ ᠪᠣᠯ ᠲᠠᠢᠴᠢᠩ ᠬᠦᠮᠤᠨ ᠪᠣᠶᠣ ᠢᠷᠭᠡᠨ ᠭᠡᠳᠡᠭ ︵ᠵᠡᠭᠦᠯᠲᠡ 20︶ ᠪᠠᠢᠵᠠᠢ ᠃ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢ ᠲᠦᠷᠦᠬᠦ ᠦᠶᠡ ᠳᠦ ᠠᠯᠳᠠᠨ ᠤᠯᠤᠰ ᠲᠤᠭᠳᠠᠨᠢᠭᠠᠳ 33 ᠵᠢᠯ ᠪᠤᠯᠵᠤ᠂ ᠲᠠᠢᠬᠠᠩᠱᠠᠨ ᠠᠴᠠ ᠵᠡᠭᠦᠨᠰᠢ᠂ ᠬᠠᠳᠤᠨ ᠭᠣᠣᠯ ᠠᠴᠠ ᠬᠤᠢᠰᠢ ᠬᠢ ᠭᠠᠵᠠᠷ ᠨᠢ ᠠᠯᠳᠠᠨ ᠤᠯᠤᠰ ᠤᠨ ᠨᠤᠲᠤᠭ ᠲᠡᠪᠢᠰᠭᠡᠷ ᠪᠣᠯᠣᠭᠠᠳ 22 ᠵᠢᠯ ᠪᠣᠯᠣᠭᠰᠠᠨ ᠪᠠᠢᠪᠠ᠂ ᠥᠭᠡᠷᠡ ᠪᠠᠷ ᠬᠡᠯᠡᠪᠡᠯ ᠴᠠᠩᠴᠦ᠋ᠨ ᠪᠣᠮᠪᠣ ᠨᠢᠳᠦ ᠪᠡᠨ ᠨᠡᠭᠡᠭᠡᠬᠦ ᠳᠦ ᠵᠦᠩᠭᠦᠢᠸ᠋ᠸ ᠬᠦᠮᠤᠨ ᠪᠢᠰᠢ ᠠᠯᠳᠠᠨ ᠤᠯᠤᠰ ᠤᠨ ᠬᠦᠮᠤᠨ᠃ ᠲᠡᠭᠦᠨ ᠦ ᠡᠬᠡ ᠤᠯᠤᠰ ᠪᠣᠯ ᠠᠯᠳᠠᠨ ᠤᠯᠤᠰ ᠶᠤᠮ᠃
ᠬᠤᠶᠠᠷ ᠰᠤᠳᠤᠯᠤᠭᠳᠠᠬᠤᠨ ᠢ ᠨᠠᠷᠢᠨ ᠰᠢᠭᠦᠨ ᠦᠵᠡᠭᠰᠡᠨ ᠦ ᠡᠴᠤᠰ ᠲᠤ᠂ ᠴᠢᠩᠭᠢᠰ ᠬᠠᠭᠠᠨ ᠪᠠᠷ ᠴᠠᠩᠴᠦ᠋ᠨ ᠪᠣᠮᠪᠤ ᠠᠴᠠ ︽ᠲᠦᠷᠤ ᠶᠢ ᠵᠠᠰᠠᠬᠤ ᠤᠬᠠᠭᠠᠨ ᠢ ᠠᠰᠠᠭᠤᠬᠰᠠᠨ︾᠂ ᠴᠠᠩᠴᠦ᠋ᠨ ᠪᠣᠮᠪᠣ ᠨᠢ ᠴᠢᠩᠭᠢᠰ ᠬᠠᠭᠠᠨ ᠳᠤ ︽ ᠠᠯᠠᠵᠤ ᠬᠢᠳᠤᠬᠤ ᠪᠠᠨ ᠪᠠᠭᠠᠰᠬᠠᠬᠤ ᠶᠢ ᠢᠳᠬᠠᠭᠰᠠᠨ︾ ᠶᠠᠪᠤᠳᠠᠯ ᠣᠭᠲᠣ ᠪᠠᠢᠭᠠ ᠦᠭᠡᠢ᠂ ᠡᠨᠡ ᠪᠣᠯ ᠪᠦᠭᠦᠳᠡ ᠬᠢᠲᠠᠳ ᠪᠢᠴᠢᠭᠲᠡᠳ ᠦᠨ ᠳᠤᠷᠠ ᠮᠡᠳᠡᠨ ᠵᠣᠭᠢᠶᠠᠭᠰᠠᠨ ᠱᠠᠯ ᠬᠤᠳᠠᠯ ᠵᠤᠢᠯᠡᠰ ᠭᠡᠳᠡᠭ ᠨᠢ ᠲᠣᠳᠣᠷᠬᠠᠢ ᠪᠠᠢᠨᠠ᠃
ᠬᠤᠶᠠᠷ᠂ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠴᠢᠩᠭᠢᠰ ᠬᠠᠭᠠᠨ ᠲᠠᠢ ᠠᠭᠤᠯᠵᠠᠬᠤ ᠶᠢ ᠰᠢᠭᠤᠳᠤᠭᠰᠠᠨ ᠵᠢᠩᠬᠢᠨᠢ ᠰᠢᠯᠳᠠᠭᠠᠨ
ᠴᠠᠩᠴᠦ᠋ᠨ ᠪᠣᠮᠪᠣ ︽ ᠡᠮᠤᠨᠡᠳᠤ ᠰᠦᠩ᠂ ᠠᠯᠳᠠᠨ ᠤᠯᠤᠰ ᠤᠨ ᠬᠠᠭᠠᠨ ᠵᠠᠯᠠᠭᠠᠳ ᠪᠦᠷ ᠣᠴᠢᠭᠰᠠᠨ ᠦᠭᠡᠢ ︾ ︵ ᠵᠡᠭᠦᠯᠲᠡ 21︶ ᠪᠠᠢᠵᠤ᠂ ᠶᠠᠭᠠᠬᠢᠭᠠᠳ ᠬᠡᠯᠡ ᠠᠮᠠ ᠶᠢ ᠨᠢ ᠮᠡᠳᠡᠬᠦ ᠦᠭᠡᠢ᠂ ᠤᠭᠰᠠᠭᠠ ᠭᠠᠷᠤᠯ ᠥᠭᠡᠷᠡ᠂ ︽ ᠠᠯᠠᠵᠤ ᠬᠢᠲᠤᠬᠤ ᠶᠢ ᠯᠡ ᠮᠡᠳᠡᠳᠡᠭ ᠤᠮᠠᠷᠠᠳᠤ ᠶᠢᠨ ᠵᠡᠷᠯᠢᠭ ᠤᠳ︾ ᠦᠨ ᠬᠠᠭᠠᠨ ᠳᠠᠭᠤᠳᠠᠬᠤ ᠪᠡᠷ ᠨᠢ ᠠᠭᠤᠯᠵᠠᠬᠤ ᠪᠡᠷ ᠪᠣᠯᠪᠠ︖ ᠭᠡᠪᠡᠯ ᠡᠨᠡ ᠨᠢ ᠲᠤᠬᠠᠢ ᠶᠢᠨ ᠦᠶᠡ ᠶᠢᠨ ᠮᠣᠩᠭᠣᠯ ᠤᠨ ᠪᠠᠢᠯᠳᠤᠨ ᠲᠠᠭᠠᠭᠤᠯᠬᠤ ᠲᠠᠢᠨ ᠤ ᠶᠠᠪᠤᠴᠠ ᠲᠠᠢ ᠰᠢᠭᠤᠳ ᠬᠣᠯᠪᠤᠭᠠ ᠲᠠᠢ᠃
ᠴᠠᠩᠴᠦ᠋ᠨ ᠪᠣᠮᠪᠣ ᠴᠢᠩᠭᠢᠰ ᠬᠠᠭᠠᠨ ᠤ ᠲᠠᠭᠤᠳᠠᠭᠰᠠᠨ ᠵᠠᠷᠯᠢᠭ ᠢ ᠣᠯᠬᠣ ᠦᠶᠡ ︵1219 ᠣᠨ︶ ᠳᠦ ᠠᠯᠳᠠᠨ ᠤᠯᠤᠰ ᠤᠨ ᠨᠡᠢᠰᠯᠡᠯ ᠵᠦᠩᠳᠤ ᠬᠣᠲᠠ ᠮᠣᠩᠭᠣᠯ ᠴᠡᠷᠢᠭ ᠳᠤ ᠡᠵᠡᠯᠡᠭᠳᠡᠭᠡᠳ ᠲᠦᠷᠪᠡᠨ ᠵᠢᠯ ᠪᠣᠯᠣᠭᠰᠠᠨ ᠲᠡᠳᠤᠢ ᠦᠭᠡᠢ ᠶᠡᠬᠡ ᠣᠯᠠᠨ ᠬᠢᠵᠠᠭᠠᠷ ᠨᠤᠲᠤᠭ ᠨᠢ ᠵᠠᠯᠭᠠᠭᠠ ᠪᠠᠷ ᠮᠣᠩᠭᠣᠯ ᠤᠯᠤᠰ ᠤᠨ ᠬᠠᠷᠢᠶᠠᠨ ᠳᠤ ᠤᠷᠤᠭᠰᠠᠭᠠᠷ᠂ ᠠᠯᠳᠠᠨ ᠤᠯᠤᠰ ᠮᠦᠬᠦᠬᠦ ᠨᠢ ᠴᠠᠭ ᠬᠤᠭᠤᠴᠠᠭᠠᠨ ᠤ ᠯᠡ ᠠᠰᠠᠭᠤᠳᠠᠯ ᠪᠣᠯᠣᠭᠠᠳ ᠪᠠᠢᠪᠠ᠃ ᠲᠠᠪᠢᠨ ᠵᠢᠯ ᠪᠢᠰᠢᠯᠭᠠᠯ ᠬᠢᠭᠰᠡᠨ ᠬᠦᠭᠰᠢᠨ ᠪᠤᠮᠪᠤ ᠨᠡᠢᠭᠡᠮ ᠦᠨ ᠡᠢᠮᠤ ᠲᠣᠮᠣ ᠬᠤᠪᠢᠰᠤᠯ ᠢ ᠠᠨᠳᠠᠨᠠ ᠭᠡᠵᠤ ᠪᠠᠢᠬᠤ ᠦᠭᠡᠢ᠃ ᠬᠢᠲᠠᠳ ᠬᠦᠮᠤᠨ ᠤ ᠲᠡᠤᠬᠡ ᠶᠢᠨ ᠣᠢᠯᠠᠭᠠᠯᠲᠠ ᠪᠠᠷ ᠪᠣᠯ ︽ ᠢᠷᠡᠭᠡᠳᠤᠢ ᠶᠢᠨ ᠡᠵᠡᠨ ︾ ᠨᠢ ᠲᠡᠭᠦᠨ ᠢ ᠲᠠᠭᠤᠳᠠᠭᠰᠠᠨ ᠪᠠᠢᠨᠠ᠃ ᠴᠢᠩᠭᠢᠰ ᠬᠠᠭᠠᠨ ︽ ᠰᠢᠲᠠᠷ ᠲᠦᠰᠢᠮᠡᠯ ᠯᠢᠤ ᠵᠦᠩ ᠯᠤ᠋ ᠳ᠋ᠤᠷ ᠪᠠᠷᠰ ᠤᠨ ᠲᠣᠯᠤᠭᠠᠢᠲᠤ ᠠᠯᠲᠠᠨ ᠫᠠᠢᠵᠠ ᠵᠡᠭᠦᠯᠭᠡᠵᠤ ᠢᠯᠡᠭᠡᠪᠡᠢ᠃ ᠲᠡᠷᠡ ᠫᠠᠢᠵᠠ ᠳ᠋ᠤᠷ ᠪᠢᠴᠢᠭᠰᠡᠨ ᠢᠨᠤ᠂ ᠡᠵᠡᠨ ᠪᠢ ᠪᠡᠶᠡ ᠪᠡᠷ ᠬᠦᠷᠦᠭᠰᠡᠨ ᠯᠤᠭᠡ ᠠᠳᠠᠯᠢ᠂ ᠵᠠᠷᠯᠢᠭ ᠤᠨ ᠶᠣᠰᠣᠭᠠᠷ ᠭᠦᠢᠴᠡᠳᠭᠡᠭᠳᠦᠨ ᠬᠡᠮᠡᠵᠦᠬᠦᠢ︾ ︵ᠵᠡᠭᠦᠯᠲᠡ 22︶᠃ ᠯᠢ ᡁᠢ ᠴᠠᠩ ︽ ᠪᠠᠭᠰᠢ ᠶᠢᠨ ᠪᠡᠶᠡ ᠡᠨᠡ ᠵᠠᠯᠠᠯᠭᠠ ᠶᠢ ᠲᠦᠯᠬᠢᠵᠤ ᠡᠰᠡ ᠪᠣᠯᠬᠤ ᠶᠢ ᠮᠡᠳᠡᠭᠡᠳ︾ ︵ ᠵᠡᠭᠦᠯᠲᠡ23︶ ᠭᠡᠵᠤ ᠪᠢᠴᠢᠭᠰᠡᠨ ᠨᠢ ᠶᠠᠭ ᠡᠨᠡ ᠳᠠᠯᠳᠠ ᠶᠤᠰᠤ ᠤᠴᠢᠷ ᠢ ᠦᠭᠦᠯᠡᠭᠰᠡᠨ ᠶᠤᠮ᠃ ᠢᠷᠡᠭᠡᠳᠤᠢ ᠶᠢᠨ ᠡᠵᠡᠨ ᠡᠴᠡ ᠢᠷᠡᠭᠰᠡᠨ ᠲᠠᠭᠤᠳᠠᠯᠭᠠ ᠨᠢ ᠲᠡᠭᠦᠨ ᠦ ᠬᠤᠪᠢ ᠳᠤ ᠠᠮᠢᠳᠤ ᠦᠯᠡᠳᠡᠬᠦ ᠶᠢᠨ ᠠᠵᠠ ᠵᠠᠪᠰᠢᠶᠠᠨ᠂ ᠪᠠᠲᠤᠯᠠᠭᠠ ᠶᠤᠮ ᠪᠠᠢᠵᠠᠢ᠃ ᠡᠨᠡ ᠪᠣᠯ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠴᠢᠩᠭᠢᠰ ᠬᠠᠭᠠᠨ ᠲᠠᠢ ᠠᠭᠤᠯᠵᠠᠬᠤ ᠠᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠠᠢᠭᠰᠠᠨ ᠦ ᠭᠠᠭᠴᠠ ᠰᠢᠯᠲᠠᠭᠠᠨ ᠨᠢ ᠶᠤᠮ᠃
ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠬᠢᠭᠰᠡᠨ ᠠᠶᠠᠯᠠᠯ ᠪᠣᠯ ᠬᠢᠲᠠᠳ ᠤᠳ ᠤᠨ ᠪᠢᠴᠢᠵᠤ ᠪᠠᠢᠭᠠ ᠰᠢᠭ᠋ ᠰᠠᠢᠨ ᠳᠤᠷᠠ ᠠᠴᠠ ᠪᠡᠨ ᠡᠩ ᠲᠠᠢᠪᠤᠩ ᠤᠨ ᠴᠠᠭᠠᠨ ᠲᠠᠭᠲᠠᠭᠠ ᠪᠣᠯᠵᠤ ᠬᠥᠭᠡᠷᠦᠬᠦᠨ ᠳᠠᠯᠠᠪᠴᠢ ᠪᠠᠨ ᠳᠡᠪᠢᠨ ᠳᠡᠪᠢᠭᠰᠡᠭᠡᠷ ᠬᠦᠷᠦᠭᠡᠳ ᠣᠴᠢᠬᠤ ᠣᠷᠣᠨ ᠵᠠᠢ ᠪᠢᠰᠢ᠂ ᠬᠦᠵᠦᠭᠦᠨ ᠲᠡᠭᠡᠷᠡ ᠬᠢᠲᠤᠭᠠ ᠢᠷᠡᠬᠦ ᠦᠶᠡ ᠳᠦ ᠯᠡ ᠬᠢᠬᠦ ᠰᠤᠩᠭᠤᠯᠲᠠ᠂ ᠭᠦᠢᠴᠡᠭᠡᠬᠦ ᠠᠯᠪᠠ ᠶᠤᠮ᠃ ᠴᠠᠩᠴᠦ᠋ᠨ ᠪᠣᠮᠪᠣ ᠤᠷᠢᠯᠭᠠ ᠶᠢ ᠣᠯᠣᠭᠰᠠᠨ ᠲᠡᠷᠡ ᠰᠠᠷᠠ ᠳᠠᠭᠠᠨ ᠨᠤᠲᠤᠭ ᠠᠴᠠ ᠪᠠᠨ ᠭᠠᠷᠤᠭᠰᠠᠨ ᠪᠣᠯᠪᠠᠴᠤ ᠠᠶᠠᠨ ᠵᠠᠮ ᠤᠨ ᠠᠯᠤᠰ ᠬᠤᠯᠠ᠂ ᠭᠣᠪᠢ ᠴᠦᠯ ᠤᠨ ᠪᠡᠷᠬᠡ ᠪᠠᠷᠲᠠᠭᠠ ᠳᠦ ᠨᠠᠰᠤᠲᠠᠨ ᠪᠤᠭᠤᠷᠤᠯ ᠪᠣᠯᠣᠭᠰᠠᠨ ᠲᠡᠷᠡ ᠪᠡᠷ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠬᠠᠯᠠᠰᠢᠷᠠᠨ ᠴᠦᠬᠦᠵᠤ᠂ ᠬᠤᠶᠠᠷ ᠴᠤ ᠤᠳᠠᠭᠠ ᠠᠶᠠᠯᠠᠯ ᠢᠶᠠᠨ ᠵᠣᠭᠰᠣᠭᠠᠬᠤ ᠶᠢ ᠭᠤᠶᠤᠴᠢᠯᠠᠵᠤ ᠪᠠᠢᠵᠠᠢ᠃ ᠯᠠᠢᠵᠸᠤ ᠳᠠᠬᠢ ᠰᠦᠮᠡ ᠡᠴᠡ ᠪᠠᠨ ᠭᠠᠷᠴᠤ ᠪᠡᠭᠡᠵᠢᠩ ᠬᠦᠷᠴᠤ ᠢᠷᠡᠭᠡᠳ ︽ ᠨᠡᠭᠦᠳᠡᠯ ᠣᠷᠳᠣᠨ ᠠᠭᠠᠵᠢᠮ ᠢᠶᠠᠷ ᠪᠠᠷᠠᠭᠤᠨᠰᠢᠯᠠᠪᠠᠢ ᠬᠡᠮᠡᠨ ᠪᠠᠭᠰᠢ ᠰᠣᠨᠣᠰᠤᠭᠠᠳ ᠁ ᠡᠵᠡᠨ ᠦ ᠪᠤᠴᠠᠨ ᠢᠷᠡᠬᠦᠢ ᠳ᠋ᠤᠷ ᠵᠤᠯᠭᠠᠬᠤᠢ ᠶᠢ ᠪᠣᠳᠣᠮᠣᠢ︾ ︵ ᠵᠡᠭᠦᠯᠲᠡ 24︶ ᠭᠡᠰᠡᠨ ᠳᠦ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠲᠣᠰᠬᠤ ᠪᠠᠷ ᠢᠷᠡᠭᠰᠡᠨ ᠯᠢᠤ ᠵᠦᠩ ᠯᠤ᠋ ᠵᠦᠪᠰᠢᠶᠡᠷᠡᠭᠰᠡᠨ ᠦᠭᠡᠢ᠃ ᠮᠦᠨ ᠵᠠᠮ ᠤᠨ ᠬᠠᠭᠠᠰ ᠨᠢ ᠪᠣᠯᠬᠤ ᠠᠯᠳᠠᠢ ᠶᠢᠨ ᠲᠣᠣᠷᠠ ᠨᠣᠶᠠᠨ ᠴᠢᠩᠬᠠᠢ ᠶᠢᠨ ᠬᠠᠷᠢᠶᠠ ᠭᠠᠵᠠᠷ ᠢᠷᠡᠭᠡᠳ ︽ ᠡᠨᠡ ᠭᠠᠵᠠᠷ ᠡᠪᠦᠯᠵᠢᠭᠡᠳ ᠡᠵᠡᠨ ᠦ ᠶᠡᠬᠡ ᠴᠡᠷᠢᠭ ᠪᠤᠴᠠᠬᠤ ᠶᠢ ᠬᠦᠯᠢᠶᠡᠬᠦ ᠶᠢ ᠬᠦᠰᠡᠮᠤᠢ︾ ᠭᠡᠰᠡᠨ ᠳ᠋ᠥ ᠴᠢᠩᠬᠠᠢ ︽ᠠᠷᠰᠢ ᠲᠠ ᠡᠨᠳᠡ ᠰᠠᠭᠤᠪᠠᠰᠤ ᠶᠠᠯᠠ ᠢᠨᠤ ᠴᠢᠩᠬᠠᠢ ᠨᠠᠳᠠ ᠳ᠋ᠤᠷ ᠢᠷᠡᠬᠦ︾ ︵ ᠵᠡᠭᠦᠯᠲᠡ 25︶ ᠭᠡᠵᠤ ᠤᠷᠠᠨ ᠢᠶᠠᠷ ᠲᠠᠲᠠᠭᠠᠯᠵᠠᠭᠠᠳ ︽ ᠮᠢᠨᠤ ᠪᠡᠶᠡ ᠳᠤᠷᠠᠲᠠᠶᠠ ᠪᠠᠭᠰᠢ ᠶᠢ ᠪᠡᠶᠡ ᠪᠡᠷ ᠳᠠᠭᠠᠯᠳᠤᠨ ᠮᠣᠷᠳᠠᠶᠠ︾ ︵ ᠵᠡᠭᠦᠯᠲᠡ 26︶ ᠭᠡᠳ ᠰᠠᠮᠠᠷᠺᠠᠨᠲ ᠠᠴᠠ ᠴᠠᠭᠠᠨᠠ ᠣᠷᠣᠰᠢᠬᠤ ᠪᠠᠷᠠᠭᠠᠨ ᠬᠡᠭᠡᠷᠡ ᠭᠡᠳᠡᠭ ᠭᠠᠵᠠᠷ ᠪᠠᠢᠭᠰᠠᠨ ᠴᠢᠩᠭᠢᠰ ᠬᠠᠭᠠᠨ ᠤ ᠠᠶᠠᠨ ᠤ ᠣᠷᠳᠣ ᠬᠦᠷᠲᠡᠯᠡ ᠪᠡᠷᠡ ᠪᠣᠯᠵᠤ ᠶᠠᠪᠤᠭᠰᠠᠨ ᠪᠠᠢᠳᠠᠭ᠃
ᠦᠨᠡᠨ ᠳᠡᠬᠡᠨ ᠪᠣᠮᠪᠣ ᠶᠢᠨ ᠪᠡᠶᠡ ᠲᠠᠭᠠᠷᠠᠤᠬᠠᠨ ᠪᠠᠢᠵᠠᠢ᠂ ᠬᠤᠷᠠᠯ ᠳᠤ ᠬᠠᠮᠲᠤ ᠰᠠᠭᠤᠳᠠᠭ ᠪᠠᠢᠭᠰᠠᠨ ᠶᠧᠯᠸᠢ ᠴᠦᠰᠠᠢ ︽ ᠪᠡᠶᠡ ᠨᠢ ᠶᠡᠬᠡᠳᠡ ᠰᠢᠨᠠᠯᠤᠨ ᠵᠣᠪᠠᠳᠠᠭ ᠪᠠᠢᠭᠰᠠᠨ᠂ ᠦᠬᠦᠵᠤ ᠮᠠᠭᠠᠳ ᠁︾ ᠬᠦᠷᠲᠡᠯᠡ ᠲᠡᠮᠳᠡᠭᠯᠡᠵᠦ ᠪᠠᠢᠭᠰᠠᠨ ︵ ᠵᠡᠭᠦᠯᠲᠡ 27︶ ᠭᠡᠳ ᠪᠣᠳᠣ᠃ ᠪᠣᠮᠪᠣ ᠲᠤᠮᠳᠠᠳᠤ ᠠᠽᠢᠶᠠ ᠠᠴᠠ ᠪᠤᠴᠠᠵᠤ ᠢᠷᠡᠭᠡᠳ ᠲᠦᠷᠪᠡᠬᠡᠨ ᠵᠢᠯ ᠪᠣᠯᠣᠭᠠᠳ ᠨᠠᠰᠤ ᠪᠠᠷᠠᠪᠠ᠃ ᠠᠷᠪᠠ ᠶᠢᠰᠤ ᠲᠠᠢ ᠭᠡᠷ ᠡᠴᠡ ᠭᠠᠷᠴᠤ ᠨᠠᠰᠤᠨ ᠲᠤᠷᠰᠢ ᠪᠢᠰᠢᠯᠠᠭᠠᠯ ᠬᠢᠵᠤ ᠡᠷᠡᠭᠦᠯ᠂ ᠤᠷᠲᠤ ᠨᠠᠰᠤᠯᠠᠬᠤ ᠶᠢ ᠬᠦᠭᠡᠭᠡᠴᠡᠯᠳᠦᠭᠰᠡᠨ ᠲᠡᠷᠡ ᠪᠡᠷ ᠮᠣᠷᠢᠨ ᠨᠢᠷᠤᠭᠤᠨ ᠲᠡᠭᠡᠷᠡ ᠠᠮᠢᠳᠤᠷᠠᠭᠰᠠᠨ ᠴᠢᠩᠭᠢᠰ ᠬᠠᠭᠠᠨ ᠠᠴᠠ ᠠᠷᠪᠠᠨ ᠲᠦᠷᠪᠡᠬᠡᠨ ᠨᠠᠰᠤ ᠢᠯᠡᠭᠦᠤ ᠨᠠᠰᠤᠯᠠᠭᠰᠠᠨ ᠪᠢᠯᠡ᠃
ᠴᠠᠩᠴᠦ᠋ᠨ ᠪᠣᠮᠪᠣ᠂ ᠴᠢᠩᠭᠢᠰ ᠬᠠᠭᠠᠨ ᠲᠠᠢ ᠠᠭᠤᠯᠵᠠᠭᠰᠠᠨ ᠤ ᠠᠷᠪᠠᠨ ᠬᠣᠶᠠᠷ ᠵᠢᠯ ᠦᠨ ᠳᠠᠷᠠᠭᠠ 119 ᠵᠢᠯ ᠲᠣᠭᠳᠠᠨᠢᠭᠰᠠᠨ ᠠᠯᠳᠠᠨ ᠣᠯᠣᠰ ᠮᠦᠬᠦᠪᠡ᠃ ᠲᠦᠷᠤ ᠮᠦᠬᠦᠬᠦ ᠭᠤᠨᠢᠭᠳᠤ ᠴᠠᠭ ᠮᠦᠴᠠ ᠠᠴᠠ ᠳᠣᠯᠣᠭᠠᠨ ᠵᠢᠯ ᠤᠷᠢᠳᠴᠢᠯᠠᠨ ᠨᠢᠳᠤ ᠪᠠᠨ ᠡᠭᠦᠷᠢᠳᠡ ᠠᠨᠢᠭᠰᠠᠨ ᠨᠢ ᠪᠣᠮᠪᠣ ᠶᠢᠨ ᠬᠤᠪᠢ ᠳᠤ ᠠᠵᠠ ᠪᠣᠯᠵᠠᠢ ᠭᠡᠵᠤ ᠬᠡᠯᠡᠬᠦᠶᠡ ᠪᠡᠷᠬᠡ᠂ ᠤᠴᠢᠷ ᠨᠢ ᠲᠡᠷᠡ ᠪᠡᠷ ᠡᠨᠡ ᠭᠤᠨᠢᠭᠲᠤ ᠲᠡᠭᠦᠰᠭᠡᠯ ᠢ ᠠᠯᠢ ᠡᠷᠲᠡ ᠣᠯᠣᠭᠠᠳ ᠬᠠᠷᠠᠴᠢᠭᠰᠠᠨ ᠶᠣᠮ᠃
ᠭᠤᠷᠪᠠ᠂ ᠴᠢᠩᠭᠢᠰ ᠬᠠᠭᠠᠨ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢ ᠤᠷᠢᠭᠰᠠᠨ ᠭᠠᠭᠴᠠ ᠰᠢᠯᠲᠠᠭᠠᠨ
ᠴᠢᠩᠭᠢᠰ ᠬᠠᠭᠠᠨ ᠴᠠᠩᠴᠦ᠋ᠨ ᠪᠣᠮᠪᠣ ᠲᠠᠢ ᠠᠩᠬᠠ ᠠᠭᠤᠯᠵᠠᠮᠠᠭᠴᠠ ︽ ᠠᠷᠰᠢ ᠶᠢᠨ ᠪᠡᠶᠡ ᠠᠯᠤᠰ ᠠᠴᠠ ᠢᠷᠡᠭᠡᠳ ᠶᠠᠮᠠᠷ ᠤᠷᠲᠤ ᠨᠠᠰᠤᠯᠠᠬᠤ ᠡᠮ ᠢᠶᠡᠷ ᠮᠡᠬᠦᠰ ᠬᠦᠮᠤᠨ ᠢ ᠲᠤᠰᠠᠯᠠᠮᠤᠢ︖︾ ᠭᠡᠵᠤ ᠠᠰᠠᠭᠤᠭᠰᠠᠨ ᠨᠢ ᠬᠢᠲᠠᠳ ᠤᠨ ᠡᠷᠲᠡᠨ ᠦ ᠬᠠᠭᠠᠳ ᠰᠢᠭ᠋ ᠮᠦᠩᠭᠡᠷᠡᠬᠦ ᠡᠷᠳᠡᠨᠢ ᠶᠢᠨ ᠷᠢᠯᠤ ᠬᠠᠢᠭᠰᠠᠨ ᠪᠢᠰᠢ ᠭᠡᠳᠡᠭ ᠨᠢ ᠲᠣᠳᠣᠷᠬᠠᠢ ᠶᠤᠮ᠃ ︽ ᠴᠠᠩᠴᠦ᠋ᠨ ᠪᠣᠮᠪᠣ ᠪᠠᠷᠠᠭᠤᠨ ᠳ᠋ᠥ ᠵᠣᠷᠴᠢᠭᠰᠠᠨ ᠲᠡᠮᠳᠡᠭᠯᠡᠯ︾ ᠢ ᠮᠣᠩᠭᠣᠯᠴᠢᠯᠠᠭᠰᠠᠨ ᠨᠦᠬᠦᠷ ︽ ᠮᠦᠩᠬᠡᠷᠡᠭᠦᠯᠬᠦ ᠡᠮ︾ ᠭᠡᠵᠤ ᠪᠤᠷᠤᠭᠤ ᠣᠷᠴᠢᠭᠤᠯᠤᠭᠰᠠᠨ ᠪᠠᠢᠨᠠ᠃ ︽ᠴᠠᠩ ᠱᠸᠩ︾ ᠭᠡᠳᠡᠭ ᠲᠤ ᠤᠷᠲᠤ ᠨᠠᠰᠤᠯᠠᠬᠤ᠂ ᠮᠦᠩᠬᠡᠷᠡᠬᠦ ᠭᠡᠰᠡᠨ ᠬᠣᠶᠠᠷ ᠤᠳᠬᠠ ᠪᠠᠢᠳᠠᠭ ᠪᠣᠯᠪᠠᠴᠤ ᠡᠨᠳᠡ ᠤᠷᠲᠤ ᠨᠠᠰᠤᠯᠠᠬᠤ ᠤᠳᠬᠠ ᠪᠠᠷ ᠬᠡᠷᠡᠭᠯᠡᠭᠳᠡᠭᠰᠡᠨ ᠨᠢ ᠣᠢᠯᠠᠭᠠᠮᠵᠢᠲᠠᠢ ᠶᠤᠮ᠃ ᠶᠠᠭᠠᠬᠢᠭᠠᠳ ᠪᠤᠢ ᠭᠡᠪᠡᠯ 13 ᠳ᠋ᠤᠭᠠᠷ ᠵᠠᠭᠤᠨ ᠳᠦ ︽ ᠬᠦᠮᠤᠨ ᠮᠦᠩᠬᠡᠷᠡᠬᠦ ᠦᠭᠡᠢ︾ ᠭᠡᠳᠡᠭ ᠶᠤᠰᠤᠨ ᠢ ᠬᠦᠮᠦᠨ ᠲᠥᠷᠥᠯᠬᠢᠲᠡᠨ ᠲᠦᠭᠡᠮᠡᠯ ᠮᠡᠳᠡᠳᠡᠭ ᠪᠣᠯᠴᠢᠬᠠᠭᠰᠠᠨ ᠪᠠᠢᠵᠠᠢ᠃ ᠴᠠᠩᠴᠦ᠋ᠨ ᠢ ᠤᠷᠢᠬᠤ ᠠᠴᠠ ᠡᠮᠤᠨᠡ᠂ ᠴᠢᠩᠭᠢᠰ ᠬᠠᠭᠠᠨ ᠰᠠᠷᠲᠠᠭᠤᠯ ᠢ ᠲᠠᠢᠯᠠᠷᠠ ᠮᠣᠷᠳᠠᠬᠤ ᠳᠤ ᠶᠢᠰᠤᠢ ᠬᠠᠳᠤᠨ ︽ ᠠᠭᠤᠯᠠ ᠮᠡᠲᠤ ᠪᠡᠶᠡ ᠴᠢᠨᠢ ᠨᠤᠷᠠᠵᠤ ᠣᠳᠪᠠᠰᠤ᠂ ᠤᠯᠤᠰ ᠣᠯᠠᠨ ᠮᠣᠩᠭᠣᠯ ᠢ ᠴᠢᠨᠢ ᠬᠡᠨ ᠵᠠᠬᠢᠷᠬᠤ ᠪᠣᠢ︖ ᠲᠦᠷᠦᠭᠰᠡᠨ ᠲᠦᠷᠪᠡᠨ ᠬᠦᠤ ᠠᠴᠠ ᠴᠢᠨᠢ ᠲᠦᠷᠤ ᠶᠢ ᠪᠠᠷᠢᠬᠤ ᠨᠢ ᠬᠡᠨ ᠪᠤᠢ︖︾ ᠭᠡᠵᠤ ᠳᠤᠷᠠᠳᠬᠠᠬᠤ ᠳ᠋ᠥ ᠴᠢᠩᠭᠢᠰ ᠬᠠᠭᠠᠨ ︽ ᠪᠢ᠂ ᠡᠪᠤᠭᠡᠳ ᠤᠨ ᠬᠣᠢᠨᠠ ᠠᠴᠠ ᠣᠳᠬᠤ ᠦᠭᠡᠢ ᠮᠡᠲᠤ᠂ ᠦᠪᠡᠷ ᠢᠶᠡᠨ ᠮᠠᠷᠲᠠᠭᠰᠠᠨ ᠠᠵᠤᠭᠤ᠃ ᠦᠬᠦᠯ ᠨᠠᠳᠠ ᠠᠴᠠ ᠲᠤᠭᠤᠷᠢᠬᠤ ᠮᠡᠲᠤ ᠦᠨᠡᠬᠡᠷ ᠡᠭᠦᠨ ᠢ ᠰᠠᠨᠠᠭᠰᠠᠨ ᠦᠭᠡᠢ ᠬᠡᠮᠡᠭᠡᠳ︾ ︵ ᠵᠡᠭᠦᠯᠲᠡ 28︶ ᠵᠠᠯᠭᠠᠮᠵᠢᠯᠠᠭᠴᠢ ᠶᠢᠨ ᠠᠰᠠᠭᠤᠳᠠᠯ ᠢ ᠬᠡᠯᠡᠯᠴᠡᠭᠰᠡᠨ ᠦ ᠡᠴᠤᠰ ᠲᠦ ᠦᠭᠡᠳᠡᠢ ᠶᠡᠬᠡ ᠣᠷᠣ ᠶᠢ ᠵᠠᠯᠭᠠᠬᠤ ᠬᠦᠮᠤᠨ ᠢᠶᠠᠷ ᠲᠣᠳᠤᠷᠠᠭᠰᠠᠨ ᠪᠠᠢᠳᠠᠭ᠃ ᠦᠬᠦᠯ ᠦᠨ ᠲᠤᠬᠠᠢ ᠡᠢᠮᠤ ᠲᠣᠳᠣᠷᠬᠠᠢ ᠶᠠᠷᠢᠵᠤ ᠪᠠᠢᠭᠰᠠᠨ ᠬᠦᠮᠤᠨ ᠬᠢᠲᠠᠳ ᠪᠣᠮᠪᠣ ᠶᠢ ᠬᠠᠷᠠᠩᠭᠤᠳᠠ ᠪᠤᠴᠠᠭᠠᠳ ᠮᠦᠩᠬᠡᠷᠡᠬᠦ ᠶᠢ ᠭᠣᠷᠢᠯᠠᠨᠠ ᠭᠡᠵᠤ ᠶᠠᠭᠠᠬᠢᠵᠤ ᠪᠠᠢᠬᠤᠪ᠃
ᠤᠷᠲᠤ ᠨᠠᠰᠤᠯᠠᠬᠤ ᠶᠢ ᠬᠦᠰᠡᠬᠦ ᠪᠣᠯ ᠤᠭ ᠠᠴᠠ ᠪᠠᠨ ᠬᠦᠮᠤᠨ ᠥᠲᠡᠯᠦᠭᠡᠳ ᠢᠷᠡᠬᠦ ᠪᠡᠷ ᠠᠶᠠᠨᠳᠠᠭᠠᠨ ᠮᠦᠷᠦᠭᠡᠳᠦᠳᠡᠭ ᠵᠣᠢᠯ᠂ ᠡᠭᠦᠨ ᠳᠦ ᠬᠠᠭᠠᠨ ᠬᠠᠷᠠᠴᠤ ᠶᠢᠨ ᠢᠯᠭᠠᠯ ᠪᠠᠢᠬᠤ ᠦᠭᠡᠢ᠃ ᠭᠠᠭᠴᠠ ᠬᠠᠭᠠᠨ ᠬᠦᠮᠤᠨ ᠳᠤ ᠡᠨᠡ ᠲᠠᠯᠠ ᠶᠢᠨ ᠵᠦᠪᠯᠡᠯᠭᠡ ᠠᠪᠬᠤ ᠪᠣᠯᠣᠮᠵᠢ ᠨᠢ ᠬᠠᠷᠠᠴᠤ ᠠᠷᠠᠳ ᠲᠠᠢ ᠠᠳᠠᠯᠢᠳᠬᠠᠰᠢ ᠦᠭᠡᠢ ᠢᠯᠡᠭᠦᠤ ᠪᠠᠢᠭᠠ᠃ ᠬᠠᠷᠢᠨ ᠴᠢᠩᠭᠢᠰ ᠬᠠᠭᠠᠨ ᠶᠠᠭᠤᠨ ᠳᠤ ᠥᠭᠡᠷᠡ ᠡᠮᠴᠢ ᠳᠣᠮᠴᠢ ᠠᠴᠠ ᠪᠢᠰᠢ ᠡᠨᠡ ᠴᠠᠩᠴᠦ᠋ᠨ ᠪᠣᠮᠪᠣ ᠭᠡᠭᠴᠢ ᠶᠢ ᠲᠠᠭᠤᠳᠠᠵᠤ ᠠᠰᠠᠭᠤᠬᠤ ᠪᠣᠯᠣᠭᠰᠠᠨ ᠪᠣᠢ ᠭᠡᠪᠡᠯ ᠡᠨᠡ ᠨᠢ ᠬᠢᠲᠠᠳ ᠤᠨ ᠪᠣᠮᠪᠣ ᠶᠢᠨ ᠰᠤᠷᠲᠠᠬᠤᠨ ᠤ ᠣᠯᠠᠨ ᠵᠠᠭᠤᠨ ᠵᠢᠯ ᠦᠨ ᠲᠤᠷᠰᠢ ᠬᠢ ᠦᠪᠡᠷᠰᠡᠳ ᠤᠨ ᠲᠠᠯᠠ ᠪᠠᠷ ᠥᠰᠦᠭᠡᠨ ᠳᠥᠰᠥᠭᠡᠨ ᠲᠠᠢ ᠰᠤᠷᠲᠠᠯᠴᠢᠯᠠᠯ ᠶᠠᠪᠤᠭᠤᠯᠵᠤ ᠪᠠᠢᠭᠰᠠᠨ ᠲᠠᠢ ᠬᠣᠯᠪᠤᠭᠠ ᠲᠠᠢ ᠶᠤᠮ᠃
ᠪᠣᠮᠪᠣ ᠶᠢᠨ ᠰᠤᠷᠲᠠᠬᠤᠨ ᠤ ᠦᠨᠳᠦᠰᠦᠨ ᠵᠣᠷᠢᠯᠲᠠ ᠨᠢ ᠡᠷᠡᠭᠦᠯ ᠠᠮᠢᠳᠤᠷᠠᠬᠤ᠂ ᠤᠷᠲᠤ ᠨᠠᠰᠤᠯᠠᠬᠤ᠂ ᠠᠮᠢᠲᠠᠨ ᠳᠤ ᠲᠤᠰᠠᠯᠠᠬᠤ ᠶᠤᠮ ᠪᠠᠢᠵᠠᠢ᠃ ᠵᠣᠷᠢᠯᠲᠠ ᠳᠠᠭᠠᠨ ᠬᠦᠷᠬᠦ ᠶᠢᠨ ᠲᠥᠯᠥᠭᠡ ᠰᠡᠳᠬᠢᠯ ᠢᠶᠠᠨ ᠬᠤᠷᠢᠶᠠᠬᠤ᠂ ᠬᠣᠭᠣᠯᠠ ᠲᠠᠰᠤᠯᠬᠤ᠂ ᠬᠤᠷᠢᠴᠠᠯ ᠢ ᠬᠡᠮᠨᠡᠬᠦ᠂ ᠷᠢᠯᠤ ᠪᠦᠲᠦᠭᠡᠬᠦ ᠭᠡᠬᠦᠴᠢᠯᠡᠨ ᠠᠷᠪᠠᠭᠠᠳ ᠵᠦᠢᠯ ᠦᠨ ᠪᠢᠰᠢᠯᠭᠠᠯ ᠬᠢᠳᠡᠭ ᠶᠤᠮ ᠪᠠᠢᠨᠠ᠃ ᠪᠣᠮᠪᠣ ᠶᠢᠨ ᠬᠢᠨ ︽ ᠤᠷᠲᠤ ᠨᠠᠰᠤᠯᠡᠳ᠋ᠠᠭ᠂ ᠮᠦᠩᠬᠡᠷᠡᠳ᠋ᠡᠭ︾ ᠭᠡᠬᠦᠴᠢᠯᠡᠨ ᠦᠨᠡᠨ ᠬᠤᠳᠠᠯ ᠨᠢ ᠣᠯᠳᠠᠬᠤ ᠦᠭᠡᠢ ᠶᠠᠭᠤᠮᠠ ᠶᠢ ᠶᠡᠬᠡᠳᠡ ᠰᠤᠷᠲᠠᠯᠴᠢᠯᠠᠳᠠᠭ ᠤᠨ ᠤᠯᠠᠮ ᠠᠴᠠ ᠠᠮᠢᠳᠤᠷᠠᠯ ᠨᠢ ᠦᠶᠡ ᠶᠢᠨ ᠦᠶᠡ ᠳᠦ ᠶᠠᠮᠠᠷ ᠴᠦ ᠡᠷᠡᠮᠡᠯᠵᠡᠯᠡᠯ ᠪᠠᠢᠳᠠᠭ ᠦᠭᠡᠢ ᠬᠢᠲᠠᠳ ᠲᠠᠷᠢᠶᠠᠴᠢᠳ ᠶᠡᠬᠡᠳᠡ ᠲᠠᠲᠠᠭᠳᠠᠨ ᠴᠦᠭᠡᠨ ᠦᠭᠡᠢ ᠡᠯᠰᠡᠭᠦᠯᠦᠨ ᠣᠷᠣᠳᠠᠭ ᠪᠠᠢᠵᠠᠢ᠃ ᠮᠣᠬᠣᠷ ᠰᠦᠰᠦᠭ ᠦᠨ ᠠᠭᠤᠯᠭᠠ ᠨᠤᠭᠤᠳ ᠨᠢ ᠬᠢᠲᠠᠳ ᠢᠷᠭᠡᠳ ᠦᠨ ᠪᠠᠯᠠᠷᠯᠢᠭ ᠬᠢᠷᠢ ᠲᠦᠪᠰᠢᠨ ᠳᠦ ᠶᠠᠪ ᠴᠠᠪ ᠵᠤᠬᠢᠴᠠᠭᠰᠠᠨ ᠪᠣᠯᠬᠤᠷ ᠨᠦᠯᠦᠭᠡ ᠶᠢᠨ ᠬᠤᠪᠢ ᠳᠤ ᠺᠦᠩᠽᠢ ᠶᠢᠨ ᠰᠤᠷᠭᠠᠯ ᠲᠠᠢ ᠪᠡᠨ ᠬᠠᠷᠢᠴᠠᠭᠤᠯᠬᠤ ᠠᠷᠭᠠ ᠦᠭᠡᠢ ᠶᠡᠬᠡ ᠣᠷᠣᠨ ᠵᠠᠢ ᠶᠢ ᠡᠵᠡᠯᠡᠭᠰᠡᠨ ᠶᠤᠮ ᠪᠠᠢᠨᠠ᠃ ᠶᠠᠪᠤᠭᠠᠨ ᠳᠠᠭᠠᠨ ᠵᠣᠢᠯ ᠪᠦᠷᠢ ᠶᠢᠨ ᠵᠠᠮ ᠢᠶᠠᠷ ᠬᠢᠲᠠᠳ ᠤᠨ ᠬᠢᠯᠢ ᠶᠢ ᠳᠠᠪᠠᠵᠤ᠂ ᠣᠢᠷᠠ ᠬᠥᠷᠰᠢ ᠣᠷᠣᠨ ᠤ ᠬᠢᠨ ᠤ ᠴᠢᠬᠢᠨ ᠳᠦ ᠴᠦ ᠬᠦᠷᠬᠦ ᠨᠢ ᠲᠡᠷᠡ᠃ ᠮᠣᠩᠭᠣᠯ ᠬᠡᠯᠡᠲᠡᠨ ᠠᠢᠮᠠᠭ ᠤᠳ ᠠᠯᠢ ᠡᠷᠲᠡ ᠡᠴᠡ ᠠᠯᠲᠠᠨ ᠤᠯᠤᠰ ᠲᠠᠢ ᠬᠢᠯᠢᠯᠡᠵᠦ᠂ ᠲᠠᠢᠨ ᠳᠠᠵᠢᠨ ᠠᠷᠠᠯᠵᠢᠶᠠ ᠬᠤᠳᠠᠯᠳᠤᠭᠠ ᠭᠡᠳ ᠵᠤᠢᠯ ᠪᠦᠷᠢ ᠶᠢᠨ ᠬᠠᠷᠢᠯᠴᠠᠭᠠ ᠬᠣᠯᠪᠤᠭᠠ ᠲᠠᠢ ᠪᠠᠢᠭᠰᠠᠨ ᠤᠴᠢᠷ ᠪᠣᠮᠪᠣ ᠶᠢᠨ ᠰᠤᠷᠳᠠᠬᠤᠨ ᠬᠢᠭᠡᠳ ᠲᠡᠭᠦᠨ ᠦ ᠷᠢᠳᠢ ᠰᠢᠳᠢ ᠶᠢᠨ ᠲᠠᠯᠠ ᠪᠠᠷ ᠠᠯᠳᠠᠨ ᠣᠨᠣᠨ ᠰᠣᠨᠣᠰᠤᠭᠰᠠᠨ ᠯᠡ ᠪᠠᠢᠬᠤ ᠶᠣᠰᠤᠲᠠᠢ᠃
ᠴᠢᠩᠭᠢᠰ ᠬᠠᠭᠠᠨ ᠬᠢᠲᠠᠳ ᠤᠨ ᠪᠣᠮᠪᠣ ᠶᠢ ᠳᠠᠭᠤᠳᠠᠵᠤ ᠤᠷᠲᠤ ᠨᠠᠰᠤᠯᠠᠬᠤ ᠲᠠᠯᠠ ᠪᠠᠷ ᠠᠰᠠᠭᠤᠬᠤ ᠪᠣᠯᠣᠭᠰᠠᠨ ᠨᠢ ᠬᠢᠲᠠᠳ ᠲᠦᠰᠢᠮᠡᠯ ᠯᠢᠤ ᠵᠦᠩ ᠯᠤ᠋ ᠭᠡᠭᠴᠢ ᠶᠢᠨ ᠰᠡᠳᠦᠭᠰᠡᠨ ᠵᠣᠢᠯ ᠪᠣᠯᠬᠤ ᠶᠢ ᠪᠢᠳᠡ ᠵᠣᠢᠴᠢᠯᠠᠵᠤ ᠪᠣᠯᠣᠨᠠ᠃ ᠯᠢᠤ ᠨᠢ ᠤᠭ ᠠᠴᠠ ᠪᠠᠨ ᠴᠢᠩᠭᠢᠰ ᠬᠠᠭᠠᠨ ᠤ ᠬᠢᠲᠠᠳ ᠡᠮᠴᠢ ᠪᠠᠢᠢᠵᠠᠢ ︵ ᠵᠡᠭᠦᠯᠲᠡ 29︶᠂ ᠪᠣᠮᠪᠣ ᠶᠢᠨ ᠰᠤᠷᠲᠠᠬᠤᠨ ᠤ ᠡᠷᠡᠭᠦᠯ ᠠᠮᠢᠳᠤᠷᠠᠬᠤ ᠤᠷᠲᠤ ᠨᠠᠰᠤᠯᠠᠬᠤ ᠷᠢᠳᠢ ᠰᠢᠳᠢ ᠶᠢ ᠰᠣᠨᠣᠰᠣᠭᠰᠠᠨ ᠤ ᠪᠠᠨ ᠬᠡᠮᠵᠢᠶᠡ ᠪᠠᠷ ᠴᠢᠩᠭᠢᠰ ᠬᠠᠭᠠᠨ ᠳᠤ ᠡᠷᠭᠦᠨ ᠠᠢᠯᠠᠳᠬᠠᠬᠤ ᠨᠢ ᠲᠡᠭᠦᠨ ᠦ ᠬᠤᠪᠢ ᠳ᠋ᠥ ᠠᠵᠢᠯ ᠢᠶᠠᠨ ᠬᠢᠵᠤ ᠪᠠᠢᠬᠤ ᠬᠡᠷᠡᠭ᠃ ᠴᠢᠩᠭᠢᠰ ᠬᠠᠭᠠᠨ ᠯᠢᠤ ᠵᠦᠩ ᠯᠤ᠋ ᠳ᠋ᠥ ᠪᠠᠷᠰ ᠤᠨ ᠲᠣᠯᠣᠭᠠᠢᠲᠤ ᠫᠠᠢᠵᠠ ᠪᠠᠷᠢᠭᠤᠯᠵᠤ ᠪᠣᠮᠪᠣ ᠶᠢ ᠵᠠᠯᠠᠭᠤᠯᠬᠤ ᠪᠠᠷ ᠢᠯᠡᠭᠡᠭᠰᠡᠨ ᠨᠢ ᠶᠠᠮᠠᠷ ᠨᠢᠭᠡᠨ ᠠᠵᠢᠯ ᠢ ᠰᠠᠨᠠᠯ ᠣᠷᠣᠭᠤᠯᠤᠭᠰᠠᠨ ᠲᠦᠰᠢᠮᠡᠯ ᠢᠶᠡᠷ ᠭᠠᠷᠳᠠᠨ ᠬᠢᠯᠭᠡᠳᠡᠭ ᠬᠠᠭᠠᠨᠳᠤ ᠵᠠᠰᠠᠭᠯᠠᠯ ᠤᠨ ᠶᠡᠷᠤᠳᠡ ᠶᠢᠨ ᠶᠣᠰᠤᠨ ᠲᠠᠢ ᠨᠡᠢᠴᠡᠵᠤ ᠪᠠᠢᠬᠤ ᠶᠤᠮ᠃
ᠳᠥᠷᠪᠡ᠂ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠡᠷᠡᠭᠦᠯ ᠠᠮᠢᠳᠤᠷᠠᠵᠤ ᠤᠷᠲᠤ ᠨᠠᠰᠣᠯᠠᠬᠤ ᠵᠦᠪᠯᠡᠮᠵᠢ ᠶᠢᠨ ᠠᠭᠤᠯᠭᠠ
ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠴᠢᠩᠭᠢᠰ ᠬᠠᠭᠠᠨ ᠳᠤ ᠠᠢᠯᠠᠳᠬᠠᠭᠰᠠᠨ ᠭᠣᠣᠯ ᠵᠤᠢᠯ ᠨᠢ ᠡᠷᠡᠭᠦᠯ ᠠᠮᠢᠳᠤᠷᠠᠬᠤ ᠤᠷᠲᠤ ᠨᠠᠰᠤᠯᠠᠬᠤ ᠭᠡᠵᠤ ᠪᠢᠳᠡ ᠬᠡᠯᠡᠭᠰᠡᠨ ᠤᠴᠢᠷ ᠡᠨᠡ ᠲᠠᠯᠠ ᠪᠡᠷ ᠲᠤᠪᠴᠢ ᠲᠡᠮᠳᠡᠭᠯᠡᠬᠦ ᠨᠢ ᠵᠦᠪ ᠪᠠᠢᠬᠠ᠃
ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠴᠢᠩᠭᠢᠰ ᠬᠠᠭᠠᠨ ᠳᠤ ᠪᠢᠴᠢᠵᠤ ᠥᠭᠭᠦᠭᠰᠡᠨ ᠡᠷᠡᠭᠦᠯ ᠠᠮᠢᠳᠤᠷᠠᠵᠤ ᠤᠷᠲᠤ ᠨᠠᠰᠤᠯᠠᠬᠤ ᠶᠢᠨ ᠵᠣᠷ ᠢ ᠨᠢ ᠬᠤᠷᠢᠶᠠᠩᠭᠤᠢᠯᠠᠪᠠᠯ ᠨᠢᠭᠡ ᠯᠡ ᠵᠣᠢᠯ᠄ ᠬᠤᠷᠢᠴᠠᠯ ᠢᠶᠠᠨ ᠬᠡᠮᠨᠡᠬᠦ᠃ ︽ ᠡᠭᠡᠯ ᠠᠷᠠᠳ ᠭᠠᠭᠴᠠ ᠡᠬᠡᠨᠡᠷ ᠲᠠᠢ ᠪᠠᠢᠲᠠᠯᠠ ᠪᠠᠨ ᠬᠤᠷᠢᠴᠠᠯ ᠨᠢ ᠠᠬᠠᠳᠠᠪᠠᠯ ᠪᠡᠶᠡ ᠨᠢ ᠮᠠᠭᠤᠲᠠᠲᠠᠭ ᠶᠤᠮ ᠴᠢᠨᠢ ᠡᠵᠡᠨ ᠲᠠ ᠣᠷᠳᠣᠨ ᠳᠦᠭᠦᠷᠡᠩ ᠡᠬᠡᠨᠡᠷ ᠦᠬᠢᠳ ᠲᠠᠢ᠂ ᠡᠷᠡᠭᠦᠯ ᠮᠡᠨᠳᠤ ᠴᠢᠨᠢ ᠶᠠᠭᠠᠬᠢᠵᠤ ᠰᠠᠢᠨ ᠪᠠᠢᠬᠤ ᠪᠤᠢ ᠳ᠋ᠠ︾ ︵ ᠵᠡᠭᠦᠯᠲᠡ30︶ ᠭᠡᠳ ᠴᠢᠩᠭᠢᠰ ᠬᠠᠭᠠᠨ ᠳᠤ ︽ ᠠᠷᠪᠠ ᠬᠣᠨᠣᠭ ᠲᠤ ᠨᠢᠭᠡ ᠤᠳᠠᠭᠠ ᠬᠣᠷᠢᠴᠠᠯ ᠬᠢᠵᠤ ᠪᠠᠢᠬᠤ ᠳᠤ ᠬᠠᠩᠭᠠᠯᠳᠠᠲᠠᠢ︾ ︵ ᠵᠡᠭᠦᠯᠲᠡ 31︶ ᠭᠡᠵᠤ ᠪᠦᠷ ᠴᠠᠭ ᠤᠨ ᠬᠤᠪᠢᠶᠠᠷᠢ ᠶᠢ ᠰᠠᠨᠠᠯ ᠪᠣᠯᠭᠠᠵᠤ ᠪᠠᠢᠨᠠ᠃ ︽ ᠮᠢᠩᠭᠠ ᠬᠣᠨᠣᠭ ᠡᠮ ᠤᠤᠭᠤᠬᠤ ᠪᠠᠷ ᠢᠶᠠᠨ ᠨᠢᠭᠡ ᠰᠦᠨᠢ ᠭᠠᠭᠴᠠ ᠪᠠᠷ ᠢᠶᠠ ᠤᠨᠲᠠ ︾ ᠭᠡᠰᠡᠨ ᠬᠢᠲᠠᠳ ᠬᠡᠯᠡᠴᠠ ᠦᠭᠡ ᠪᠠᠢᠳᠠᠭ ᠢ ᠳᠡᠪᠰᠢᠭᠦᠯᠦᠯᠡ᠃ ᠡᠷᠲᠡᠨ ᠡᠴᠡ ᠵᠦᠪᠬᠡᠨ ᠪᠣᠮᠪᠣ ᠶᠢᠨ ᠰᠤᠷᠲᠠᠬᠤᠨ ᠳᠦ ᠪᠢᠰᠢ ᠬᠢᠲᠠᠳ ᠠᠨᠠᠭᠠᠬᠤ᠂ ᠬᠢᠲᠠᠳ ᠰᠣᠶᠣᠯ ᠳᠦ ᠪᠦᠷ ᠬᠣᠷᠢᠴᠠᠯ ᠢ ᠬᠠᠮᠤᠭ ᠤᠨ ᠮᠠᠭᠤ ᠶᠠᠭᠤᠮᠠ ᠭᠡᠵᠤ ᠦᠵᠡᠳᠡᠭ ᠪᠠᠢᠵᠠᠢ᠃ ᠨᠢᠭᠡ ᠳᠤᠰᠤᠯ ᠦᠷᠡ ᠮᠢᠩᠭᠠᠨ ᠳᠤᠰᠤᠯ ᠴᠢᠰᠤ ᠭᠡᠰᠡᠨ ᠬᠡᠯᠡᠴᠡ ᠬᠢᠲᠠᠳ ᠬᠡᠯᠡᠨ ᠳᠦ ᠪᠠᠢᠨᠠ᠃ ᠡᠨᠡ ᠶᠤᠰᠤ ᠨᠢ ᠨᠣᠢᠲᠠᠨ ᠴᠢᠬᠢᠭ ᠲᠠᠢ ᠭᠠᠵᠠᠷ ᠲᠤ ᠨᠣᠭᠣᠭᠠ ᠵᠢᠮᠢᠰ ᠢᠶᠡᠷ ᠬᠣᠭᠣᠯᠠ ᠬᠦᠨᠡᠰᠤ ᠪᠣᠯᠭᠠᠳᠠᠭ ᠠᠷᠠᠳ ᠲᠦᠮᠡᠨ ᠦ ᠪᠡᠶᠡ ᠶᠢᠨ ᠪᠠᠢᠳᠠᠯ ᠳᠤ ᠵᠣᠬᠢᠴᠠᠭᠰᠠᠨ ᠪᠠᠢᠵᠤ ᠪᠣᠯᠬᠣ ᠠᠴᠠ ᠪᠢᠰᠢ ᠡᠭᠦᠨ ᠢ ᠨᠡᠢᠲᠡ ᠬᠦᠮᠤᠨ ᠲᠥᠷᠥᠯᠬᠢᠲᠡᠨ ᠬᠦᠯᠢᠶᠡᠵᠤ ᠠᠪᠣᠨᠠ ᠭᠡᠵᠤ ᠬᠡᠯᠡᠬᠦᠶᠡ ᠪᠡᠷᠬᠡ᠃
ᠴᠠᠩᠴᠦ᠋ᠨ ᠪᠣᠮᠪᠣ ᠡᠮᠡᠰ ᠦᠨ ᠲᠠᠯᠠᠢ ᠳᠤ ᠵᠢᠪᠪᠤᠵᠤ ᠦᠬᠦᠳᠡᠭ ᠬᠢᠲᠠᠳ ᠬᠠᠭᠠᠳ ᠢᠶᠠᠷ ᠴᠢᠩᠭᠢᠰ ᠬᠠᠭᠠᠨ ᠢ ᠲᠥᠰᠥᠭᠡᠯᠡᠭᠰᠡᠨ ᠨᠢ ᠬᠠᠷᠠᠲᠠᠯᠠ ᠢᠯᠡ᠃ ᠨᠡᠭᠦᠳᠡᠯᠴᠢᠳ ᠦᠨ ᠬᠠᠭᠠᠳ ᠡᠵᠡᠳ ᠰᠠᠭᠤᠷᠢᠰᠢᠯ ᠢᠷᠭᠡᠳ ᠦᠨ᠂ ᠢᠯᠠᠩᠭᠤᠶᠠ ᠬᠢᠲᠠᠳ ᠤᠨ ᠬᠠᠭᠠᠳ ᠰᠢᠭ ᠰᠢᠷᠡᠭᠡᠨ ᠳ᠋ᠥ ᠲᠠᠯᠠ ᠪᠥᠭᠰᠡ ᠪᠠᠨ ᠲᠠᠯᠪᠢᠮᠠᠭᠴᠠ ᠣᠷᠳᠣᠨ ᠪᠠᠷᠢᠵᠤ ᠡᠮᠡᠰ ᠦᠨ ᠬᠦᠷᠢᠶᠡᠯᠡᠩ ᠭᠠᠷᠭᠠᠳᠠᠭ ᠦᠭᠡᠢ ᠭᠡᠳᠡᠭ ᠢ ᠠᠭᠤᠢ ᠳᠤ ᠰᠠᠭᠤᠬᠰᠠᠨ ᠡᠨᠡ ᠨᠦᠬᠦᠷ ᠮᠡᠳᠡᠳᠡᠭ ᠦᠭᠡᠢ ᠪᠣᠯᠣᠯᠲᠠᠢ᠃ ᠴᠢᠩᠭᠢᠰ ᠬᠠᠭᠠᠨ ᠤ ᠨᠢᠭᠡ ᠨᠠᠰᠤ ᠪᠠᠷᠤᠭ ᠯᠡ ᠨᠡᠭᠦᠳᠡᠯ ᠣᠷᠳᠣᠨ ᠳᠤ ᠬᠣᠨᠣᠵᠤ ᠮᠣᠷᠢᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠥᠩᠭᠡᠷᠡᠭᠦᠯᠦᠭᠰᠡᠨ ᠢ ᠳᠡᠯᠡᠬᠡᠢ ᠮᠡᠳᠡᠨᠡ᠃ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠬᠢᠴᠢᠶᠡᠯ ᠦᠨᠡᠨ ᠬᠡᠷᠡᠭ ᠲᠡᠭᠡᠨ ︽ ᠰᠤᠷᠤᠭᠴᠢ︾ ᠪᠠᠨ ᠪᠣᠷᠤᠭᠤ ᠰᠣᠩᠭᠤᠭᠰᠠᠨ ᠭᠡᠳᠡᠭ ᠢ ᠳᠠᠷᠠᠭᠠᠬᠢ ᠵᠤᠢᠯ ᠭᠡᠷᠡᠴᠢᠯᠡᠨᠡ᠄ ᠴᠢᠩᠭᠢᠰ ᠬᠠᠭᠠᠨ ᠪᠣᠮᠪᠣ ᠶᠢᠨ ᠪᠦᠬᠦ ᠢᠯᠡᠳᠬᠡᠯ ᠢ ᠰᠣᠨᠣᠰᠴᠤ ᠳᠠᠭᠤᠰᠤᠭᠠᠳ ᠡᠴᠤᠰ ᠲᠤ ᠨᠢ ︽ ᠬᠡᠯᠡᠭᠰᠡᠨ ᠵᠣᠢᠯ ᠤᠳ ᠴᠢᠨᠢ ᠴᠢᠬᠤᠯᠠ᠂ ᠪᠡᠶᠡᠯᠡᠭᠦᠯᠬᠦ ᠳᠦ ᠬᠠᠷᠢᠨ ᠪᠡᠷᠬᠡ︾ ︵ ᠵᠡᠭᠦᠯᠲᠡ 32︶ ᠭᠡᠵᠤ ᠳ᠋ᠦᠩᠨᠡᠭᠰᠡᠨ ᠨᠢ ᠬᠡᠷᠡᠭ ᠳᠡᠭᠡᠷᠡ ᠪᠡᠨ ᠪᠣᠮᠪᠣ ᠶᠢᠨ ᠰᠡᠴᠡᠯᠡᠭᠰᠡᠨ ᠢ ︽ ᠮᠢᠨᠤ ᠬᠤᠪᠢ ᠳᠤ ᠬᠦᠯᠢᠶᠡᠵᠤ ᠠᠪᠬᠤ ᠪᠣᠯᠣᠮᠵᠢ ᠦᠭᠡᠢ︾ ᠭᠡᠳᠡᠭ ᠢᠶᠡᠨ ᠳ᠋ᠢᠫᠯᠣᠮᠠᠲ ᠮᠠᠶ᠋ᠢᠭ ᠢᠶᠠᠷ ᠢᠯᠡᠳᠬᠡᠵᠡᠢ᠃
ᠲᠠᠪᠤ᠂ ︽ ᠲᠦᠷᠤ ᠶᠢ ᠵᠠᠰᠠᠬᠤ ᠤᠬᠠᠭᠠᠨ ᠢ ᠠᠰᠠᠭᠤᠬᠰᠠᠨ︾ ᠪᠣᠯᠭᠠᠵᠤ ᠦᠭᠡᠷᠡᠴᠢᠯᠡᠬᠦ ᠯᠣᠭᠢᠭ
ᠴᠢᠩᠭᠢᠰ ᠬᠠᠭᠠᠨ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢ ᠳᠠᠭᠤᠳᠠᠬᠤ ᠳᠤ ᠨᠠᠰᠤᠨ ᠰᠡᠭᠦᠳᠡᠷ ᠵᠢᠷᠠ ᠭᠠᠷᠴᠤ᠂ ᠲᠠᠩᠭᠤᠳ ᠢ ᠮᠥᠬᠥᠭᠡᠬᠦ ᠡᠴᠡ ᠪᠤᠰᠤᠳ ᠨᠢᠭᠡ ᠨᠠᠰᠤᠨ ᠳᠤ ᠬᠢᠭᠰᠡᠨ ᠭᠣᠣᠯ ᠭᠣᠣᠯ ᠪᠠᠢᠯᠳᠤᠨ ᠳᠠᠭᠠᠭᠤᠯᠬᠤ ᠠᠶᠠᠨ ᠳᠠᠢᠨ ᠢᠶᠠᠨ ᠳᠠᠭᠤᠰᠬᠠᠭᠠᠳ ᠪᠠᠢᠯᠠ᠃ ᠨᠠᠰᠤ ᠵᠢᠯ᠂ ᠲᠤᠷᠰᠢᠯᠭᠠ ᠶᠢᠨ ᠠᠯᠢ ᠴᠦ ᠲᠠᠯᠠ ᠠᠴᠠ ᠬᠡᠯᠡᠬᠦ ᠳᠦ ᠲᠥᠷᠥ ᠶᠢ ᠵᠠᠰᠠᠬᠤ ᠤᠬᠠᠭᠠᠨ ᠢ ᠪᠤᠰᠤᠳ ᠠᠴᠠ ᠠᠰᠠᠭᠤᠬᠤ ᠪᠢᠰᠢ ᠪᠤᠰᠤᠳ ᠲᠤ ᠵᠢᠭᠠᠬᠤ ᠱᠠᠲᠤᠨ ᠳᠦ ᠬᠦᠷᠦᠭᠰᠡᠨ ᠦᠶᠡ ᠶᠤᠮ᠃ ᠣᠳᠣ ᠶᠢᠨ ᠤᠯᠤᠰ ᠲᠥᠷᠥᠴᠢᠳ ᠦᠨ ᠬᠢ ᠪᠡᠷ ᠪᠣᠯ ᠳᠤᠷᠠᠰᠤᠮᠵᠢ ᠪᠠᠨ ᠪᠢᠴᠢᠵᠤ ᠭᠠᠪᠢᠶᠡ ᠪᠠᠨ ᠲᠣᠭᠠᠴᠢᠬᠤ ᠴᠠᠭ ᠪᠣᠯᠣᠭᠠᠳ ᠪᠠᠢᠵᠠᠢ᠃
ᠶᠠᠭᠠᠬᠢᠭᠠᠳ ᠨᠢᠭᠡᠨ ᠬᠠᠭᠠᠨ ᠬᠦᠮᠤᠨ ᠤᠷᠲᠤ ᠨᠠᠰᠤᠯᠠᠬᠤ ᠵᠣᠷ ᠪᠠᠢᠬᠤ ᠡᠰᠡᠬᠦ ᠶᠢ ᠠᠰᠠᠭᠤᠬᠤ ᠭᠡᠵᠤ ᠲᠢᠶᠠᠨ ᠳ᠋ᠥ ᠰᠠᠭᠤᠬᠰᠠᠨ ᠪᠣᠮᠪᠣ ᠶᠢ ᠳᠠᠭᠤᠳᠠᠵᠤ ᠠᠭᠤᠯᠵᠠᠭᠰᠠᠨ ᠬᠡᠷᠡᠭ ᠢ ︽ ᠲᠦᠷᠤ ᠶᠢ ᠵᠠᠰᠠᠬᠤ ᠤᠬᠠᠭᠠᠨ ᠢ ᠠᠰᠠᠭᠤᠬᠰᠠᠨ︾ ᠪᠣᠯᠭᠠᠵᠤ ᠦᠭᠡᠷᠡᠴᠢᠯᠡᠨ ᠵᠠᠰᠠᠵᠤ ᠪᠠᠢᠬᠤ ᠪᠣᠢ ᠭᠡᠪᠡᠯ ᠡᠭᠦᠨ ᠦ ᠰᠡᠳᠬᠢᠭᠦᠢ ᠶᠢᠨ ᠯᠣᠭᠢᠭ ᠮᠠᠰᠢ ᠬᠢᠯᠪᠠᠷ᠄ ᠵᠠᠯᠠᠭᠰᠠᠨ ᠨᠢ ᠤᠮᠠᠷᠠᠳᠤ ᠶᠢᠨ ᠵᠡᠷᠯᠢᠭ ᠤᠳ ᠤᠨ ᠬᠠᠭᠠᠨ᠂ ᠶᠠᠮᠠᠷ ᠲᠠᠭᠠᠨ ᠠᠯᠠᠵᠤ ᠪᠤᠯᠠᠬᠤ ᠠᠴᠠ ᠥᠭᠡᠷᠡ ᠶᠢ ᠮᠡᠳᠡᠬᠦ ᠪᠢᠰᠢ᠃ ᠵᠠᠯᠠᠭᠳᠠᠵᠤ ᠣᠴᠢᠭᠰᠠᠨ ᠨᠢ ᠬᠡᠳᠤᠨ ᠮᠢᠩᠭᠠᠨ ᠵᠢᠯ ᠦᠨ ᠰᠣᠶᠣᠯ ᠢᠷᠭᠡᠨᠰᠢᠯ ᠲᠠᠢ ᠬᠢᠲᠠᠳ ᠤᠨ ᠲᠡᠭᠡᠳᠤ ᠪᠣᠮᠪᠣ᠂ ᠠᠶᠠᠨᠳᠠᠭᠠᠨ ᠪᠠᠭᠰᠢ ᠱᠠᠪᠢ ᠪᠣᠯᠵᠤ ᠯᠡ ᠲᠠᠭᠠᠷᠠᠭᠠ︕ ᠢᠩᠬᠢᠵᠤ ᠯᠠ ᠠᠮᠠ ᠰᠡᠭᠡᠷ ᠢ ᠨᠢ ᠲᠠᠭᠠᠷᠠᠭᠤᠯᠤᠭᠰᠠᠨ ᠬᠡᠷᠡᠭ ᠶᠤᠮ᠃
ᠦᠨᠡᠨ ᠬᠡᠷᠡᠭ ᠲᠡᠭᠡᠨ ᠬᠢᠲᠠᠳ ᠤᠨ ᠨᠡᠢᠭᠡᠮ ᠳ᠋ᠥ ᠪᠣᠮᠪᠣ ᠪᠣᠯ ᠵᠠᠰᠠᠭ ᠲᠦᠷᠤ ᠳᠤ ᠶᠠᠪᠤᠳᠠᠭ ᠬᠦᠮᠦᠰ ᠪᠢᠰᠢ᠂ ᠪᠢᠰᠢᠯᠭᠠᠯ ᠬᠢᠬᠦ ᠨᠢ ᠲᠡᠳᠡᠨ ᠦ ᠭᠣᠣᠯ ᠠᠵᠢᠯ ᠪᠣᠯᠬᠤᠷ ᠬᠠᠷᠢᠨ ᠴᠦ ᠨᠡᠢᠭᠡᠮ ᠡᠴᠡ ᠵᠠᠢᠳᠠᠭᠤ ᠪᠠᠢᠳᠠᠭ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠲᠡᠳᠡ ᠲᠦᠷᠤ ᠵᠠᠰᠠᠬᠤ ᠤᠬᠠᠭᠠᠨ ᠢ ᠮᠡᠳᠡᠳᠡᠭ ᠬᠦᠮᠤᠰ ᠪᠢᠰᠢ᠃ ᠭᠤᠢᠷᠠᠨᠴᠢ ᠶᠢ ᠪᠣᠳᠣᠪᠠᠯ ᠬᠣᠨᠣᠭ ᠤᠨ ᠭᠠᠵᠠᠷ ᠲᠠᠢ᠂ ᠨᠡᠢᠭᠡᠮ ᠦᠨ ᠬᠠᠮᠤᠭ ᠤᠨ ᠲᠣᠣᠷᠠᠳᠤ ᠳᠠᠪᠬᠤᠷᠭᠠ ᠳᠤ ᠪᠠᠢᠳᠠᠭ ᠣᠨᠴᠠᠯᠢᠭ ᠠᠴᠠ ᠪᠠᠨ ᠪᠣᠯᠵᠤ ᠴᠦᠭᠡᠨ ᠦᠭᠡᠢ ᠲᠠᠷᠢᠶᠠᠴᠢᠨ ᠤ ᠪᠣᠰᠤᠯᠭᠠ ᠶᠢ ᠪᠣᠮᠪᠣ ᠨᠠᠷ ᠲᠣᠯᠤᠭᠠᠢᠯᠠᠵᠤ ᠪᠠᠢᠵᠠᠢ᠃ ᠶᠤᠸᠠᠨ ᠢ ᠡᠰᠡᠷᠭᠦᠴᠡᠭᠦ ᠵᠡᠪᠰᠡᠭᠲᠦ ᠲᠡᠮᠡᠴᠡᠯ ᠦᠨ ᠱᠦᠭᠯᠦ ᠶᠢ ᠦᠯᠢᠶᠡᠭᠰᠡᠨ ᠬᠠᠨ ᠱᠠᠨ ᠲᠦᠩ ᠭᠡᠭᠴᠢ ᠪᠣᠮᠪᠣ ᠪᠦᠭᠡᠳ ᠴᠣᠬᠣᠮ ᠳᠠᠭᠠᠨ ᠡᠳᠡ ᠨᠡᠷ ᠵᠤ᠋ ᠶᠤᠸᠠᠨ ᠵᠠᠩ ᠠᠴᠠ ᠲᠦᠷᠦᠭᠦᠯᠡᠨ ᠶᠤᠸᠠᠨ ᠭᠦᠷᠤᠨ ᠤ ᠲᠠᠷ ᠢ ᠪᠠᠷᠠᠵᠤ ᠲᠦᠷᠤ ᠶᠢ ᠨᠢ ᠭᠠᠩᠬᠤᠭᠤᠯᠤᠭᠰᠠᠨ ᠶᠤᠮ᠃
ᠵᠢᠷᠭᠤᠭᠠ᠂ ᠪᠣᠰᠤᠳ ᠵᠤᠢᠯ
1᠂ ᠴᠢᠩᠭᠢᠰ ᠬᠠᠭᠠᠨ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢ ᠲᠡᠭᠷᠢ ᠶᠢᠨ ᠬᠢᠵᠠᠭᠠᠷ ᠠᠴᠠ ᠳᠠᠭᠤᠳᠠᠵᠤ ᠠᠪᠴᠢᠷᠠᠭᠠᠳ ᠦᠪᠡᠷ ᠲᠤ ᠨᠢ ᠬᠡᠷᠡᠭᠳᠡᠢ ᠵᠣᠢᠯ ᠶᠠᠭᠤ ᠴᠤ ᠣᠯᠣᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠰᠢᠨᠡ ᠡᠵᠡᠨ ᠳᠦ ᠭᠠᠪᠢᠶᠠ ᠪᠠᠢᠭᠤᠯᠵᠤ ᠨᠢᠭᠤᠷ ᠣᠯᠬᠤ᠂ ᠶᠠᠳᠠᠵᠤ ᠠᠮᠢ ᠨᠠᠰᠤ ᠪᠠᠨ ᠪᠠᠲᠤᠯᠠᠬᠤ ᠭᠡᠰᠡᠨ ᠴᠠᠩᠴᠦ᠋ᠨ ᠪᠣᠮᠪᠣ ᠡᠭᠦᠷᠦᠭᠡᠳ ᠳᠠᠭᠠᠭᠠᠬᠤ ᠦᠭᠡᠢ ᠣᠯᠵᠠ ᠣᠮᠣᠭ ᠲᠠᠢ ᠪᠤᠴᠠᠵᠠᠢ᠄ ᠭᠤᠷᠪᠠᠨ ᠵᠢᠯ ᠶᠠᠳᠠᠵᠤ ᠵᠣᠪᠠᠭᠰᠠᠨ ᠢ ᠨᠢ ᠥᠷᠥ ᠡᠪᠡᠳᠦᠭᠰᠡᠨ ᠦ ᠴᠦ ᠪᠣᠯᠪᠠ ᠦᠦ᠂ ᠴᠢᠩᠭᠢᠰ ᠬᠠᠭᠠᠨ ︽ ᠠᠯᠲᠠᠨ ᠪᠠᠷᠰ ᠤᠨ ᠫᠠᠢᠵᠠ ᠣᠯᠭᠤᠨ᠂ ᠪᠣᠮᠪᠣ ᠶᠢᠨ ᠶᠠᠪᠤᠳᠠᠯ ᠢ ᠴᠦᠮ ᠢᠶᠡᠷ ᠳᠡᠭᠡᠳᠤ ᠠᠷᠰᠢ ᠮᠡᠳᠡᠲᠦᠭᠡᠢ︾ ᠭᠡᠰᠡᠨ ᠢᠶᠡᠷ ᠦᠯᠦ ᠪᠠᠷᠠᠨ ︽ ᠳᠡᠯᠡᠬᠡᠢ ᠳ᠋ᠠᠬᠢᠨᠡ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ ᠭᠡᠷ ᠡᠴᠡ ᠭᠠᠷᠴᠤ ᠭᠡᠯᠤᠩ ᠴᠢᠪᠠᠭᠠᠨᠴᠠ ᠪᠣᠯᠣᠭᠰᠠᠨ ᠠᠯᠢᠪᠠ ᠬᠦᠮᠤᠨ ᠴᠦᠮ ᠬᠠᠷᠢᠶᠠᠯᠠᠭᠳᠠᠬᠤ ᠬᠡᠷᠡᠭᠳᠡᠢ︾ ︵ ᠵᠡᠭᠦᠯᠲᠡ 33︶ ᠭᠡᠵᠤ ᠨᠢᠭᠡ ᠶᠣᠰᠣᠨ ᠳᠠᠭᠠᠨ ᠬᠢᠲᠠᠳ ᠤᠨ ᠱᠠᠰᠢᠨ ᠤ ᠬᠠᠭᠠᠨ ᠢᠶᠠᠷ ᠲᠣᠮᠢᠯᠠᠪᠠ᠃
ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠴᠢᠩᠭᠢᠰ ᠬᠠᠭᠠᠨ ᠲᠠᠢ ᠠᠭᠤᠯᠵᠠᠭᠠᠳ ᠢᠷᠡᠭᠰᠡᠨ ᠨᠢ ᠬᠢᠲᠠᠳ ᠠᠷᠠᠳ ᠤᠨ ᠰᠡᠳᠬᠢᠯ ᠳᠤ ᠲᠡᠭᠷᠢ ᠳ᠋ᠥ ᠭᠠᠷᠤᠭᠠᠳ ᠢᠷᠡᠭᠰᠡᠨ ᠰᠢᠭ᠋ ᠪᠣᠯᠵᠤ ︽ ᠪᠠᠭᠰᠢ ᠶᠢ ᠪᠤᠴᠠᠵᠤ ᠢᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠁ ᠡᠯᠡ ᠡᠲᠡᠭᠡᠳ ᠦᠨ ᠪᠣᠮᠪᠣ ᠡᠭᠦᠯᠡ ᠮᠡᠲᠤ ᠬᠤᠷᠠᠵᠤ ᠁ ᠰᠤᠷᠭᠠᠯ ᠤᠨ ᠡᠭᠦᠳᠡ ᠲᠦᠷᠪᠡᠨ ᠵᠦᠭ ᠲᠦ ᠨᠡᠭᠡᠭᠡᠭᠳᠡᠨ ᠥᠩᠭᠡᠷᠡᠭᠰᠡᠨ ᠡᠴᠡ ᠵᠠᠭᠤᠨ ᠳᠠᠬᠢᠨ ᠬᠦᠭᠵᠢᠭᠰᠡᠨ ᠪᠠᠢᠳᠠᠯ ᠲᠠᠢ ᠪᠣᠯᠣᠭᠠᠳ︾ ︵ ᠵᠡᠭᠦᠯᠲᠡ 34︶ ᠭᠡᠵᠤ ᠯᠢ ᡁᠢ ᠴᠠᠩ ᠪᠠᠶᠠᠷᠬᠠᠨ ᠲᠡᠮᠳᠡᠭᠯᠡᠵᠡᠢ᠃ ᠴᠠᠩᠴᠦ᠋ᠨ ᠪᠣᠮᠪᠣ ᠢᠷᠡᠭᠡᠳᠦᠢ ᠶᠢᠨ ᠡᠵᠡᠨ ᠡᠴᠡ ᠣᠯᠭᠣᠭᠰᠠᠨ ᠠᠯᠪᠠᠨ ᠲᠤᠰᠢᠶᠠᠯ ᠡᠷᠬᠡ ᠰᠦᠷ ᠢᠶᠡᠨ ᠠᠰᠢᠭᠯᠠᠨ ᠪᠣᠮᠪᠣ ᠶᠢᠨ ᠰᠤᠷᠳᠠᠬᠤᠨ᠂ ᠢᠯᠠᠩᠭᠤᠶᠠ ᠴᠢᠤᠸᠠᠨ ᠵᠸᠠ ᠳ᠋ᠣᠤ ᠰᠤᠷᠭᠠᠯ ᠢᠶᠠᠨ ᠶᠡᠬᠡᠳᠡ ᠳᠡᠯᠭᠡᠷᠡᠭᠦᠯᠵᠦ ᠲᠡᠤᠬᠡᠨ ᠳ᠋ᠥ ᠨᠡᠷᠡ ᠪᠠᠨ ᠬᠣᠴᠣᠷᠭᠠᠵᠠᠢ᠃ ᠬᠢᠲᠠᠳ ᠲᠡᠤᠬᠡᠴᠢᠳ ︽ ᠶᠤᠸᠠᠨ ᠤ ᠦᠶᠡ ᠳᠦ ᠪᠣᠮᠪᠣ ᠶᠡᠬᠡ ᠴᠡᠴᠡᠭᠯᠡᠭᠰᠡᠨ︾ ᠭᠡᠵᠤ ᠪᠢᠴᠢᠳᠡᠭ ᠦᠨ ᠴᠣᠬᠣᠮ ᠡᠬᠢᠯᠡᠯᠲᠡ ᠨᠢ ᠡᠨᠳᠡ ᠪᠠᠢᠭᠠ ᠶᠤᠮ᠃
2᠂ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢ ᠠᠯᠲᠠᠨ ᠤᠯᠤᠰ ᠤᠨ ᠲᠠᠩᠨᠠᠭᠤᠯ᠂ ᠮᠣᠩᠭᠣᠯ ᠴᠡᠷᠢᠭ ᠤᠨ ᠪᠠᠢᠳᠠᠯ ᠢ ᠣᠢᠯᠠᠭᠠᠭᠤᠯᠬᠤ ᠪᠠᠷ ᠶᠠᠪᠤᠭᠤᠯᠤᠭᠰᠠᠨ ᠭᠡᠵᠤ ᠮᠣᠩᠭᠣᠯ ᠲᠡᠤᠬᠡᠴᠢᠳ ᠤᠨ ᠬᠠᠷᠠᠳᠠᠬᠤ᠂ ᠬᠢᠲᠠᠳ ᠲᠡᠤᠬᠡᠴᠢᠳ ᠤᠨ ᠥᠭᠡᠷᠡ ᠨᠢᠭᠡᠨ ᠲᠠᠯᠠ ᠠᠴᠠ ᠡᠷᠭᠦᠨ ᠮᠠᠭᠲᠠᠬᠤ ᠭᠡᠰᠡᠨ ᠣᠷᠣᠯᠳᠤᠯᠭᠠ ᠶᠢᠨ ᠠᠯᠢᠨ ᠴᠦ ᠪᠦᠲᠦᠬᠦ ᠦᠭᠡᠢ ᠶᠤᠮ᠃ ᠠᠯᠳᠠᠨ ᠤᠯᠤᠰ ᠤᠨ ᠨᠡᠢᠰᠯᠠᠯ᠂ ᠭᠠᠵᠠᠷ ᠨᠤᠲᠤᠭ ᠤᠨ ᠭᠤᠷᠪᠠᠨ ᠤ ᠨᠢᠭᠡ ᠨᠢ ᠡᠵᠡᠯᠡᠭᠳᠡᠵᠦ᠂ ᠮᠣᠩᠭᠣᠯ ᠴᠡᠷᠢᠭ ᠦᠨ ᠪᠠᠢᠳᠠᠯ ᠢ ᠭᠡᠷ ᠦᠨ ᠬᠠᠶᠠᠭᠠᠨ ᠳᠠᠭᠠᠨ ᠬᠠᠷᠠᠵᠤ ᠪᠠᠢᠵᠤ ᠵᠦᠷᠢᠭᠡᠳ ᠬᠠᠮᠢᠭᠠ ᠬᠣᠯᠠ ᠳᠤᠮᠳᠠᠳᠤ ᠠᠽᠢᠶᠠ ᠳᠤ ᠬᠦᠷᠴᠦ ᠮᠣᠩᠭᠣᠯ ᠴᠡᠷᠢᠭ ᠢ ᠲᠠᠩᠨᠠᠨᠠ ᠭᠡᠰᠡᠨ ᠲᠡᠨᠡᠭ ᠶᠠᠭᠤᠮᠠ ᠶᠠᠭᠠᠬᠢᠵᠤ ᠪᠠᠢᠬᠤᠪ᠃
3᠂ ᠪᠢᠳᠡ ᠲᠡᠯᠡᠬᠡᠢ ᠶᠢᠨ ᠤᠯᠤᠰ ᠲᠥᠷᠥ ᠶᠢᠨ ᠭᠠᠵᠠᠷ ᠤᠨ ᠵᠢᠷᠤᠭ ᠢ ᠬᠠᠷᠠᠵᠤ ᠬᠡᠯᠡᠪᠡᠯ᠂ ᠠᠷᠪᠠᠨ ᠭᠤᠷᠪᠠᠳᠤᠭᠠᠷ ᠵᠠᠭᠤᠨ ᠳᠦ ᠪᠠᠢᠭ᠂ ᠥᠨᠥ ᠴᠦ ᠪᠣᠯᠣᠭ᠂ ᠴᠠᠩᠴᠦ᠋ᠨ ᠪᠣᠮᠪᠣ ᠪᠣᠯ ᠨᠡᠷᠡ ᠨᠢ ᠨᠢᠳᠡᠷ ᠲᠡᠬᠡᠨ ᠨᠡᠢᠴᠡᠭᠰᠡᠨ ᠡᠬᠡ ᠣᠷᠣᠨ ᠠᠴᠠ ᠪᠠᠨ ᠤᠷᠪᠠᠭᠴᠢ ᠶᠤᠮ᠃ ᠬᠦᠴᠤᠷᠬᠡᠭ ᠬᠠᠷᠢ ᠶᠢᠨ ᠲᠦᠷᠢᠮᠡᠬᠡᠢᠯᠡᠭᠴᠢ ᠶᠢᠨ ᠲᠠᠭᠤᠳᠠᠯᠭᠠ ᠶᠢ ᠣᠯᠣᠩᠭᠣᠳᠠ ᠰᠢᠷᠬᠠ ᠰᠣᠷᠪᠢ ᠪᠠᠷ ᠳᠦᠭᠦᠷᠦᠭᠰᠡᠨ ᠡᠬᠡ ᠣᠷᠣᠨ ᠢᠶᠠᠨ ᠣᠷᠬᠢᠨ ᠣᠳᠣᠭᠠᠳ ᠲᠦᠷᠢᠮᠡᠬᠡᠢ ᠴᠡᠷᠢᠭ ᠦᠨ ᠶᠡᠷᠤᠩᠬᠡᠢ ᠺᠣᠮᠠᠨᠳᠠᠯᠠᠭᠴᠢ ᠳᠤ ᠬᠡᠷᠬᠢᠨ ᠤᠷᠲᠤ ᠨᠠᠰᠤᠯᠠᠬᠤ ᠶᠢ ᠮᠡᠳᠡᠳᠡᠭ ᠢᠶᠡᠨ ᠰᠢᠪᠬᠠᠨ ᠵᠦᠪᠯᠡᠵᠤ ᠪᠠᠢᠨᠠ᠃ ᠬᠡᠷᠪᠡ ᠡᠢᠮᠦ ᠬᠥᠮᠥᠨ ᠢ ᠤᠷᠪᠠᠭᠴᠢ ᠭᠡᠬᠦ ᠦᠭᠡᠢ ᠭᠡᠳᠡᠷᠭᠦ ᠪᠡᠨ ᠮᠤᠨᠳᠠᠭ᠂ ᠰᠠᠢᠨ ᠬᠦᠮᠤᠨ ᠭᠡᠵᠤ ᠦᠨᠡᠯᠡᠵᠤ ᠪᠠᠢᠪᠠᠯ ᠲᠡᠷᠡ ᠦᠨᠳᠦᠰᠦᠲᠡᠨ ᠳᠤ ᠬᠡᠵᠢᠶᠡ ᠴᠦ ᠵᠥᠪ ᠪᠤᠷᠤᠭᠤ ᠦᠨᠡᠨ ᠬᠤᠳᠠᠯ ᠤᠨ ᠪᠠᠷᠢᠮᠵᠢᠶᠠ ᠪᠠᠢᠳᠠᠭ ᠦᠭᠡᠢ᠂ ᠠᠶᠠᠭᠦᠢ ᠪᠣᠯ ᠤᠷᠪᠠᠭᠴᠢ ᠶᠢ ᠲᠡᠭᠡᠳᠦᠯᠡᠳᠡᠭ ᠭᠡᠰᠡᠨ ᠦᠭᠡ᠃
4᠂ ᠴᠢᠩᠭᠢᠰ ᠬᠠᠭᠠᠨ ᠤ ᠴᠠᠩᠴᠦ᠋ᠨ ᠪᠣᠮᠪᠣ ᠳᠤ ᠢᠯᠡᠭᠡᠭᠰᠡᠨ ︽ ᠤᠷᠢᠯᠭᠠ ᠦᠨ ᠪᠢᠴᠢᠭ︾ ᠭᠡᠳᠡᠭ ᠵᠣᠭᠢᠶᠠᠮᠠᠯ ᠵᠣᠢᠯ ᠪᠠᠢᠬᠤ ᠶᠢ ᠳᠤᠷᠠᠳᠤᠭᠠᠳ ᠥᠩᠭᠡᠷᠡᠶᠡ᠃ ︽ᠪᠠᠷᠠᠭᠤᠨ ᠳ᠋ᠥ ᠵᠣᠷᠴᠢᠭᠰᠠᠨ ᠲᠡᠮᠳᠡᠭᠯᠡᠯ︾ ᠦᠨ ᠤᠭ ᠡᠬᠡ ᠳ᠋ᠥ ᠪᠠᠷᠰ ᠤᠨ ᠲᠣᠯᠣᠭᠠᠢᠲᠤ ᠠᠯᠲᠠᠨ ᠫᠠᠢᠵᠠ ᠵᠡᠭᠦᠭᠰᠡᠨ ︽ ᠬᠣᠷᠢ ᠭᠠᠷᠤᠢ ᠮᠣᠩᠭᠣᠯ ᠬᠦᠮᠤᠨ ᠢᠷᠡᠵᠤ ᠵᠠᠷᠯᠢᠭ ᠤᠯᠠᠮᠵᠢᠯᠠᠨ ᠪᠠᠭᠰᠢ ᠶᠢ ᠤᠷᠢᠨ ᠵᠠᠯᠠᠪᠠᠢ︾ ︵ᠵᠡᠭᠦᠯᠲᠡ 35︶ ᠭᠡᠰᠡᠨ ᠡᠴᠡ ᠥᠭᠡᠷᠡ ᠶᠠᠮᠠᠷ ᠴᠦ ᠤᠷᠢᠯᠭᠠ ᠶᠢᠨ ᠪᠢᠴᠢᠭ ᠬᠡᠮᠡᠬᠦ ᠵᠤᠢᠯ ᠭᠠᠷᠳᠠᠭ ᠦᠭᠡᠢ᠃ ︽ᠰᠤᠷᠭᠠᠯ ᠢ ᠲᠠᠢᠯᠪᠤᠷᠢᠯᠠᠭᠰᠠᠨ ᠬᠤᠷᠠᠯ ᠤᠨ ᠲᠡᠮᠳᠡᠭᠯᠡᠯ︾ ᠳᠦ ᠮᠦᠨ ᠡᠨᠡ ᠲᠠᠯᠠ ᠶᠢᠨ ᠶᠠᠮᠠᠷ ᠴᠤ ᠮᠡᠳᠡᠭᠡᠯᠡᠯ ᠪᠠᠢᠬᠤ ᠦᠭᠡᠢ ᠶᠤᠮ᠃ ᠡᠨᠡ ᠪᠣᠯ ︽ ᠪᠠᠷᠠᠭᠤᠨ ᠳᠤ ᠵᠣᠷᠴᠢᠭᠰᠠᠨ ᠲᠡᠮᠳᠡᠭᠯᠡᠯ︾ ᠢ 1926 ᠣᠨ ᠳᠤ ᠬᠢᠲᠠᠳ ᠬᠡᠯᠡ ᠪᠡᠷ ᠬᠡᠪᠯᠡᠭᠦᠯᠬᠦ ᠳ᠋ᠥ ᠮᠣᠩᠭᠣᠯᠴᠢ ᠡᠷᠳᠡᠮᠲᠡᠨ᠂ ᠬᠢᠲᠠᠳ ᠬᠦᠮᠤᠨ ᠸᠠᠩ ᠭᠦᠸ᠋ᠸ ᠸᠸᠢ ᠲᠠᠢᠯᠪᠤᠷᠢ ᠮᠠᠶ᠋ᠢᠭ ᠢᠶᠠᠷ ᠨᠡᠮᠡᠵᠦ ᠣᠷᠣᠭᠤᠯᠤᠭᠰᠠᠨ ᠵᠣᠢᠯ ᠶᠤᠮ᠃ ᠸᠠᠩ ᠨᠢ ︽ ᠤᠷᠢᠯᠭᠠ ᠶᠢᠨ ᠪᠢᠴᠢᠭ︾ ᠢ ︽ ᠴᠦᠸ᠋ᠸ ᠭᠸᠩ ᠯᠤ᠋ ᠪᠢᠴᠢᠭ︾ᠡᠴᠡ ᠰᠢᠯᠵᠢᠭᠦᠯᠦᠭᠰᠡᠨ ᠭᠡᠳᠡᠭ ᠢᠶᠡᠨ ᠲᠣᠳᠣᠷᠬᠠᠢ ᠲᠤᠰᠢᠶᠠᠵᠠᠢ ︵ᠵᠡᠭᠦᠯᠲᠡ 36︶᠃ ︽ ᠴᠦᠸ᠋ᠸ ᠭᠸᠩ ᠯᠤ᠋ ᠪᠢᠴᠢᠭ︾ ᠨᠢ ᠲᠡᠤᠬᠡ ᠶᠢᠨ ᠨᠣᠮ ᠪᠢᠰᠢ᠂ ᠲᠠᠭᠤᠤ ᠰᠢᠯᠦᠭ᠂ ᠠᠮᠠᠨ ᠵᠣᠬᠢᠶᠠᠯ᠂ ᠣᠷᠳᠣᠨ ᠤ ᠦᠯᠢᠭᠡᠷ᠂ ᠲᠣᠮᠣᠭ᠂ ᠴᠢᠳᠬᠦᠷ ᠦᠨ ᠦᠯᠢᠭᠡᠷ ᠁ ᠢ ᠪᠠᠭᠲᠠᠭᠠᠭᠰᠠᠨ ᠡᠷᠢᠶᠡᠪᠡᠷ ᠬᠤᠷᠢᠶᠠᠪᠠᠷ ᠬᠤᠪᠢ ᠬᠦᠮᠤᠨ ᠤ ᠲᠡᠭᠦᠪᠤᠷᠢ ᠵᠣᠬᠢᠶᠠᠯ᠂ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠠᠶᠠᠯᠠᠯ ᠠᠴᠠ 143 ᠵᠢᠯ ᠦᠨ ᠲᠠᠷᠠᠭᠠ ᠬᠡᠪᠯᠡᠭᠳᠡᠭᠰᠡᠨ ᠪᠦᠲᠦᠭᠡᠯ ᠶᠤᠮ᠃ ᠵᠣᠬᠢᠶᠠᠭᠴᠢ ᠨᠢ ᠲᠣᠤ ᠽᠦᠩ ᠢ ᠭᠡᠭᠴᠢ ᠪᠣᠮᠪᠣ ᠶᠢᠨ ᠰᠤᠷᠳᠠᠬᠤᠨ ᠰᠢᠲᠦᠭᠴᠢ ᠪᠢᠰᠢ᠂ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢ ᠰᠣᠳᠤᠯᠤᠭᠴᠢ ᠪᠢᠰᠢ᠂ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠠᠶᠠᠯᠠᠯ ᠤᠨ ᠲᠠᠯᠠ ᠪᠠᠷ ᠨᠣᠮ ᠪᠦᠲᠦᠭᠡᠯ ᠲᠤᠭᠤᠷᠪᠢᠭᠰᠠᠨ ᠬᠦᠮᠤᠨ ᠴᠦ ᠪᠢᠰᠢ᠂ ᠠᠭᠯᠠᠭ ᠬᠡᠭᠡᠷᠡ ᠠᠮᠢᠳᠤᠷᠠᠭᠰᠠᠨ ᠨᠣᠮ ᠪᠢᠴᠢᠭ ᠲᠦ ᠬᠣᠷᠤᠬᠠᠲᠠᠢ ᠲᠠᠷᠢᠶᠠᠴᠢᠨ ᠡᠷᠡ᠂ ᠰᠣᠨᠣᠰᠬᠠᠯ ᠤᠨ ᠲᠡᠤᠬᠡ ᠴᠦᠭᠡᠨ ᠦᠭᠡᠢ ᠪᠢᠴᠢᠭᠰᠡᠨ ᠪᠠᠢᠵᠠᠢ᠃ ︽ ᠴᠦᠸ᠋ᠸ ᠭᠸᠩ ᠯᠤ᠋ ᠪᠢᠴᠢᠭ︾ ᠲᠤ ᠵᠦᠭᠡᠷ ᠯᠡ ᠴᠢᠩᠭᠢᠰ ᠬᠠᠭᠠᠨ ᠤ ᠤᠷᠢᠯᠭᠠ ᠬᠢᠭᠡᠳ ᠴᠠᠩᠴᠦ᠋ᠨ ᠪᠣᠮᠪᠣ ᠠᠴᠠ ᠴᠢᠩᠭᠢᠰ ᠬᠠᠭᠠᠨ ᠳ᠋ᠥ ᠪᠢᠴᠢᠭᠰᠡᠨ ᠬᠠᠷᠢᠭᠤ ᠭᠡᠳᠡᠭ ᠬᠣᠶᠠᠷ ᠵᠠᠬᠢᠶᠠ ᠪᠠᠢᠬᠤ ᠶᠤᠮ᠃ ᠬᠣᠶᠠᠭᠤᠯᠠ ᠪᠠᠨ ᠵᠣᠭᠢᠶᠠᠮᠠᠯ ᠭᠡᠵᠤ ᠬᠡᠯᠡᠬᠦ ᠶᠢᠨ ᠦᠨᠳᠤᠰᠤᠯᠡᠯ ᠪᠢᠳᠡᠨ ᠳᠦ ᠪᠠᠢᠨᠠ᠄ ᠨᠢᠭᠡ ᠳᠦ ᠵᠠᠬᠢᠶᠠ ᠶᠢᠨ ᠢᠷᠡᠯ ᠭᠠᠷᠤᠯ ᠭᠡᠵᠤ ᠣᠭᠲᠣ ᠳᠤᠷᠠᠳᠤᠭᠰᠠᠨ ᠦᠭᠡᠢ᠃ ᠬᠣᠶᠠᠷ ᠲᠤ ᠰᠣᠨᠢᠨ ᠰᠡᠳᠬᠦᠯ ᠮᠡᠲᠦ ᠶᠢᠨ ᠮᠡᠳᠡᠭᠡᠯᠡᠯ ᠦᠨ ᠬᠡᠷᠡᠭᠰᠡᠯ ᠦᠭᠡᠢ ᠡᠷᠢᠨ ᠳᠦ ᠨᠢᠭᠡᠨ ᠲᠠᠷᠢᠶᠠᠴᠢᠨ ᠡᠷᠡ᠂ ᠬᠠᠭᠠᠨ ᠬᠦᠮᠤᠨ ᠤ ᠳᠣᠪᠲᠣᠯᠭᠠᠭᠰᠠᠨ ᠵᠠᠬᠢᠶᠠ ᠶᠢ ᠬᠠᠮᠢᠭᠠ ᠠᠴᠠ ᠣᠯᠵᠤ ᠦᠵᠡᠬᠦ ᠪᠣᠢ︖ ᠭᠤᠷᠪᠠ ᠳᠤ ᠴᠠᠩᠴᠦ᠋ᠨ ᠪᠣᠮᠪᠤ ᠶᠢᠨ ᠴᠢᠩᠭᠢᠰ ᠬᠠᠭᠠᠨ ᠲᠠᠢ ᠠᠭᠤᠯᠵᠠᠭᠰᠠᠨ ᠨᠢ ᠬᠢᠲᠠᠳ ᠬᠦᠮᠤᠰ ᠤᠨ ᠰᠡᠳᠬᠢᠯ ᠳᠦ ᠰᠡᠳᠬᠢᠰᠢ ᠦᠭᠡᠢ ᠪᠠᠭᠠᠳᠤᠷᠯᠢᠭ ᠦᠢᠯᠡ ᠬᠡᠷᠡᠭ ᠪᠣᠯᠣᠭᠰᠠᠨ ᠲᠤᠯᠠ ᠠᠮᠠ ᠳᠠᠮᠵᠢᠭᠳᠠᠨ ᠶᠠᠷᠢᠭᠳᠠᠵᠤ ᠪᠠᠢᠭᠰᠠᠨ ᠨᠢ ᠮᠡᠳᠡᠭᠡᠵᠢ᠃ ᠲᠣᠤ ᠰᠦᠩ ᠢ ᠨᠢ ᠶᠤᠸᠠᠨ ᠤᠯᠤᠰ ᠤᠨ ᠦᠶᠡ ᠳᠦ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠬᠦᠮᠤᠨ ᠪᠣᠯᠬᠣᠷ ᠲᠣᠮᠣᠭ ᠪᠣᠯᠣᠭᠰᠠᠨ ᠡᠨᠡ ᠦᠯᠢᠭᠡᠷ ᠤᠨ ᠵᠤᠢᠯ ᠪᠦᠷᠢ ᠶᠢᠨ ᠬᠤᠪᠢᠯᠪᠤᠷᠢ ᠶᠢ ᠰᠣᠨᠣᠰᠤᠭᠰᠠᠨ ᠯᠡ ᠪᠠᠢᠵᠤ ᠲᠠᠭᠠᠷᠠᠨᠠ᠃ ᠲᠡᠭᠡᠭᠡᠳ ᠴᠢᠳᠬᠦᠷ ᠦᠨ ᠦᠯᠢᠭᠡᠷ ᠪᠢᠴᠢᠳᠡᠭ ᠠᠪᠢᠶᠠᠰ ᠢᠶᠠᠷ ᠢᠶᠠᠨ ᠬᠣᠶᠠᠷ ᠬᠦᠭᠰᠢᠨ ᠢ ᠪᠡᠶᠡ ᠪᠡᠶᠡ ᠳᠡᠬᠡᠨ ᠵᠠᠬᠢᠶᠠ ︽ ᠪᠢᠴᠢᠭᠦᠯᠦᠭᠰᠡᠨ︾ ᠬᠡᠷᠡᠭ᠃ ᠳᠥᠷᠪᠡ ᠳᠦ ᠠᠯᠢ ᠠᠯᠢᠨ ᠠᠴᠠ ᠴᠢᠬᠤᠯᠠ ᠨᠢ ᠯᠢ ᡁᠢ ᠴᠠᠩ ᠴᠢᠩᠭᠢᠰ ᠬᠠᠭᠠᠨ ᠤ ᠢᠯᠡᠭᠡᠭᠰᠡᠨ ᠠᠯᠲᠠᠨ ᠫᠠᠢᠵᠠ᠂ ᠢᠷᠡᠭᠰᠡᠨ ᠬᠦᠮᠤᠨ ᠤ ᠲᠣᠭᠠ ᠶᠢ ᠮᠠᠰᠢ ᠲᠣᠳᠣᠷᠬᠠᠢ ᠪᠢᠴᠢᠭᠰᠡᠨ᠂ ᠬᠡᠷᠪᠡ ᠶᠡᠬᠡ ᠬᠠᠭᠠᠨ ᠤ ᠤᠷᠢᠯᠭᠠ ᠭᠡᠵᠦ ᠴᠠᠭᠠᠰᠤᠨ ᠳᠤ ᠪᠢᠴᠢᠭᠳᠡᠭᠰᠡᠨ ᠵᠣᠢᠯ ᠨᠡᠭᠡᠷᠡᠨ ᠪᠠᠢᠭᠰᠠᠨ ᠪᠣᠯ ᠪᠠᠭᠰᠢ ᠱᠠᠪᠢ ᠶᠢᠨ ᠵᠢᠩᠬᠢᠨᠢ ᠪᠠᠬᠠᠷᠬᠠᠵᠤ ᠭᠠᠢᠬᠠᠭᠤᠯᠬᠤ ᠵᠤᠢᠯ᠂ ᠪᠦᠬᠦ ᠠᠭᠤᠯᠭᠠ ᠶᠢ ᠨᠢ ᠣᠷᠣᠭᠤᠯᠬᠤ ᠦᠭᠡᠢ ᠶᠤᠮ ᠭᠡᠬᠦ ᠳᠦ ᠣᠭᠲᠣ ᠳᠤᠷᠠᠳᠤᠯ ᠦᠭᠡᠢ ᠥᠩᠭᠡᠷᠡᠬᠦ ᠶᠣᠰᠤᠨ ᠦᠭᠡᠢ ᠶᠤᠮ᠃
ᠸᠠᠩ ᠭᠦᠸ᠋ᠸ ᠸᠸᠢ ᠨᠢ ᠲᠤᠮᠳᠠᠳᠤ ᠢᠷᠭᠡᠨ ᠤᠯᠤᠰ ᠤᠨ ᠦᠶᠡ ᠶᠢᠨ ᠶᠡᠬᠡ ᠡᠷᠳᠡᠮᠲᠡᠨ ᠭᠡᠭᠳᠡᠳᠡᠭ ᠠᠲᠠᠯᠠ ᠶᠠᠭᠤᠨ ᠳᠤ ᠤᠷᠠᠨ ᠵᠤᠬᠢᠶᠠᠯ ᠤᠨ ᠰᠢᠨᠵᠢ ᠲᠠᠢ ᠬᠤᠪᠢ ᠬᠦᠮᠤᠨ ᠤ ᠲᠡᠭᠦᠪᠦᠷᠢ ᠵᠣᠬᠢᠶᠠᠯ ᠠᠴᠠ ᠢᠷᠡᠯ ᠭᠠᠷᠤᠯ ᠨᠢ ᠲᠣᠳᠤ ᠦᠭᠡᠢ ᠵᠣᠢᠯ ᠢ ᠰᠢᠭᠤᠳ ᠲᠡᠤᠬᠡᠨ ᠰᠤᠷᠪᠣᠯᠵᠢ ᠳᠤ ᠨᠡᠮᠡᠵᠤ ᠣᠷᠣᠭᠤᠯᠤᠭᠰᠠᠨ ᠢ ᠨᠢ ᠣᠢᠯᠠᠭᠠᠬᠤ ᠳᠦ ᠪᠡᠷᠬᠡ᠃ ᠢᠯᠠᠩᠭᠤᠶᠠ ᠮᠣᠩᠭᠣᠯ ᠲᠡᠤᠬᠡᠴᠢᠳ ᠡᠭᠦᠨ ᠢ ᠣᠭᠲᠣ ᠨᠢᠭᠲᠠᠯᠠᠯ ᠦᠭᠡᠢ ᠦᠨᠡᠨ ᠪᠣᠯᠭᠠᠨ ᠣᠷᠴᠢᠭᠤᠯᠵᠤ᠂ ᠪᠠᠷᠢᠮᠲᠠ ᠪᠣᠯᠭᠠᠨ ᠡᠰᠢᠯᠡᠵᠤ ᠪᠠᠢᠬᠤ ᠶᠢ ᠪᠦᠷ ᠴᠦ ᠣᠢᠯᠠᠭᠠᠵᠤ ᠶᠠᠳᠠᠨᠠ᠃
ᠵᠡᠭᠦᠯᠲᠡ
1᠂ ︽元史 丘处机传︾ ᠃
2᠂ ᠬᠢᠲᠠᠳ ᠬᠡᠯᠡᠨ ᠦ ᠸᠢᠺᠢᠫᠢᠳᠢᠶᠠ᠂ ᠪᠠᠢᠳᠤᠪᠠᠢᠺᠸ ᠳ᠋ᠥ᠃
3᠂ ︽止杀令︾ ᠃
4᠂ ︽ ᠴᠢᠩᠭᠢᠰ ᠬᠠᠭᠠᠨ ᠤ ᠲᠤᠪᠴᠢᠶᠡᠨ︾᠂ ᠰᠠᠢᠰᠢᠶᠠᠯ ᠵᠤᠭᠢᠶᠠᠪᠠ᠂ 2019 ᠣᠨ ᠤ ᠬᠡᠪᠯᠡᠯ᠂ ᠳᠣᠣᠷᠠᠳᠤ ᠳᠡᠪᠲᠡᠷ ᠦᠨ 594 ᠳ᠋ᠤᠭᠡᠷ ᠨᠢᠭᠤᠷ ᠲᠤ᠃
5᠂ ︽ ᠮᠣᠩᠭᠣᠯ ᠤᠨ ᠲᠡᠤᠬᠡ︾᠂ ᠴ᠂ ᠲᠠᠯᠠᠢ ᠵᠣᠬᠢᠶᠠᠪᠠ᠂ ᠲᠡᠳ᠋ ᠲᠡᠪᠲᠡᠷ᠂ 178 ᠳ᠋ᠤᠭᠠᠷ ᠨᠢᠭᠤᠷ ᠲᠦ᠂ ᠦᠪᠤᠷ ᠮᠣᠩᠭᠣᠯ ᠤᠨ ᠠᠷᠠᠳ ᠤᠨ ᠬᠡᠪᠯᠡᠯ ᠦᠨ ᠬᠣᠷᠢᠶᠠ᠂ 2010 ᠣᠨ᠃ ᠡᠰᠢᠯᠡᠭᠰᠡᠨ ᠥᠭᠦᠯᠡᠪᠦᠷᠢ ᠨᠡᠢᠴᠡᠪᠦᠷᠢ ᠮᠠᠭᠤ ᠲᠠᠢ᠂ ᠤᠢᠭᠤᠷᠵᠢᠨ ᠳ᠋ᠥ ᠪᠠᠭᠤᠯᠭᠠᠬᠤ ᠳᠤ ᠠᠯᠳᠠᠭᠰᠠᠨ ᠪᠠᠢᠵᠤ ᠮᠠᠭᠠᠳ ᠦᠭᠡᠢ᠃
6᠂ ᠠᠯᠪᠠᠨ ᠤ ᠰᠤᠷᠲᠠᠯᠴᠢᠯᠠᠯ ᠢᠶᠠᠷ ᠪᠢᠰᠢ ᠮᠠᠤ ᠶᠢᠨ ᠶᠠᠪᠤᠭᠰᠠᠨ ᠪᠣᠳᠠᠳᠤ ᠵᠠᠮ ᠱᠣᠭᠤᠮ ᠢᠶᠠᠷ ᠨᠢ ᠪᠣᠳᠣᠪᠠ᠃
7᠂ ︽ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠪᠠᠷᠠᠭᠤᠨ ᠳᠤ ᠵᠣᠷᠴᠢᠭᠰᠠᠨ ᠲᠡᠮᠳᠡᠭᠯᠡᠯ︾᠂ ᠳ᠋ᠧᠵᠤ ᠣᠷᠴᠢᠭᠤᠯᠪᠠ᠂ ᠦᠪᠤᠷ ᠮᠣᠩᠭᠣᠯ ᠤᠨ ᠰᠣᠶᠣᠯ ᠤᠨ ᠬᠡᠪᠯᠡᠯ ᠦᠨ ᠬᠣᠷᠢᠶᠠ᠂ 2001 ᠣᠨ᠃
8᠂ ︽玄风庆会录︾᠂ ︽ᠰᠤᠷᠭᠠᠯ ᠢ ᠲᠠᠢᠯᠪᠤᠷᠢᠯᠠᠭᠰᠠᠨ ᠬᠤᠷᠠᠯ ᠤᠨ ᠲᠡᠮᠳᠡᠭᠯᠡᠯ︾ ᠭᠡᠳᠡᠭ ᠨᠡᠷᠡ ᠨᠢ ᠤᠯᠳᠤᠢ ᠮᠢᠨᠤ ᠣᠷᠴᠢᠭᠤᠯᠭᠠ ᠪᠣᠯᠣᠨᠠ᠃ ᠬᠢᠲᠠᠳ ᠡᠬᠡ ᠨᠢ ᠰᠦᠯᠵᠢᠶᠡ ᠳᠦ ᠠᠮᠠᠷᠬᠠᠨ ᠣᠯᠳᠠᠨᠠ᠃
9᠂ ᠳ᠋ᠧᠵᠤ ᠶᠢᠨ ᠣᠷᠴᠢᠭᠤᠯᠭᠠ ᠨᠡᠯᠢᠶᠡᠳ ᠬᠦᠰᠢᠭᠦᠨ ᠪᠣᠯᠣᠭᠰᠠᠨ ᠲᠤᠯᠠ ᠬᠢᠲᠠᠳ ᠡᠬᠡ ᠲᠠᠢ ᠨᠢ ᠲᠤᠯᠭᠠᠨ ᠦᠵᠡᠭᠡᠳ ᠵᠠᠷᠢᠮ ᠦᠭᠡ ᠶᠢ ︽ᠴᠢᠩᠭᠢᠰ ᠬᠠᠭᠠᠨ ᠤ ᠲᠣᠪᠴᠢᠶᠠᠨ︾ ᠳ᠋ᠡᠬᠢ ᠰᠠᠢᠰᠢᠶᠠᠯ ᠭᠤᠸᠠᠢ ᠶᠢᠨ ᠣᠷᠴᠢᠭᠤᠯᠭᠠ ᠪᠡᠷ ᠰᠣᠯᠢᠪᠠ᠃
10᠂ ᠴᠢᠩᠭᠢᠰ ᠬᠠᠭᠠᠨ ᠠᠴᠠ ᠴᠠᠩᠴᠦ᠋ᠨ ᠳᠤ ᠥᠭᠭᠦᠭᠰᠡᠨ ᠴᠤᠯᠠ ᠨᠢ ᠮᠢᠨᠤ ᠡᠨᠡ ᠵᠣᠬᠢᠶᠠᠯ ᠳᠤ ᠲᠡᠳᠤᠢᠯᠡᠨ ᠴᠢᠬᠤᠯᠠ ᠪᠢᠰᠢ ᠪᠣᠯᠪᠠᠴᠤ ᠦᠪᠡᠷ ᠤᠨ ᠰᠠᠨᠠᠯ ᠢ ᠬᠡᠯᠡᠶᠡ᠃ ᠯᠢ ᡁᠢ ᠴᠠᠩ ᠤᠨ ︽神仙 ᠭᠡᠰᠡᠨ ᠴᠤᠯᠠ ᠦᠭᠭᠦᠪᠡ︾ ᠭᠡᠰᠡᠨ ᠢ ᠳ᠋ᠧᠵᠤ ︽ ᠰᠠᠬᠢᠭᠤᠯᠰᠤᠨ︾ ᠭᠡᠵᠤ᠂ ᠰᠠᠢᠰᠢᠶᠠᠯ ᠭᠤᠸᠠᠢ ︽ ᠬᠤᠳᠤᠭᠳᠤ ᠠᠷᠰᠢ︾ ᠭᠡᠵᠤ ᠣᠷᠴᠢᠭᠤᠯᠵᠠᠢ᠃ ᠡᠳᠡ ᠬᠤᠶᠠᠷ ᠤᠨ ᠣᠷᠴᠢᠭᠤᠯᠭᠠ ᠶᠢ ᠠᠪᠴᠤ ᠦᠵᠡᠬᠦ ᠡᠴᠡ ᠡᠮᠤᠨᠡ ᠴᠢᠩᠭᠢᠰ ᠬᠠᠭᠠᠨ ᠶᠠᠭᠤ ᠭᠡᠵᠤ ᠬᠡᠯᠡᠭᠰᠡᠨ ᠢ ᠣᠷᠴᠢᠭᠤᠯᠤᠭᠴᠢ ᠨᠢ ᠬᠢᠲᠠᠳ ᠬᠡᠯᠡᠨᠡ 神仙 ᠬᠡᠮᠡᠨ ᠣᠷᠴᠢᠭᠤᠯᠤᠭᠰᠠᠨ ᠪᠣᠢ ᠭᠡᠳᠡᠭ ᠠᠰᠠᠭᠤᠳᠠᠯ ᠪᠠᠢᠨᠠ᠃ ᠮᠣᠩᠭᠤᠯᠴᠤᠳ ᠪᠣᠮᠪᠣ ᠶᠢᠨ ᠰᠤᠷᠲᠠᠬᠤᠨ ᠤ ᠯᠠᠮᠠ ᠨᠠᠷ ᠢ ᠡᠷᠳᠡᠮ ᠴᠢᠳᠠᠯ ᠢᠶᠠᠷ ᠨᠢ ᠪᠣᠮᠪᠣ᠂ ᠠᠷᠰᠢ ᠭᠡᠵᠤ ᠬᠣᠶᠠᠷ ᠳᠡᠰᠯᠡᠨ ᠨᠡᠷᠡᠯᠡᠳᠡᠭ ᠪᠠᠢᠵᠠᠢ᠃ ᠠᠷᠰᠢ ᠳᠤ ᠪᠠᠰᠠ ᠶᠡᠬᠡ ᠠᠷᠰᠢ᠂ ᠲᠡᠭᠡᠳᠤ ᠠᠷᠰᠢ ᠭᠡᠵᠤ ᠠᠩᠭᠢᠯᠠᠳᠠᠭ ᠪᠠᠢᠨᠠ ︵ ᠵᠡᠭᠦᠯᠲᠡ 11︶ ᠃ ᠡᠢᠮᠤ ᠠᠴᠠ ᠴᠢᠩᠭᠢᠰ ᠬᠠᠭᠠᠨ ︽ ᠲᠡᠭᠡᠳᠤ ᠠᠷᠰᠢ︾ ᠭᠡᠵᠤ ᠴᠣᠯᠠᠯᠠᠭᠰᠠᠨ ᠯᠡ ᠪᠣᠯᠪᠠ ᠦᠦ᠃ ᠠᠷᠰᠢ ᠶᠢ ᠬᠢᠲᠠᠳ ᠢᠶᠠᠷ 仙 ᠭᠡᠳᠡᠭ ᠲᠤᠯᠠ ᠲᠡᠭᠡᠳᠤ ᠠᠷᠰᠢ ᠭᠡᠰᠡᠨ ᠮᠣᠩᠭᠣᠯ ᠨᠡᠷᠡ ᠶᠢ 神仙 ᠭᠡᠵᠤ ᠬᠢᠲᠠᠳᠴᠢᠯᠠᠬᠤ ᠨᠢ ᠤᠳᠬᠠ ᠶᠢᠨ ᠬᠤᠪᠢ ᠳ᠋ᠥ ᠵᠥᠪ ᠭᠡᠵᠤ ᠪᠣᠳᠣᠨᠠ᠃ ᠬᠠᠷᠢᠨ ᠦᠨᠤ ᠶᠢᠨ ᠪᠢᠳᠡ ᠮᠣᠩᠭᠣᠯ ᠬᠡᠯᠡᠨ ᠡᠴᠡ ᠬᠢᠲᠠᠳᠴᠢᠯᠠᠭᠰᠠᠨ ᠨᠡᠷᠡ ᠶᠢ ᠮᠣᠩᠭᠣᠯ ᠤᠷᠤᠭᠤ ᠪᠤᠴᠠᠭᠠᠨ ᠣᠷᠴᠢᠭᠤᠯᠬᠤ ᠳᠠᠭᠠᠨ ᠬᠠᠨᠽᠢ ᠶᠢ ᠦᠰᠦᠭᠴᠢᠯᠡᠨ ᠣᠷᠴᠢᠭᠤᠯᠬᠤ ᠪᠢᠰᠢ ᠤᠭ ᠮᠣᠩᠭᠣᠯ ᠬᠡᠯᠡᠨ ᠳᠡᠬᠡᠨ ᠶᠠᠭᠤ ᠭᠡᠳᠡᠭ ᠦᠭᠡ ᠪᠠᠢᠭᠰᠠᠨ ᠢ ᠢᠯᠡᠭᠦᠤ ᠪᠣᠳᠣᠬᠤ ᠨᠢ ᠵᠦᠪ ᠪᠠᠢᠬᠤ᠃ ︽ ᠬᠤᠳᠤᠭᠲᠤ︾ ᠭᠡᠳᠡᠭ ᠪᠣᠯ ᠪᠣᠷᠬᠠᠨ ᠱᠠᠰᠢᠨ ᠤ ᠨᠡᠷᠡ ᠲᠣᠮᠢᠶᠠ ᠲᠤᠯᠠ ᠮᠡᠳᠡᠭᠡᠵᠢ ᠡᠨᠳᠡ ᠵᠤᠬᠢᠴᠠᠬᠤ ᠦᠭᠡᠢ᠃ 神仙 ᠳᠦ ᠰᠠᠬᠢᠭᠤᠯᠤᠭᠰᠠᠨ ᠭᠡᠬᠦ ᠤᠳᠬᠠ ᠪᠠᠢᠭᠠ ᠴᠦ ᠪᠣᠮᠪᠣ ᠶᠢᠨ ᠯᠠᠮᠠ ᠳᠡᠭᠡᠷᠡ ᠠᠷᠰᠢ ᠭᠡᠬᠦ ᠨᠢ ᠰᠢᠯᠵᠢᠰᠢ ᠦᠭᠡᠢ ᠨᠡᠷᠡᠯᠡᠯ ᠶᠤᠮ᠃
11᠂ ᠱᠠᠰᠢᠨ ᠤ ᠲᠣᠯᠢ᠂ ᠰᠣᠳᠣᠪᠢᠯᠢᠭ᠌ ᠵᠣᠭᠢᠶᠠᠪᠠ᠂ ᠦᠪᠤᠷ ᠮᠤᠩᠭᠤᠯ ᠤᠨ ᠰᠤᠷᠭᠠᠨ ᠬᠦᠮᠤᠵᠢᠯ ᠤᠨ ᠬᠡᠪᠯᠡᠯ ᠦᠨ ᠬᠣᠷᠢᠶᠠ᠂ 1996 ᠣᠨ᠃
12᠂ ︽ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠪᠠᠷᠠᠭᠤᠨ ᠳᠤ ᠵᠣᠷᠴᠢᠭᠰᠠᠨ ᠲᠡᠮᠳᠡᠭᠯᠡᠯ︾᠂ 137 ᠨᠢᠭᠤᠷ ᠲᠤ᠃
13᠂ ᠡᠮᠤᠨᠡᠬᠢ ᠲᠠᠢ ᠠᠳᠠᠯᠢ᠂ 152 ᠨᠢᠭᠤᠷ ᠲᠤ᠃
14᠂ ᠡᠮᠤᠨᠡᠬᠢ ᠲᠠᠢ ᠠᠳᠠᠯᠢ᠂ 153 ᠨᠢᠭᠤᠷ ᠲᠤ᠃
15᠂ ᠡᠮᠤᠨᠡᠬᠢ ᠲᠠᠢ ᠠᠳᠠᠯᠢ᠂ 153 ᠨᠢᠭᠤᠷ ᠲᠤ᠃
16᠂ ᠡᠮᠤᠨᠡᠬᠢ ᠲᠠᠢ ᠠᠳᠠᠯᠢ᠂ 153-154 ᠨᠢᠭᠤᠷ ᠲᠤ᠃
17᠂ ᠡᠮᠤᠨᠡᠬᠢ ᠲᠠᠢ ᠠᠳᠠᠯᠢ᠂ 157 ᠨᠢᠭᠤᠷ ᠲᠤ᠃
18᠂ ᠡᠮᠤᠨᠡᠬᠢ ᠲᠠᠢ ᠠᠳᠠᠯᠢ᠂ 154 ᠨᠢᠭᠤᠷ ᠲᠤ᠃
19᠂ ᠵᠣᠬᠢᠶᠠᠯ ᠳᠤ ︽ ᠱᠠᠨᠳᠦ᠋ᠩ᠂ ᠾᠸᠪᠸᠢ︾ ᠭᠡᠵᠤ ᠪᠢᠴᠢᠵᠤ ᠪᠠᠢᠨᠠ᠂ ᠱᠠᠨᠳᠦ᠋ᠩ᠂ ᠾᠸᠪᠸᠢ ᠨᠢ ᠠᠯᠳᠠᠨ ᠤᠯᠤᠰ ᠲᠦ ᠦᠨᠤ ᠶᠢᠨ ᠰᠢᠭ ᠮᠤᠵᠢ ᠶᠢᠨ ᠨᠡᠷᠡ ᠪᠢᠰᠢ ᠪᠣᠯᠬᠤᠷ ᠡᠨᠳᠡ ᠲᠠᠢᠬᠠᠩᠱᠠᠨ ᠠᠴᠠ ᠵᠡᠭᠦᠨᠰᠢ ᠬᠠᠲᠤᠨ ᠭᠣᠣᠯ ᠠᠴᠠ ᠬᠣᠢᠰᠢ ᠬᠢ ᠭᠡᠰᠡᠨ ᠦᠭᠡ ᠶᠤᠮ᠂ ᠬᠡᠷᠡᠭ ᠲᠡᠭᠡᠷᠡ ᠪᠡᠨ ᠵᠦᠩᠶᠤᠸᠠᠨ ᠣᠷᠣᠨ ᠢ ᠵᠢᠭᠠᠵᠠᠢ᠃
20᠂ ᠵᠦᠩᠬᠤᠸᠠ᠂ ᠵᠦᠩᠭᠦᠢᠸ᠋ᠸ᠂ ᠬᠠᠨ ᠦᠨᠳᠦᠰᠤᠳᠡᠨ ᠭᠡᠳᠡᠭ ᠪᠣᠯ ᠲᠠᠢᠴᠢᠩ ᠭᠦᠷᠤᠨ ᠠᠴᠠ ᠬᠣᠢᠰᠢ ᠵᠣᠭᠢᠶᠠᠭᠰᠠᠨ ᠨᠡᠷᠡ ᠪᠤᠶᠤ ᠤᠬᠠᠬᠳᠠᠬᠤᠨ ᠨᠦᠭᠥᠳ ᠶᠤᠮ᠃
21᠂ ᠴᠠᠩᠴᠦ᠋ᠨ ᠪᠣᠮᠪᠣ ᠶᠢ ᠬᠠᠭᠠᠳ ᠡᠵᠡᠳ ᠢ ᠲᠣᠭᠣᠮᠰᠠᠷᠯᠠᠳᠠᠭ ᠦᠭᠡᠢ ᠶᠡᠬᠡ ᠰᠡᠳᠬᠢᠭᠴᠢ ᠬᠡᠮᠡᠨ ᠦᠨᠡᠯᠡᠬᠦ ᠶᠢ ᠬᠢᠲᠠᠳ ᠪᠢᠴᠢᠭᠳᠡᠳ ᠣᠷᠣᠯᠳᠣᠭᠰᠠᠭᠠᠷ ᠢᠷᠡᠵᠡᠢ᠃ 1216 ᠣᠨ ᠳᠤ ᠰᠦᠩ ᠦᠨ ᠬᠠᠭᠠᠨ᠂ 1219 ᠣᠨ ᠳᠤ ᠠᠯᠲᠠᠨ ᠤᠯᠤᠰ ᠤᠨ ᠬᠠᠭᠠᠨ ᠵᠠᠯᠠᠭᠰᠠᠨ ᠳᠤ ᠣᠴᠢᠭᠰᠠᠨ ᠦᠭᠡᠢ ᠭᠡᠨᠡ᠂ ᠭᠡᠪᠡᠴᠤ ᠵᠠᠷᠢᠮ ᠮᠡᠳᠡᠭᠡᠯᠡᠯ ᠳ᠋ᠦ ᠠᠯᠲᠠᠨ ᠣᠯᠣᠰ ᠤᠨ ᠱᠢ ᠽᠦᠩ ᠬᠠᠭᠠᠨ ᠲᠠᠢ ᠭᠤᠷᠪᠠᠨᠲᠠ ᠠᠭᠤᠯᠵᠠᠭᠰᠠᠨ ᠭᠡᠵᠤ ᠪᠠᠢᠨᠠ᠃
22᠂ ︽ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠪᠠᠷᠠᠭᠤᠨ ᠳᠤ ᠵᠣᠷᠴᠢᠭᠰᠠᠨ ᠲᠡᠮᠳᠡᠭᠯᠡᠯ︾᠂ 5 ᠨᠢᠭᠤᠷ ᠲᠦ᠃
23᠂ ᠡᠮᠤᠨᠡᠬᠢ ᠲᠠᠢ ᠠᠳᠠᠯᠢ᠂ 11 ᠨᠢᠭᠤᠷ ᠲᠦ᠃
24᠂ ᠡᠮᠤᠨᠡᠬᠢ ᠲᠠᠢ ᠠᠳᠠᠯᠢ᠂ 16-17 ᠨᠢᠭᠤᠷ ᠲᠦ᠃
25᠂ ᠡᠮᠤᠨᠡᠬᠢ ᠲᠠᠢ ᠠᠳᠠᠯᠢ᠂ 68 ᠨᠢᠭᠤᠷ ᠲᠦ᠃
26᠂ ᠡᠮᠤᠨᠡᠬᠢ ᠲᠠᠢ ᠠᠳᠠᠯᠢ᠃ 68 ᠨᠢᠭᠤᠷ ᠲᠦ᠃
27᠂ ᠴ᠂ ᠳᠠᠯᠠᠢ᠂ ︽ ᠮᠣᠩᠭᠣᠯ ᠤᠨ ᠲᠡᠤᠬᠡ︾᠂ ᠳᠡᠳ᠋ ᠳᠡᠪᠲᠡᠷ᠂ 180 ᠨᠢᠭᠤᠷ ᠲᠤ᠃
28 ᠴ᠂ ᠳᠠᠮᠳᠢᠨᠰᠦ᠋ᠷᠦᠩ ᠤᠨ ᠲᠠᠢᠯᠪᠤᠷᠢᠯᠠᠭᠰᠠᠨ ︽ᠮᠣᠩᠭᠣᠯ ᠤᠨ ᠨᠢᠭᠤᠴᠠ ᠲᠤᠪᠴᠢᠶᠡᠨ︾ ᠤ 254 ᠳ᠋ᠤᠭᠠᠷ ᠵᠣᠢᠯ᠃ ᠦᠪᠤᠷ ᠮᠣᠩᠭᠣᠯ ᠤᠨ ᠠᠷᠠᠳ ᠤᠨ ᠬᠡᠪᠯᠡᠯ ᠤᠨ ᠬᠣᠷᠢᠶᠠ᠂ 1997 ᠣᠨ ᠤ ᠬᠡᠪᠯᠡᠯ᠃
29᠂ ᠰᠠᠢᠰᠢᠶᠠᠯ᠂ ︽ ᠴᠢᠩᠭᠢᠰ ᠬᠠᠭᠠᠨ ᠤ ᠲᠤᠪᠴᠢᠶᠠᠨ︾᠂ ᠲᠣᠣᠷᠡᠳᠤ ᠳᠡᠪᠲᠡᠷ᠂ 591 ᠨᠢᠭᠤᠷ ᠲᠦ᠃
30᠂ ︽ ᠰᠤᠷᠭᠠᠯ ᠢ ᠲᠠᠢᠯᠪᠤᠷᠢᠯᠠᠭᠰᠠᠨ ᠬᠤᠷᠠᠯ ᠤᠨ ᠲᠡᠮᠳᠡᠭᠯᠡᠯ︾᠂ 10 ᠳ᠋ᠤᠭᠠᠷ ᠤᠯᠠᠭᠠᠨ ᠮᠦᠷ ᠲᠦ᠃
31᠂ ᠡᠮᠤᠨᠡᠬᠢ ᠲᠠᠢ ᠠᠳᠠᠯᠢ᠂ 20 ᠳ᠋ᠤᠭᠠᠷ ᠤᠯᠠᠭᠠᠨ ᠮᠦᠷ ᠲᠦ᠃
32᠂ ᠡᠮᠤᠨᠡᠬᠢ ᠲᠠᠢ ᠠᠳᠠᠯᠢ᠂ 36 ᠳ᠋ᠤᠭᠠᠷ ᠤᠯᠠᠭᠠᠨ ᠮᠦᠷ᠃
33᠂ ︽ᠴᠠᠩᠴᠦ᠋ᠨ ᠪᠣᠮᠪᠣ ᠶᠢᠨ ᠪᠠᠷᠠᠭᠤᠨ ᠳᠤ ᠵᠣᠷᠴᠢᠭᠰᠠᠨ ᠲᠡᠮᠳᠡᠭᠯᠡᠯ︾ 197-198 ᠳ᠋ᠤᠭᠠᠷ ᠨᠢᠭᠤᠷ ᠲᠦ᠃
34᠂ ᠡᠮᠤᠨᠡᠬᠢ ᠲᠠᠢ ᠠᠳᠠᠯᠢ᠂ 180-181 ᠳ᠋ᠤᠭᠠᠷ ᠨᠢᠭᠤᠷ ᠲᠦ᠃
35᠂ ᠡᠮᠤᠨᠡᠬᠢ ᠲᠠᠢ ᠠᠳᠠᠯᠢ᠂ 6 ᠨᠢᠭᠤᠷ ᠲᠦ᠃
36᠂ ᠡᠮᠤᠨᠡᠬᠢ ᠲᠠᠢ ᠠᠳᠠᠯᠢ᠂ 6-7 ᠨᠢᠭᠤᠷ ᠲᠦ᠃
11/15/2021
Clearwater beach᠂ FL᠂ USA ᠳᠦ ᠪᠢᠴᠢᠪᠡ᠃
ᠵᠣᠬᠢᠶᠠᠭᠴᠢ ᠶᠢᠨ ᠪᠯᠣᠭ ᠤᠨ ᠬᠠᠶ᠋ᠢᠭ᠄ https://maynewblogspo.blogspot.com
Email : tumenulzei@gmail.com